عبد الرحيم علي: "6 أبريل" باعت الوطن وقبضت الثمن

قال الدكتور عبد الرحيم علي، رئيس تحرير موقع "البوابة نيوز"، إنه تلقى مكالمات تهنئة على انفراده بالأمس بخصوص مكالمات بين منسق عام حركة شباب 6 أبريل السابق أحمد ماهر، والقيادي بحركة شباب 6 أبريل محمد عادل، وبعضها يحذره ويهدده بمسمى "معسكر الثورة"، قائلًا: "تحول الكثير من الثوار إلى خونة والعكس.. تعلمنا في مدرسة اليسار المصري فلا تبيعوا الماء في حي السقايين".
وتابع عبد الرحيم، خلال حلقة جديدة له ببرنامج "الصندوق الأسود" مساء اليوم المُذاع على قناة "القاهرة والناس"، قائلًا: "لا أرضى إذاعة ما يحدث بين أعضاء المكتب السياسي للحركة فلا تحدثوني عن عش دبابير معسكر الثورة".
ووجه رئيس تحرير موقع "البوابة نيوز" رسالة إلى من يهاجمه: "اعرف معدن من تهاجم يا غبي".
وردًا على تهديده بعد انفراده أمس بنشر مكالمات هاتفية بين منسق عام حركة شباب 6 أبريل السابق، أحمد ماهر، والقيادي بحركة شباب 6 أبريل محمد عادل، عرض رئيس تحرير موقع "البوابة نيوز"، فيديو له وهو بميدان التحرير من أعلى منصة يقول "إن قيادات الإخوان سيعودون للسجون مرة أخرى".
أوضح الكاتب الصحفي، عبدالرحيم علي، رئيس تحرير موقع "البوابة نيوز"، إنه قال للقيادي الإخواني خيرت الشاطر في عز سلطته "أنت غبي وكل تصرفاتك غبية وستهدد البلد".
وتابع "عبدالرحيم علي" قائلًا: "وقلت لمرسي أنت خائن في 6 /12 /2013 وذهبت للنائب العام 7/12/2013، وقلت للنائب العام رئيسك اللي عينك جاسوس وخرجت بعدها بكفالة".
واسترسل رئيس تحرير موقع "البوابة نيوز"، قائلًا: "تمت مهاجمة مكتبي ب 30 مسلحًا بالآلي وهذا لم يهز شعرة من جسمي، اعرفوا معدن الرجال الذي تهددوهم سنسير في الطريق الذي رسمناه لأنفسنا لا أحد يرسم لنا طريق ولا أحد يجرؤ أن يرسم لنا طريق وإلا كانوا رسموا لنا في عهد مرسي".
عرض الكاتب الصحفي عبدالرحيم علي، رئيس تحرير "البوابة نيوز"، تسجيلا لمكالمة تجمع أحمد ماهر، منسق حركة 6 إبريل، وأحد النشطاء السياسيين، وتدور حول ندوة في دولة الكويت، ويقول له الناشط إن الندوة بها جمع للتبرعات.
ويقنع الناشط ماهر خلال المكالمة بضرورة السفر مع الناشطين السياسيين وائل غنيم ومصطفى النجار، حتى يكون هناك طرفان فيما يخص التبرعات.
نص المكالمة
- ايوه
- آلو يا ماهر
- ايه الأخبار
- بقولك أنا عايزك في حاجة مهمة
- أيه؟
- ركز فيها معايا تمام
- معاك
- في مركز تريب "كلمني".. تمام
- آه
- مركز تدريب كبير.. هيعمل.....
- مصري ولا بره؟
- ليه مركز في مصر وأصله في الكويت
- آه
- هيعمل ندوة في الكويت يوم سبعة وتلاتين وتلاتة حلو
- ندوة في الكويت.. كام؟
- سبعة وتلاتين تلاااتة
- ايه سبعة وتلاتين تلاااتة ديه يعني؟
- آلو
- يعني أيه سبعة وتلاتين تلاااتة ديه؟
- يا بني يوم.. سبعة وعشرين تلاتة معلش
- سبعة وعشرين ااه.. ما انا استغربت سبعة وتلاتين دي
- سبعة وعشرين تلاتة المهم إنجز، دلوقتي لقيتهم بيكلموني عايزين رقم وائل غنيم، هما يعني شافوني في مصر النهارده، فجابو رقمي وقالولي عايزين وائل غنيم تمام
- اه
- فأنا قولتلهم اه ماشي وائل غنيم وكل حاجة بس في عبدالرحمن منصور كان معاه، اشتغل بردك في الصفحة فاهم ازاي، قالولي اه المركز معندوش مانع إنه يجيب حد تاني مش ايه مش مشكلة وكده، ف أي حد تاني إن شاء الله حتى وائل غنيم يرشحهولنا وكده، فأنا عارف أن عبدالرحمن منصور في التجنيد، تمام
- تمام
- قلتلهم بقولوكوا ايه، هي الندوة عن ايه؟، قالولي عن دور الميديا وكده واللي هي الفيسبوك والحاجات دي كلها في ايه في السياسة وكده، قولتلهم طب بصوا يا جماعة طالما هي كده، في مجموعة تانية اسمها 6 إبريل، ومنسق واحد شاب اسمه أحمد ماهر، وأول ناس استخدمت الفيسبوك وكده في حاجة حقيقية يوم إضراب 6 إبريل 2008، بالإضافة أن هما أول ناس عملوا افنت على الفيسبوك، واشتغلوا عليه، وهما اللي نسقوا يعني حكتلو القصة، قالى اه بجد والله، اهو هتتحشر هتتحشر ها يا أحمد
- أيوه ايوه
- المهم، فقالي ايه قالي طب ماشي طب والله إحنا ممكن نكلمهم ومعرفش ايه ويبقوااا لان خلي بالك كمان، هيبقى ندوة وفي ناس الكويت ومعرفش ايه، وااا ويعني هتبقى حاجة كويسة جدا فاهم.
- تمام
- وبيقولك في مصريين في الكويت اااا، احتمال يعني يدفعوا تبرعات وبتاع الله أعلم يعني، تمام، فالفكرة كلها قولتلهم لا ده أحمد ماهر وبتاع وانا ممكن أديك رقمه قالي خلاص ماشي اديني رقمه، بس خلي بالك يقى من حاجة أنا عايز اديك رقمه تتصل بيه تقولوا أنتوا مع وائل، ليه... لأن هو لما قالي ايه قالي بص هات رقم وائل وأنا هخلي وائل يرشحلي حد، مش هو بردك زميله مصطفى النجار، أنت فاهم،
- ايوه
- فيروح بقى وائل غنيم ومصطفى النجار فمش منطقي فيبقى أنت وهما وائل، فأنا عايز اديك رقم تليقونه دلوقتي وهديله رقمك، أنت تكلمه قوله استاذ أحمد حسين من مركز اكتب، أنا أحمد ماهر كذا كذا كذا، وإحنا عملنا كذا، ووو عندنا استعداد يعني نروح نبعت واحد مننا، سواء أنت بقى أو اي حد
- خلاص ماشي
- هااا، ها يا ابني عشان ديه حاجة جامدة جدا وهتبقى أصلا في الكويت كده وبتاع يومين وبتاع، مش عايز بقى وائل يروح وياخد معاه مصطفى النجار والجو ده انت فاهم.
- طيب هو عايز وائل شخصيًا ولا عايز الناس الاكفأ على النت ولا عايز ايه؟
- لا عايز وائل على أساس أن هو شهرة وبتاع، ف تبقى حاجة كويسة فاهم
- امممم
- ما انا قولتله.. قولتله يعم ده في ناس وبتاع، قالي لا عشان هما عايزين وائل عشان الشهرة وكده
- خلاص يعني مفيش مشكلة
- خلي بالك كمان بيقولي ايه، وفي مصريين هناك عايزين يدفعوا تبرعات لمعرفش ايه وايه، فقلت لا.. وائل غنيم ومصطفى النجار وتبرعات لا.. انت فاهم، فالمهم أنا هديك رقمه دلوقتي ماشي
- أوك رقمه كام
- استني
- كام
- 618
- اسمه ايه؟
- أحمد حسين
- حسين
- -اه
- أنا لما قولتله أحمد ماهر قالي اه انا قريت اسمه قبل كده كتير فاهم ازاي طب ادينا رقمه، فانا دلوقتي هبعتله رقمك بردك، بس ايه.. انا... بص انا عندي حركة صايعة هبعتله رقمك وأقوله خد منه من اح.. انا مش هديله أنا رقم وائل.
- تمام
- هقوله كلم أحمد ماهر وخد منه رقم وائل، بحيث نحسسه بردك أن أنت يعني أنت صاحب وائل يعني مش مش ضده فاهم،
- مفيش مشكلة ماشي ماشي
- بس بحيث مثلاااااا... لو في تبرعات في أي حاجة يبقى في طرفين موجودين، ماشي
- طيب
- اسمه أحمد حسين
- في حاجة تانية، كان في ااا، حد مش عارف مركز.. مش فاكر اسمه ايه، المعهد القومي الفرنسي أو حاجة زي كده يعني.
- امممم
- كانوا عايزين حد من الائتلاف، يسافر في النص التاني من مارس
- النص التاني من ايه
- مارس
- يسافر فين؟
- فرنسا
- فرنسا
- اه
- اممم
- - ندوة عن 25 يناير... وال.... اممم، أنت ايه رأيك في موضوع السفر دوت؟
- أنا معنديش مشكلة بس ااااااا.. اليه الاختيار، يعني أنت أنت بأديك أنت اللي تختار يعني
- هو.. اا..ارشحلهم كذا اسم من الائتلاف عموما يعني، بس الفكرة كلها
- ماشي معنديش مشكلة في السفر
- المشكلة فيها أن الندوة مش هتبقى يعني لقاء تليفزيوني زي زي زي مصر أو حاجة زي مصر، دول بيعصروا اللي ريحلهم، لسه كان في ناس رايحين من اليونان، قالوا هناك أحزاب يسارية وأحزاب اااا، يعني كل الأحزاب اللي هناك فمسكوهم غسلوهم هناك يعني فاهم
- لا.. معندناش مشكلة
- كل أدق التفاصيل في الحياة السياسية في مصر، وفاهمي الحياة السياسية في مصر أكتر من المصريين.
- اه طبعا ما هما لو أنت بتتكلم عن مركز أبحاث أكيد هيعملوا كده
- وفرنسا نفس الكلام برده، وكمان المركز نفسه محسوب هناك علي اليمين شوية
- امممم
- فيكون بيهمهم بقى ايه.. علاقة الشرق الأوسط واللي مش عارف ايه.. وأمريكا وفرنسا وحاجات زي إيران ودور مش عارف أيه، يعني
- لا لا معنديش مشكلة
- طيب اشطة
- ماشي، المهم أنا دلوقتي بص، أنا مش هبعتلوا رقم وائل، أنت معاك رقم وائل ولا ادهولك
- معايا رقم وائل اه
- خلاص أنا ابعتله أقوله أحمد ماهر اهه ده رقمه وهو هيديك رقم وائل هيظبطلك مع وائل بحي تروح، لان هو كمان عمال يقولي ايه ده في ناس مصريين كتير جدا عايزين يدفعوا تبرعات وكده، فأنت تظبط بقى الليلة معاهم.
- خلاص فل
- ماشي ياباشا سلام
- وقوله قوله بردك يا أحمد وعيه، قوله إحنا عملنا كده وعملنا كذا ماشي
- خلاص قشطة
- ماشي سلام سلام
وعلق الكاتب الصحفي" على الفيديو بقوله: "سلمولي على الثوار.. هل فعل ذلك جيفارا الذي مات وهو يحاول تحرير أمريكا اللاتينية، هل الثائر الأعظم ورفقاؤه أبوبكر وعلي كانوا هكذا؟".
وتابع قائلًا: "أرسلوا لعبدالناصر رشوة لم يطلبها.. بنى بها السد العالي".
واستنكر رئيس تحرير موقع "البوابة نيوز"، تعامل حركة شباب 6 أبريل مع المعهد الفرنسي المحسوب على اليمين الفرنسي وإسرائيل وأمريكا، موجهًا لهم رسالة: "ضعوا مصر في قلوبكم وليس في جيوبكم.. كما يفعل من يقتلون كل يوم ولا يسألون لماذا يموتون ولكنهم يعلمون إنهم يحمون الوطن".
أوضح الكاتب الصحفي، عبد الرحيم علي، رئيس تحرير موقع "البوابة نيوز" إنه يمتلك 5000 مكالمة مثل ما انفرد به بين منسق عام حركة شباب 6 أبريل السابق أحمد ماهر، والقيادي بالحركة محمد عادل وأعضاء المكتب السياسي للحركة.
وأشار "علي" خلال حلقته اليوم الاثنين ببرنامج "الصندوق الأسود" المُذاع الآن على قناة "القاهرةوالناس"، إلى أن أحد رجال مبارك دخل إلى حكومة عصام شرف، متسائلًا: "هل هذه أخلاق الثوار نعم هي ثورة ولكن هذا ليس سلوكها".
وعرض الكاتب الصحفي عبدالرحيم علي، تسجيلا لأحمد ماهر، مؤسس حركة 6 أبريل، مع أحد رجال الأعمال المصريين في لندن يدعى "عمرو حمزة"، يعرض عليه التمويل لتأسيس حزب سياسي، ويرد عليه ماهر بأنه سيدرس ما يحتاجه ويرسله له على الإيميل.
ويدور في الاتصال بين الطرفين
- إيه يا أبو حميد انت فين
- إزّي حضرتك عامل إيه
- انت عامل إيه
- تمام الحمد لله يا فندم ماشي الحال
- ربنا يكرمك يا رب إيه الأخبار يا أبو حميد
- الحمد لله الدنيا كويسة، قعدنا يوم الاااااا قعدنا أول إمبارح مع المجلس العسكري وفي شوية حاجات كانوا لطاف فيها، ووافقوا عليها بس مدوناش جدول معين زمني، وحاجة تانية قفشوا فيها خالص.
- وإيه الأخبار تاني
- لسه بنحاول نجمع وبنعمل اجتماعات يومية مع الناس في القاهرة والمحافظات، عملنا مجموعات كتير الفترة اللي فاتت دي في محافظات كتير يعني وشغالين وفي برضه كذا حد عرف برضه يتصرف في مقرات في كذا محافظة بحيث برضه يكون لينا مقر بقى بيافطة.
- تمام
- شغالين في قرار تأسيس جمعية دلوقتي مؤقتة لغاية ما نشوف موضوع الحزب ده، مش رافضينه بس لسه برضو عاوز ترتيبات تانية، هنبدأ نظبط قواعدنا وورقنا وكل حاجة لغاية ما نعرف ننطلق يعني لو عملنا حزب باسم فقط من غير ما يكون ليك قواعد ملوش لازمة.
- أهم حاجة انت موجود في الشارع.
- بالضبط إحنا لينا اسم كويس اسمنا الحمد لله 6 أبريل اسم عالمي معروف في دول كتير كمان واسم مؤثر وفي نفس الوقت لينا كمان قواعد بننميها بحيث لو جينا نتحول لحزب تبقى قواعدنا موجودة هنغير بس اليافطة مش أكتر من كده.
- أنا رأيي إن إنت تعمل خدمة للجماهير أكتر، إن انت تعمل خدمة للناس أفضل وبعدين من خلال الخدمة دي تتحول إلى حزب ده أحسن تفكير بس هي المشكلة كلها في الوقت، الوقت مش ساعفنا.
- الوقت مش ساعفنا خالص، وعايزين مجهود ضخم عشان نعرف نعمل حاجة عشان تعرف تجيب مقرات في كذا مكان وتجيب أجهزة وتجيب كراسي وتجيب وتجيب وتقابل ناس وتعمل برامج، وتدريب للناس اللي جاية وتشغلهم كمان عشان لو جم من غير ما تلاقي شغل ليهم في حاجة في خدمة أو تستغله مجهوده هيمشس يعني حاجة أأ
- طب قولي يا أحمد أنا من خلال مجموعة من الأصدقاء اللي هنا ممكن محتاج محتاج تمويل قد إيه بالنسبة ل عشان مقراتك.
- ع الأقل مثلا مقر في كل محافظة نبدأ بيه مثلا، كل اللي عندنا 10 محافظات، بلاش 10 محافظات خليهم 3 محافظات رئيسية يعني عندنا مجموعة كبيرة من
- اهتم أكتر بالمحافظات الفقيرة إن إنت تبقى متواجد فيها فاهم قصدي إيه وبعدين اخرج ع المحافظات التانية، يعني خش ع المحافظات اللي هما حتى الإخوان المسلمين التواجد بتاعهم فيها ضعيف.
- لينا في سينا مجموعة كبيرة، وفي العريش في مجموعة كبيرة كمان، وفي ناس بتساعد برضو في حاجات زي كده يعني.
- عمومًا هقولك على حاجة، أنا يعني في مجموعة من أصدقائنا هنا هو يعني مصريين عايشين في انجلترا على اتم استعداد أن هما يعني أمم أنا كنت قاعد واتكلمت معاهم وبتاع ومش عارف إيه، فبالعكس إحنا ممكن نعمل فندينج فانت، شوف أنت محتاج إيه وقد إيه ونبتدي نتكلم يعني.
- - تمام
- خلاص كلمني بس قولي إحنا محتاجين كذا، عشان نفتح كذا.
- هاعملك حاجة مبدئية كده هو، وابعتلك على الميل اللي بعتلك عليه قبل كده ولا اتغير؟
- اه هو نفس الميل
- خلاص أوكيه
- خلاص ابعتلي عن طريق البتاع، قعدتوا في الشقة ولا لسه؟
- اه النهاردة ظبطنا وجبنا شوية كراسي ودفعنا الكهربا ونضفناها.
- تمام تمام ربنا يكرمك يا أحمد، وكلمني على طول يا أحمد يعني لو عاوز أي حاجة.
- تمام إن شاء الله.
- خلاص يا حبيبي يلا على اتصال.
- إن شاء الله.
وعلق الكاتب الصحفي عبدالرحيم علي، رئيس تحرير موقع "البوابة نيوز" على الفيديو قائلًا: "هكذا كان يتعامل قيادات حركة شباب 6 أبريل مع الثورة هكذا يتعاملون مع الشعب المصري".
وكشف الكاتب الصحفي عبدالرحيم علي، رئيس تحرير موقع "البوابة نيوز" عن اسم رجل الأعمال الذي خاطب منسق عام حركة شباب 6 أبريل من لندن بخصوص توفير دعم له، في فيديو نشره خلال حلقته اليوم من برنامج "الصندوق الأسود".
وقال "علي" خلال حلقته: "كنت على عهد بعدم ذكر اسماء، ولكن طالبني الكثيرون بكشف بعض الأسماء ورجل الأعمال هو عمر حمزة النشرتي، الذي هرب من مصر عام 2008، ووصلت ديونه في التسوية ملياري جنيه، ورجع في مصر في مايو 2012 بعد نجاح الإخوان في البرلمان، وقرر دعم حملة مرسي طمعًا في تسوية، وأرجعه حسن مالك للبلاد، وحاول تسوية الديون لأصل المبلغ، لكنالإخوان لم يتمكنوا من إنهائها، وبعد 30 يونيه غادر هربًا ولم يقم بالتسوية.
وتابع رئيس تحرير "البوابة نيوز" مستنكرًا: "كيف يتعامل قيادات 6 أبريل مع هذا الرجل؟".
شدد الكاتب الصحفي عبد الرحيم علي، علي " مواصلته نشر مكالمات جديدة للمكتب السياسي لحركة شباب 6 أبريل، قائلًا: "سنواصل الحملة ولن يثنيا التهديد والوعيد، وكما يقولون دخولنا عش الدبابير، سنعرض مكالمات جديدة أهم مما سبق ونُشر، حتى نواصل تنظيف بلادنا من جميع الخونة والمتآمرين على ثورتي 25يناير و30 يونيو.
وتابع في ختام حلقته اليوم من برنامج "الصندوق الأسود" المٌذاع على قناة "القاهرة والناس"، قائلًا: "تحيا ثورتا 25 يناير و30 يوينو ويحيا ثوارهما وشهداؤهما الحقيقيون وليمت بغيظهم كل الحاقدين على مصر".