أنغام تكشف تفاصيل وعكتها الصحية.. وترد على الزج باسمها في أزمة شيرين

خرجت النجمة أنغام عن صمتها للرد على الشائعات التي طالتها مؤخرًا بشأن الحملة التي وجهت ضد الفنانة شيرين عبد الوهاب بعد حفلها في مهرجان موازين، والتي زعم أن لأنغام علاقة بها بسبب استخدام شيرين لتقنية "بلاي باك".
أنغام تكشف تفاصيل وعكتها الصحية
أوضحت أنغام خلال مداخلة هاتفية مع برنامج "كلمة أخيرة" الذي تقدمه الإعلامية لميس الحديدي على قناة ON، أنها ما زالت في المستشفى منذ السبت الماضي نتيجة وعكة صحية مفاجئة قائلة: "أنا فعلًا في المستشفى بعد وعكة صحية حصلت بشكل مفاجئ يوم الأربعاء الماضي. شعرت بتعب شديد وتم نقلي للمستشفى صباح السبت. الحقيقة مكنتش عايزة حد يعرف علشان كنت تعبانة جدًا ومكنتش قادرة أستقبل زيارات ولا أشرح حالتي الصحية، فقررت مافيش داعي أقول علشان أرتاح شوية".
تعليق أنغام على الشائعات والهجوم
وعلقت حول الحملة التي استهدفتها، قائلة: "أنا مكنتش مصدقة الكلام خالص. أنا مش من الشخصيات اللي بتحب تدافع عن نفسها ولا بترد على الشائعات، ولا بدخل في مهاترات، وده منهجي في حياتي من زمان سواء على المستوى الشخصي أو المهني. أنا طول عمري بسيب الأمور تختفي لوحدها، وربنا بينصفني دايمًا".
أنغام تحذر مروجي الشائعات

وأوضحت: "الظلم المرة دي غير محتمل، لا قادرة أتكلم ولا قادرة أسكت، لكن الأمر وصل لدرجة التجريح والشتائم والتلميحات اللي مش مقبولة من ناس المفروض مسؤولين وزملاء. البعض بيقول إحنا عارفين مين ورا الحملة، والفانز بتوع المطربة المنافسة بيتكلموا وكأنهم عارفين حاجة، وفي مواقع كتبت اسمي بشكل مباشر".
وأكدت: "أنا لا أتهمها شخصيًا، لكن في ناس حواليها بيقولوا كده وبيوجهوا الناس لكده. أنا مش هقول إني أكبر من كده وهي كمان أكبر من كده، بس عيب اللي بيحصل. واللي بيحاولوا يقربوا منها بطريقة مغلوطة يقولوا لها تحبها وتشجعها براحتك، لكن مالهمش دعوة بيا".
وحذرت أنغام: "أي شخص هيتمادى وهيجيب سيريتي، مش هسكت. أنا فعلاً تعبت. ورفعت قضية على شاب قبل كده كتب عني على تويتر وقال 'مش هترحمي شيرين يا أنغام' وكسبت القضية اتحبس. وأي حد هيتجرأ تاني ويزج بإسمي مش هسكت."
ولم تتمالك أنغام نفسها خلال المداخلة وبكت قائلة: "كفاية ظلم، كفاية كره، كفاية حقد. أنا تعبت. سبوني في حالي. محدش ليه دعوة بنيتي، ربنا اللي هيحاسبني. كفاية توجيه حملات ضدي".
واختتمت: "لما إعلامي يطلع يدافع عن شيرين له كل الاحترام، لكن وإنت بتبص على شيرين، بص كمان على أنغام اللي مالهاش علاقة بالموضوع. كفاية مقارنة عقيمة ومؤذية. هي اسمها شيرين وأنا اسمي أنغام، ليها جمهورها وليا جمهوري. ربنا يكرمنا كلنا. متدعيش لي، لكن على الأقل بلاش تدعي علي وتظلمني".

رسالة أنغام لجمهورها
ووجهت أنغام رسالة مؤثرة لجمهورها قائلة: "أنا عايزة من الناس اللي بتحبني مايحطونيش في مقارنة مع حد. حبوني علشاني أنا، مش علشان أكون أحسن من حد. ماتقارنونيش بحد، ولا تقارنوا حد بيا حتى لو المقارنة في صالحي، أنا مش عايزاها. ده شيء مش مقبول ومش بيكبرني، ولو بتحبوني بجد، مش ده الأسلوب اللي تقدروا تكرموني بيه أو تدعموني بيه. لو سمحتوا، ماتحطونيش في مواقف تخلي الناس تعتقد إن أنا زقتكم تعملوا ده".

حفلة شيرين عبد الوهاب في مهرجان موازين
تعرضت الفنانة شرين عبد الوهاب إلى انتقادات عقب إحيائها حفل ختام فعاليات الدورة ال20 من مهرجان "موازين"، والذي أقيم على مسرح النهضة بالمغرب .
حيت أحيت شيرين حفلها باستخدام نظام ال«بلاي باك»، وتوالت التعليقات المنتقدة لاعتماد شيرين على الغناء المسجل بدلًا من الأداء الحي.
تعليق رسمي من إدارة مهرجان موازين
نشرت إدارة مهرجان موازين عبر صفحتها الرسمية على تطبيق "إنستجرام" مجموعة من صور الحفل وعلقت عليها قائلة: "قدمت عرضًا تفاعل معه الجمهور بكل حب من أول لحظة حتى آخر نغمة".
الصفحة الرسمية لمهرجان موازين