حماتي العزيزة.. دا حفل خطوبتي مش خطوبتك

الحماة هي الطرف الثالث دائما في كل خلافات مراحل الزواج المتعددة، فبعد الزيارة الأولى التي تجسد فيها الحماة دور المفتش كرومبو حيث التقتيش والتمحيص في المحروسة العروسة وفى أهلها وأثاث منزل أهلها والجاتوة وكأسات الشربات وخلافه، تغادر الحماة منزل العروسة في ذاكرتها قائمة طويلة عريضة بكل السلبيات اللى رصدتها خلال الزيارة.
حفلة الخطوبة
تتقمص الحماة في تجهيزات حفل الخطوبة دور العروسة نفسها، أو على الأقل تتحول إلى مركز العكننة والنكد على العروسة، فتحرص على اختيار القاعة اللى تناسبها هي ومعازيمها، كما تحرص على اختيار فستان العروسة حب رؤيتها حتى وان كان من أيام الهكسوس، وتكتمل المصيبة إذا ذهبت بصحبة العروسة إلى الكوافير، لتسلك أحد الطريقين، إما الترخيم على العروسة واختيار مكياج على كيفها حتى لو مش هيناسب العروسة، أو تدخل في سباق مع الغلبانة وتكون حريصة على أن تظهر أجمل من العروسة اللى هي من دور عيالها، ولو طلعت وحشة والعروسة أجمل يبقى أكيد العيب في الكوافير.
أما أثناء مراسم الحفل، تبدع الحماة في تقمص دور قوات الأمن المركزى، لتبعد عن العروسة الغلبانة كل صديقاتها وقريباتها بحجة الخوف من إفساد مكياجها، وتمثل دور المعارضة في فعاليات الحفل، فتبدأ في الاعتراض على الأغانى اللى شغالها في الفرح، فلو كانت أغانى شبابية توصفها بالمسخرة، ولو كانت أغانى هاديها تقولك "هو احنا في عزا!"، وتمتد معارضتها بالطبع لديكور القاعة والكوشة- اللى العروسة أختارتها- وتقول مافيش فايدة لو بتسمع كلامى كان هيبقى فرح ولا ألف ليلة وليلة- دا على أساس أن ابنها شهريار- وتنتهى المعارضة بنقد البوفية – اللى أهل العروسة دافعين تمنه- وتقول دا مايلقش بابنى ولا بالمعازيم بس هنعمل إيه بيحبها.
أما التصوير، فتعتقد الحماة أنها انجلينا جولى، وأن المصور مختص في تصويرها وفقط، فتلزق للعروسين طوال فترة التصوير كأنها ضلهم، لدرجة أن المصور نفسه بيتمنى أن الكاميرا تتحرق علشان يرتاح منها، كما تحرص على التقاط العديد من الصور بجوار الشبكة وكأنها تثبت حالها انهم اشتروا للعروسة شبكة.
ويكون لسان حال العروس الملكومة، حماتى العزيزة دا حفل خطوبتي مش خطوبتك، اما العريس فيلعب دور المطيباتى وعلى لسانه عبارة واحدة.. معلش حبيبتى استحمل دى أمي برضه وصدقينى هنبه عليها ماتدخلش في حياتنا ابدا.
وفى نهاية الحفل ومع أغنية ياسهر الليالي، تبدأ الحماة في إعداد قائمة الانتقادات علشان ترخم بيها على العروسة في أول زيارة بعد حفل الخطوبة.