عبد الرحيم على في "الصندوق الأسود": الإخوان "خدوا الأوامر يِخلوا مصر دي أشلاء".. محافظو المعزول كان لهم دور في اقتحام السجون.. حماس تتستر على "محمود عزت" داخل غزة

قال الكاتب الصحفي، عبد الرحيم علي، رئيس مجلس إدارة وتحرير "البوابة نيوز"، خلال تقديمه برنامج "الصندوق الأسود"، "أمرك عجيب يالي صابغها هم.. هل ده عبط أيدلوجي ولا علم دفين؟.. ساكن مع المجرمين في فصول كتاب الدم.. تتآمروا على شعبكم، وتروعوا الآمنين!.. سبت الأصيلة ورحت تِلوف على أبوالدقن، وتمجدوا الكدابين".
وأضاف "علي"، خلال برنامجه المذاع على فضائية "العاصمة"، اليوم الإثنين: "كانت أوامر مين.. سيدكم هناك قال لكم دي في انتظار الدفع، بس اصمدوا، والحكاية هتنتهي في يومين.. هيأتوا نفسكم يا عبط.. وخلاص يقين أن قرب ليكم كرسي الحكم.. طلعتوا ولد الأبالسة جيوش يوم تلاتين".
وتابع: "الطبخة تمت هناك في مطبخ الأعداء، عملاء وجواسيس وقبيضة، وشباب خاينين، أخدوا الأوامر يخلوا مصر دي أشلاء، من بياعين النضال لبياعين الدين، كله صناعة أمريكاني والتكت مغلوطة".
وقال "علي": "إن التسريبات الأخيرة التي أذاعها لقيادات تنظيم الإخوان الإرهابي، أثبتت أن اعتصام "رابعة"، كان مسلحًا، مضيفًا: "سمعنا خلال التسريب الأخير، صفوت حجازي وهو يدعو حازم صلاح أبو إسماعيل، للقدوم إلى اعتصام "رابعة"، كما أكد أبو إسماعيل أنه لن يذهب إلى الاعتصام حتى يتأكد أنه حقيقي، ولن تتم اتفاقات حول تغيير الحكومة أو أي شيء من ذلك القبيل.
وتابع، "كما سمعنا خلال التسريبات تهديدات "حجازي" بقتل وذبح أي متظاهر يُهاجم القصر الجمهوري خلال ثورة 30 يونيو".
وأذاع رئيس مجلس إدارة وتحرير "البوابة نيوز"، مكالمة دارت بين كل من سعد الحسيني محافظ كفر الشيخ السابق، ومصطفى كامل عيسى محافظ المنيا السابق، خلال حكم المعزول مرسي، مشيرًا إلى أن المكالمة تظهر الترتيبات التي أعدها قيادات الإخوان لحشد المواطنين لعمل مسيرات ومظاهرات في المحافظات.
وجاء نص المكالمة كالآتي:
سعد الحسيني: طمنا عليك، وعلى المنيا، بلد الأبطال.
مصطفى كامل عيسى: المنيا زي الفل.. إحنا امبارح كنا عاملين يوم عالمي.. الحمد لله رب العالمين.
سعد الحسيني: الله.. الله أكبر.
مصطفى كامل عيسى: كان على المنصة جميع مُمثلي القوى المدنية، والقيت الكلمة بتاعة التحالف أنا.. وقبليها بيومين كان عندنا برضو مسيرة ضخمة، لفت الميادين كلها، كانت جايه من جميع المراكز والقرى.. لدرجة أن الناس كانوا بيقولوا، عايزين نقتحم المحافظة.. يعني إحنا لو عايزين ناخد المحافظة هناخدها.. مفيش أي قوة تقدر تقاومنا في المحافظة.
سعد الحسيني: لو ده حصل نسهر نتسحر مع بعض.
مصطفى كامل عيسى: الجمعة دي بإذن الله تعالى.
وقال على، "إن قيادي تنظيم الإخوان، سعد الحسيني محافظ كفرالشيخ، ومصطفى كامل عيسى محافظ المنيا، خلال حكم المعزول مرسي، كان لهما دور رئيسي في اقتحام السجون وأقسام الشرطة، وقتل الضباط، وإخراج الداخلية من الخدمة في جمعة 28 يناير 2011".
وأضاف، "أن تسريب مكالمة الحسيني مع مصطفى كامل عيسى، تُوضح المخطط الذي وضعه الإخوان بعد سيطرتهم على حكم مصر، وتوليهم مناصب المحافظين، وهو إخراج جهاز الشرطة من الخدمة، وإخراج المسجونين، وإطلاقهم في الشوارع، وصناعة الفوضى مرة أخرى داخل البلاد".
وقال، "إن القيادي الإخواني، جهاد الحداد، كان اللاعب الرئيسي في اعتصام "رابعة" المسلح، بعد اختفاء القيادات الكبرى، مثل المرشد محمد بديع، وصفوت حجازي".
وأضاف أن الحداد أجرى العديد من الاعتصامات بقوى داخلية وخارجية، من أجل صنع هالة إعلامية حول اعتصام "رابعة"، مشيرًا إلى اتصاله بمحمود الإبياري، مسئول الإخوان في العاصمة البريطانية لندن، إضافة إلى تواصله مع أسامة، نجل المعزول مرسي، مؤكدًا على أن الإخوان كان هدفهم الفوضى، مثلما أحدثوها من قبل في يوم 28 يناير 2011، وإسقاط الدولة المصرية من أجل التفاوض على السلطة أو دخول قوات أجنبية إلى مصر.
وأكد "على" أن حركة حماس الإرهابية تتستر على القيادي الإخواني محمود عزت، داخل قطاع غزة، والقائم بأعمال المرشد العام للجماعة الإرهابية، مضيفًا أن "حماس" أيضًا تقتل جنود الجيش المصري على الحدود، وداخل سيناء، ثم يتحدثون عن عدم التدخل في الشأن المصري.
وأذاع مكالمة مسجلة بين "جهاد الحداد"، المتحدث الرسمي باسم تنظيم الإخوان، وأحد الأشخاص، يتحدث عن تحركات جماعة الإخوان، في المرحلة بعد فض اعتصام رابعة العدوية، وعن الأموال وكيفية استغلال التصوير، والكاميرات في الترويج لهم، كما يقدم نصائح للشخص المجهول، عن طريقة الدخول على الإنترنت، بطريقة خفية، حتى لا يتم رصدهم من قبل الشرطة.
وجاء نص المكالمة كالتالي:
الحداد: سلام عليكو
***: عليكم السلام
الحداد: أيوة ياسامح.. أيوة يا حبيبي بقولك إيه، خلي "عُمر" يشتغل دلوقتي، باسم منسق إعلامي التحالف المُناهض للانقلاب.. آه مش من تليفونه الرئيسي.. من تليفون يتكلم منه فترة.. ويقوم جي راميه، أول ناس يكلمهم بس يكلم المركز.. أنت عارف رقم "سندس" اللي رقم تليفون "يحيي" اللي بنحور عليه ده مش كده.
***: أممم.. آه
الحداد: حلو.. هو ده.. يعني كلموها.. وقولوها دلوقتي.. إن إحنا اتفقنا مع "جهاد" أن عُمر بس هو اللي يستقبل المكالمات وكدا.. وتأكد أن عُمر دايمًا "بريفد".. يعني اتأكد أن عُمر عارف اللي بيحصل.. بس يعني أنا قلقان إنه يتكلم بالحالة الثورية أكثر منه الكلام السياسي.. لأن أي كلمة دلوقتي هتأثر علينا.. فخلي عُمر دلوقتي مايتكلمش عن مواقف يتكلم عن حقائق.. أنا في المكان الفلاني عدد الجثث اللي أحصيناها كذا.. حاليًا الوضع كذا.. يعني فاهم قصدي إيه
***: آه
الحداد: ماشي
***: طيب حاضر
الحداد: إحنا دلوقتي التغطية العالمية كويسة جدًا.. الحاجة التانية بس أنت التليفون اللي حصل فيه عملته "وايت" كله
***: أنا عملته "وايت".. وعملت ال"الآير موود".
الحداد: طيب
***: وقفلته.. هو والتليفون بتاع دكتور "أسامة".. وسبته عند الراجل اللي إحنا كنا عنده
الحداد: طيب خلاص ماشي.. لو عندك تواصل مع الراجل اللي إحنا عنده ده.. قوله خليه معاه طبعًا، أنا كنت بفضل يكون معاك.. وأنت تجيبهولي.. بس خلاص.. يعينو هو معاه.. قولوا خليه معاه.. لأني مش عاوزه يقرب مننا هنا
***: طيب
الحداد: لأن هو لو حتى مقفول برده.. ممكن الشبكة تتلقط
**: طيب
خلاص ااا.. طيب أنتو دلوقتي.. أنتو متأمنين مش كدا
***: آه إحنا في شقة "عمر".. فموضوع التأمين ده يعني مهواش
الحداد: طيب خلاص دي على الأقل لايعني إن شاء الله مفيهاش حاجة.. يعني المهم المهم التليفونات اللي كانت بتبقي "أكتيف" متبقاش "أكتيف دلوقتي".. أنتو كام واحد.
***: اااااا.. هاتكلم في خمستاشر
الحداد: طيب كويس.. أنا هبعتلك دلوقتي الهيكل اللي إحنا ممكن على أساسه نشتغل طلعتوا حاجة من اللل الأجهزة.. اللي كانت موجودة جوا تبعنا.
***: آه فيه هارد كانت كاميرات البث.. آه الهارد بتاع كاميرات المراقبة
الحداد: آه
***: موجود معانا.. بس فيه مشكلة تقنية كدا بنحاول نحلها.. وفيه حد هيروح دلوقتي يجمع الهاردات.. زي ما كنت بتخطط بالظبط
الحداد: طيب أي هارد فيه مشكلة سيبهولي.. حطهولي على جنب وسيبهولي.. أنا بعرف أفك الحاجات دي
الحداد: آه.. اللهم صل على سيدنا محمد.. أيه تاني الكاميرات.. مفيش حاجة عرفتوا تجيبوها منها.. ولا من الطيارات
***: لالا.. الطيارات لا
الحداد: الطيارات الأربعة راحوا مننا
***: تقريبًا فيه 2 منهم جاهزين في أمريكا.. مستنين بس يوصلوا في أي وقت
الحداد: آه.. وكان فيه 2 في شنطة العربية بتاعة "عمر"
***: شنطة العربية بتاعة مين.. عمر؟
الحداد: آه
***: مفيش حاجة اتقالت يا بشمهندس
الحداد: فى كام متساب هناك.. إن لله وإن إليه راجعون.
الحداد: إن لله وإنه إليه راجعون.. طيب طيب.ز يعني خلاص هنحتاج نصرف تاني.. إحنا بقي صرف محترم
الحداد: الطيارات.. الكاميرات.. الجو بره
***: الجو بردو معانا معانا.. الأتنين معانا.. بتاعة حضرتك.. وفيه واحدة مع "صلاح"
الحداد: حلو الأتنين معانا.. بحاجتهم كلهم؟
***: مش حاجتهم الكاميرا نفسها
الحداد: الكاميرا نفسها بس
***: آه عمومًا إحنا معانا ما يقرب من 280 ألف
الحداد: دي كانت موجودة هناك برضه.. كانت متسابة هناك
***: لا لا.. دي كانت فلوس.. ده إجمالي اللي موجود مع ال 15 واحد اللي معانا كل واحد في جيبه عشرة مثلًا.. ولا حاجة.. وفيه 20 ألف دولار و45 ألف مصري كنا سايبنهم في بيت "عمر".. بس الإجمالي معانًا تقريبًا في حدود 280 ألف هنصرف منهم على الحاجات التقنية
الحداد: آه بالظبط يعني ركز في دي.. لأن دي الحاجة اللي الباور اللي إحنا لو زودنا منها هنشتغل كويس
الحداد: طيب بص يا حبيبي.. هقولك على حاجة تانية كمان.. حد فيكم معاه "كيردت كارد"
***: هشوف.. أكيد "عمر" معاه
الحداد: طيب.. فيه "ويب سايت" اسمها "بريفت إنترنت براوزينج"
***: امممم
الحداد: خشوا عليها.. خلي "عمر" يشتري منها أكونت ل 5 أجهزة ولا حاجة.. ال5 أجهزة دول بس اللي يخشوا على النت، ودي بتعمل حاجة اسمها "في تي إن "، "ففيرتشوال برايفت نت ورك".
***: امممم
الحداد: يعني أحسن حاجة أن جهاز واحد هو اللي يخش مثلًا على ال"في تي أن".. ده يروح جاي موصل "بانال" على حاجة برة مصر.. وبعدين كلكوا تتشغلوا من "البانال" ده.. ميزته أن ولا حاجة م الحاجات اللي أنتوا تشتغلوا فيها بتبقي ملقوطة جوه مصر.. لأن هو لو مصر وعملت أي بوست عالفيس بوك.. ولا نزلت على تويتر.. ولا أي حاجة من الحاجات دي كلها.. هيطلعوا المكان.. هيطلع
***: يعني.. ماشي حاضر.. أنا هابلغ "عمر" بالكلام ده وهخليه يكلم حضرتك تاني.
الحداد: طيب هي "الويب سايت.. الويب سايت" بيظهر العملية كلها اسمها "برايفت إنترنت براوزينج".
***: ماشي خلاص
الحداد: خلاص.
***: ماشي خلاص حاضر.
الحداد: ماشي يا حبيبي خلي بالك من نفسك.. سلام.
***: سلام.

كما أذاع، تسريبًا هاتفيًا آخر، بين سعد الحسيني محافظ كفرالشيخ في عهد الإخوان، ومحمود الإبياري مسئول الجماعة بلندن، حول تكليف "محمود عزت" يكون القائم بأعمال مرشد الجماعة، عقب القبض على مرشد الإخوان محمد بديع، وجاءت نص المكالمة كالتالي:
سعد الحسيني: سلام عليكو.
محمود الإبياري: سلام عليكم يا دكتور.
سعد الحسيني: الله يكرمك يا أخي.
محمود الإبياري: هو دلوقتي النقطة الأولى بالنسبة لموضوع الوالد يعني فهو الموضوع حقيقي يعني؟
سعد الحسيني: آه نعم ممم آه آه.
محمود الإبياري: فهو دلوقتي المفروض طبعًا في خبر طلع كده على الجزيرة وعلى بعض الحاجات قال إن أستاذ محمود عزت مرشد مؤقت وخلافه، دي إحنا لا علم لنا بيها، يعني دي ممكن يكون حد من ال..
سعد الحسيني: لكن هل مناسب نفيه ولا نتركهم كده؟
محمود الإبياري: لا لا أنا شايف حضرتك دلوقتي أنه شيء طبيعي دلوقتي، يعني ده عشان برة لازم حضرتك ترتبوا مين القائم بأعمال المرشد.. واخد بال حضرتك.. وتعلنوا عنه.
سعد الحسيني: طيب هو كان الدكتور محمود اتكلم في النقطة اللي اتكلمت فيها دي بس.

وأذاع أيضًا، تسريبًا هاتفيًا بين جهاد الحداد القيادي الإخواني، وأسامة نجل الرئيس المعزول محمد مرسي، حول فض اعتصام رابعة والنهضة، وجاء نص المكالمة كالتالي:
أسامة مرسي: إيه يا جهاد؟
جهاد الحداد: إيه يا حبيبي؟
أسامة مرسي: فيه تفاصيل طيب دلوقتي؟
جهاد الحداد: مافيش خلاص.. هما سيطروا تقريبًا على الميدان كله ومات 2600 واحد تقريبًا يعني.
أسامة مرسي: اعتقلوا ناس كتير ولا إيه؟
جهاد الحداد: آه اعتقلوا كتير أوي.. آلافات.
أسامة مرسي: اعتقلوا القيادات؟
جهاد الحداد: ماعندناش تفاصيل.. مش عارفين نوصل لهم لحد دلوقتي.
أسامة مرسي: ماعندناش "بلان B" ولا حاجة؟
جهاد الحداد: كان فيه "بلان B".. بس اللي حصل في مصطفى محمود إنهم قتلوا 50 واحد ف"بلان B" اتلغت.
أسامة مرسي: "بلان B" كمان اتلغت؟!
جهاد الحداد: آه.
أسامه مرسي: تمام.. مافيش رؤية يعني للي هيحصل بكرة؟
جهاد الحداد: لا لسه مافيش حاجة.