أمير طعيمة ل"الهارب محمد علي": "لو انت صاحب مبدأ انزل مصر"

أعاد الشاعر الغنائي أمير طعيمة، نشر تدوينة على صفحته بموقع التواصل الاجتماعي "فيس بوك"، كان سبق ونشرها كرد فعل على أول فيديو نشره الهارب محمد علي، وعلق "طعيمة" عليه بتدوينة جديدة طالب فيها محمد علي بالنزول لمصر إذا كان بالفعل لديه مبدأ، وجاءت التدوينة الجديدة طويلة ننشر منها بعض اللقطات.
وقال "طعيمة": "البوست اللي في الصورة ده أنا نزلته في بداية فيديوهات قائد الفتوحات الحديث محمد علي، وشلته عشان مش عايز دوشة ومبقاش عندي خلق أدخل في حوارات ديمقراطية مع ناس مفهومها عن الديمقراطية إنك تسب الدين وتخوض في أعراض اللي يقول كلمة مش على هواك".
وأضاف: "بس أنا بعيد نشره تاني عشان أولا كل اللي كتبته اتحقق أهو وبعد ما بدأ فيديوهاته بعركة على فلوس وهو عامل دماغ ولما صحي وفاق ولقي إن خلاص كده الفلوس راحت بعد اللي عمله، فقلبها شعب ورئيس ووطن ومبادئ، وثانيا عشان المركب لما بتغرق بتغرق بالكل ومحدش هيسمح بده لا الدولة ولا المواطنين".
وتابع قائلًا: "يا أخ محمد انزل مصر وادينا القدوة واتمسك واتحبس واتبهدل، ده اللي المفروض تعمله لو صاحب مبدأ، ولا الرجولة تنزل ناس يتحبسوا مكانك وتحصل فوضى ويموت اللي يموت ولما الصورة تبان تنزل انت بقي تقص شريط الاحتفال بخراب مصر".
وأوضح قائلًا: "بتوع انت مش حاسس بالغلابة والجو ده، أنا سيادتك أصلا مش وارث أطيان من جدي الباشا وكل مليم معايا بفضل الله أولا وثانيا بتعبي ومجهودي وبالموهبة اللي ربنا ادهالي ده غير إن 90٪؜ من أهلي ناس على باب الله، ولو أنا شايف إن الثورات دي هتفيدهم هبقي أول واحد ينزل، زي ما عملت في يناير، بس أنا مش غبي وشفت نتايج اللي حصل ومش عايز يتكرر تاني".