كشفت صباح خضير، مفجرة فضائح أحمد بسام زكي، كيفية بدء البحث في قصة المتحرش وسبب اهتمامها بقصته، وقالت في تصريحات خاصة ل"البوابة نيوز": من سنة سمعت عنه، لأول مرة جالي رسالة من حساب على إنستجرام من غير صورة ولا اسم حقيقي وقالتلي صباح انا من متابعينك من كتير اوي وانا عندي مشكلة كبيرة، ان واحد معايا في الكلية تحرش بيا جامد وبيفضل يمشي ورايا كل يوم وانا رحت الكلية واتكلمت معاهم وهما معملوش حاجة. وتابعت خضير، في تصريحتها نقلا عن البنت المتضررة: قالتلي أنا خايفة جدا ومش عارفة اتعامل ازاي فرديت عليها وبعدين البنت اختفت ومردتش عليا تاني، بعدها بأسبوعين كان في قصة صديقتي في الجامعة الأمريكية حاكتهالي عن بنت في الجامعة الأمريكية تم التحرش بيها من ولد في الجامعة وكان بيمشي وراها وان هي اشتكت لصاحبتي دي والموضوع انتشر، وانا قولتلها غريبة القصة دي شبه قصه جاتلي على إنستجرام في رسالة من بنت واختفت بعد كده قالتلي عمتا مش البنت دي بس اللي بتقول عنه كده ده كان في جروب عاملينه طلبة الجامعة الأمريكية في 2018 والصفحة دي كان اسمها rate Auc professeurs والصفحة دي نزل عليها في 2018 منشور لبنت قالت عليه أن أحمد بسام زكي بيتحرش بيها وأنا عايزة اخد حقي منه". وتابعت: "لقوا بعد كده في بنات كتير علقوا على المنشور قالوا واحنا كمان فالجامعة الأمريكية، لما أحمد بسام زكي بعتلهم رسالة على الجروب قالهم انا واقف فوق سطح الجامعة وهنتحر لو البوست ده متشالش وانه عنده مشكلات نفسية، بعد كده فوجئ البنات بإن البوست ده اتشال من على الحروب برغم ان ناس كتير كانت متابعاه.. البنات بعدها انفعلوا جدا لانهم حاسوا انهم مخدوش حقهم، وقالوا بدل ما يجوا يتكلموا معانا إدارة الجامعة ويشوفوا ايه حصلنا يشيلوا المنشور وبعدها الجامعة الأمريكية مشت أحمد بسام زكي في 2018 عشان اداءه الأكاديمي الضعيف، وبعدها التحق بالجامعة الأوروبية في برشلونةاسبانيا في 2019 ". وأضافت، الموضوع بدأ يتجدد تاني من أسبوع ونص أخر يونيو 2020 في بنت حطت منشور على مواقع التواصل الاجتماعي قالت يا جماعة الولد ده أحمد بسام زكي، متحرش وحطت صورته وقالت انا يحذركم تردوا عليه أو تتعاملوا معاه وانه حاول التحرش بيها وبصاحبتها وافتكرت اني سمعت الاسم ده قبل كده وشوفت صورته قبل كده كلمت صديقتي اللي كانت في الجامعة الأمريكية فكرتني باسمه وصورته واتأكدت ان هو نفس الشخص، وبالفعل قعدت اليوم ده كله اتفرج على منشور البنت وازاي جالها تعليقات كتير جدا وفي ناس اعادت نشر البوست بتاعها على صفحاتهم الشخصية وكان منهم واحدة من البنات اللي علقت على البوست قالت الولد ده اغتصبني، فبعت للبنت قولتلها الشكوى دي كبيرة ممكن تحكيلي اكتر وهي بتحكيلي انا كنت مصدقاها اوي 100٪ عشان كمية التفاصيل اللي هي بتسردها في قصتها لدرجة ان هي عارفة بيته من جوا عارفة الحمام وهي بتستخبي منه شكله ايه غرفة اخته لما جريت منه واستخبت فيها، ثم تم اتخاذ إجراءات التى أوقعت بالجانى، مشيرة في الوقت ذاته إلى سعادتها بموقف النائب العام الذى وصفته بالمشرف، داعية إلى مواجهة تلك الظاهرة، التى تهدد المجتمع.
