اخبار مصر فجرت إقالة الدكتور خالد علم الدين من منصبه، ثم استقالة الدكتور باسم الزرقا القيادى بحزب النور من مؤسسة الرئاسة، سيلا من التعليقات الساخرة والنكات على صفحات التواصل الاجتماعى "فيس بوك" و"تويتر" تحت عنوان "اللهم اضرب الإخوان بالسلفيين وأخرجنا منهم مسلمين". وكانت أبرز التعليقات للكاتب الساخر بلال فضل، الذى بدأ رد فعله بمطالبة الرئيس مرسى برد الفلوس اللى خدها عن وظيفته كرئيس لخزينة الدولة، لأنه ما بيشوفش شغله ولا بيقابل مستشاريه، مضيفا "أنا خايف أوى على الأخ المناضل نادر بكار" قائلا له: "خلى بالك من نفسك يا أخ نادر.. الإخوان غدارين أوى أوى أوى..استودعتك عند ربنا يا نادر اللهم احفظه لمصر"، و"ربك بيسلط دقون على دقون"، وخناقة فى المشروع الإسلامى على لم الأجرة، كما طالب الإخوة فى جماعة الإخوان وحزب النور بنبذ العنف والاحتكام إلى أعظم دساتير العالم، معلقا "خربتوها وبتتخانقوا على تلها". وحذر فضل من خلال تعليقاته، الإخوة فى حزب النور من التطاول على السيد الرئيس محمد مرسى لأنه منحة من الله ولغاية ما نرجعها ارفعوا ألسنتكم عن الرئيس المؤمن، قائلا بكرة يطلع شيخ يقول يا إخوة ده والله شيطان شيعى اسمه أحمدى نجاد دخل ما بيننا، و"انبذوا الشيعة وتعالوا نخرب الوطن سويا"، و"هتتصالحوا بكره لما المصالح تتصالح بس فى ناس هتتعلم إنكو بتوع مصالح رخيصة وتبيعوا المبادئ عشان كراسى زيكو زى غيركوا مافرقتوش إلا بالدقون". كما علق فضل، "شيل يا بنى أسطوانات العمل الإسلامى المشترك وانزل لى بأسطوانات حزب النور مخترق من أمن الدولة وضرورة تمايز الصف الإسلامى"، وأن حال مصر سيتغير للأفضل لو حدث تبادل للمواقع بين الدكتورة باكينام الشرقاوى مستشارة محمد مرسى والشيف شربينى طباخ قناة الحياة، متسائلا عن شعارات "هى لله هى لله مش للمنصب أو للجاه" التى كان يطلقها الإسلاميون من قبل، قائلا: "بتشدوا دقون بعض صراعا على بلد حالتها بالبلا أمال لو كانت بخيرها كنتو عملتو إيه فى بعض؟ ودشن النشطاء هاشتاج عبر "تويتر" تحت عنوان "#النور_vs_الإخوان" أعربوا خلاله عن فرحتهم بالمعركة بين الإخوان والسلفيين لأنها أخرجت تجارة الدين من المعادلة، مطلقين تعليقات ساخرة من بينها "دلوقتى بيقطعوا فى بعض سياسيا بكرة يتخانقوا على مين دقنه أطول"، الهيئة الرئاسية للسينما تقدم "الإخوان_VS_النور" أقوى الأفلام المسيئة للإسلام، و"يا داخل بين الأفعى وصاحبتها ما ينوبك إلا لسعتها"، "وفى النهاية أحب أقول للإخوان والسلفيين...طير إنت". كما علق النشطاء على تصريح خالد علم الدين بأنه لم يعين أحدا من عائلته ب"الكلام ليكى يا جارة"، وسيقاتل الإخوان حتى آخر سلفى، و"ماشوفوهومش وهم بيسرقوا..شافوهم وهم بيتقاسموا"، متسائلين عبر تعليقاتهم "اللى عايز يدخل الجنة فى الانتخابات الجاية ينتخب مين فيكوا؟ ولا هتقسموها دى كمان وتعملوا حدود وتأشيرات؟". كما رأى النشطاء أن الانتخابات هى السبب الرئيسى فى المعركة بين الجانبين قائلين، "الانتخابات بتعمل أكتر من كده... والإخوان بيحاولوا يوقعوا حزب النور قدام السلفيين وبيحاولوا يصعدوا الجماعة الإسلامية وحزب الوطن، و"حزب النور علّم على الإخوان لأنهم طماعين... ودا درس للجميع إن الإخوان غدارين، ومن الممتع أن الحكومة والسياسيين المصريين بيفضحوا بعض وينشروا غسيلهم اللى مش نضيف قدام الناس وعلى الهوا عادى يعنى".