الزمالك يهاجم أمين عمر: أهلاوي ونتمنى "ميتقلش في الفطار" قبل القمة

تحدث إبراهيم عبد الله عضو اللجنة التنفيذية بنادي الزمالك عن اختيار أمين عمر حكمًا لمباراة الأهلي والزمالك القادمة.
وقال إبراهيم عبد الله في تصريحات لبرنامج الماتش "باين كدة في خناقة بين وجيه أحمد وبين أمين عمر وبيكرهه، وجيه عارف ان أمين عمر أهلاوي ووالده أهلاوي وبيهاجم الزمالك على فيس بوك وبيصدره للمشكلات بتعيينه حكم للمباراة".
وتابع "أتمنى بكرة أمين عمر ميتقلش في الفطار ويبقى جمب الكورة كل شوية وتبقى السماعة في ودنه علشان يسمع نداء الفار".
وأضاف "احنا زهقنا من إن الأخطاء في مباريات القمة تكون ضد الزمالك فقط وفي اتجاه واحد فقط،، مش بنعترض على الحكام المصريين، لكن ياريت وجيه أحمد كان يرحم أمين عمر من الضغط إللى هيبقى عليه بسبب انتمائه، مش عارف هنعمل ايه بكرة بصراحة ".
وواصل إبراهيم عبد الله "الأهلي اعترض على تعيين أمين عمر؟ مع احترامي لهم أنا مش بتكلم عن النادي الأهلي وكل نادي له سياساته".
وأردف " تصريحاتنا مش ضغط على الحكام، دي حقائق، تعالى شوف كام دوري الزمالك خسره بسبب أخطاء الحكام، خسرنا أكتر من 10 دوريات بسبب الأخطاء البشرية".
وتابع "راجعوا كل ماتشات الزمالك إللى حصلت الفترة إللى فاتت هتلاقي المباراة مصفصفة 30 دقيقة بالكتير".
واستكمل إبراهيم عبد الله تصريحاته "الزمالك لم يخسر في وجود أمين عمر؟، انا مالي بالأرقام؟ هو يعني لعب كورة برجله في مباراة فيهم من صناعة شيكابالا وسجل هدف؟، شوف بقى هو حرمني من كام ضربة جزاء في المباريات، أمين عمر ده حسب ساب وقت أطول من الوقت الضائع في مباراة الأهلي وسموحة".
واختتم إبراهيم عبد الله تصريحاته "الحكام بتحسبلي فاولات في أماكن مالهاش لازمة وأوت عبيط، مفيش فاولات على الصندوق بتتحسب لصالح الزمالك".