آخر كلام

الأسطي صلاح

يا أستاذ ليه ما تكتبوش في الصحافة عن المشاكل اللي بجد بدل الغرقان في كلام ما يحلش حاجة في المستقبل، ممكن تكونوا شايفنا مش مهمين بس إحنا اللي مدورين الدنيا، تصور بقيت أدور وراء أبناء البوابين في المنطقة أستلمهم أطفالا يتعلموا بسرعة ويتشربوا الصنعة بدري ولما يكبروا وقبل ما يروحوا الجيش أشجعهم يفتحوا ورش خاصة بهم علشان يأمنوا مستقبلهم ويحافظوا علي مستقبل الصنعة يقولك لازم يتعلم في المدارس ويبقي مهم ويتجند فترة بسيطة ما أنا اتجندت 3 سنوات لأن أبويا أخذني لورشة ميكانيكا سن 8 سنوات وفي سن 17 كان عندي ورشتي الخاصة وفي الجيش طلبونا في يوم وقالوا الصنايعي اللي واثق من نفسه يقف في طابور امتحان جامد عملي ونظري والناجح يعفي 6 أشهر وأصلحت دبابة ورديت علي كل الأسئلة الفنية لصنعتي ولغاية دلوقت معلق شهادة الإعفاء فخرا لشطارتي من المؤسسة المحترمة، وطول عمري عندي صبيان أشربهم الصنعة والغريب أسكنه في الورشة وأساعدهم في ورشهم، دلوقت يقولك مش ها يبقي الأسطي بلية طيب فيه كام واحد بيتخرج من المدارس والجامعة كل سنة مهارتهم إيه وها نبقي كلنا دكاترة ومهندسين ولا كلنا محتاجين للصنايعية دلوقتي كل الأسطوات اللي باتعامل معاهم ما عندهمش صنايعي يشرب المهنة ولا يناوله مفك، كل الصبيان ركبوا توك توك أربح وأسهل.. وتحتد نبرة الأسطي صلاح.. والله يا أستاذ محمد كلها كام سنة ولا ها تلقي ميكانيكي لعربيتك ولا سباك للبيت ولا حتي حلاق لشعرك.. ده ينفع!