عمرو أديب يعتذر للشعب المصري على الهواء

علق عمرو أديب، على التزام المصريين اليوم في شم النسيم، وقال: "إيه الجمال ده والعظمة دي والوعي ده والأداء المحترم ده، عشرة على عشرة، أنتو تاخدوا نجمة كبيرة، النهاردة مصر بكل محافظات قامت بأداء غير طبيعي، أقعد في البيت حاضر، أنا بحافظ على بلدي وعلى ولادي وعلى دولتي، ده أداء مصري حضاري، أنا كنت غلطان لأني متخيلتش أن الناس تلتزم كدة.. حقيقي أنا أسف وحقكم على رأسي".
وأضاف عمرو أديب، خلال برنامج "الحكاية" الذي يذاع على قناة mbc مصر: "على فكرة لم يكن هناك حظر للتجوال، ومحدش قال لحد متنزلش الشارع، لكن الناس التزمت من نفسها، المواصلات العامة بس اللي وقفت، حد كان يتخيل أن ده كورنيش إسكندرية، ولا دي القناطر الخيرية اللي كانت مصر كلها بتروحها في شم النسيم، مش معقول أنتوا أبهرتوني، انهاردة الإسكندرانية باعتين فيديوهات للكورنيش وللترام وللشوارع الفاضية، قالولي عاوزين ندي فرصة للمستشفيات تشم نفسها وإحنا بنحب مصر بلدنا".
وقال عمرو أديب: "أنا كعمرو انبهرت، أنا صاحي من بدري مستني تجيلي الفيديوهات إياها، والنهاردة الداخلية لجانها هي نفس لجان الحظر، والناس عاملة مجهود عظيم، لكن الشعب أتعاون، الشعب ساعد الداخلية النهاردة تشوف شغلها، الناس كانت بتقولي شم النسيم لا يمكن المصريين يعدوه، بس الناس كانت عند حسن ظن بلدها، أنا بشكر كل مصري، أنتوا النهاردة نموذج، ده النهاردة في فلورديا معرفوش يعملوا كده".