اخبار الفنانين : الراقصة سما المصري تكشف حقيقة قناة "فلول" والعملاء والنشطاء السياسيين

على كلمات أغنية "بانوا" للفنانة الراحلة سعاد حسني، تعرض قناة فلول، عددا من اللقطات لأعضاء جماعة الإخوان المسلمين بصورة ساخرة، انطلقت قناة "فلول" قبل أيام من ذكرى اندلاع ثورة 25 يناير، رداً على قناة الإخوان التي انطلقت منذ شهر تقريبا والتي تحمل اسم "رابعة".
من جانبها، قالت الفنانة الاستعراضية سما المصري وهى صاحبة القناة، إن وجودها الآن هو دور وطني يجب أن تقوم به .
وأضافت الفنانة الاستعراضية سما المصري :"قررت أعمل القناة دي بعد الإخوان ما عملوا قناة رابعة، الحقيقة هما استفزوني إزاي يعملوا قناة ويحرقوا دم المصريين لازم إحنا كمان نعمل قناة ونحرق دمهم عشان كده اخترت اسم "فلول" وهقدم على القناة أغاني بتسخر من الإخوان وتحرق دمهم، مؤكدة: "مش هحرق دم الإخوان بس لا وكمان هدفي أكشف كل العملاء والنشطاء السياسيين اللي اتأكدنا إنهم ضد البلد وباعوها مقابل فلوس′′.
وعن هدف اختيار اسم "فلول" تحديدا، وهل إذا كانت تقصد به فلول الحزب الوطني، أكدت سما "لا أنا مقصدتش خالص أتكلم عليهم دول بالنسبة للإخوان ملايكة بجناحات مع إني كنت مع ثورة يناير بس لما شفت الإخوان في الحكم كنت أول الناس اللي هاجتمهم وماخفتش من حاجة، لأنهم كانوا فشلة وكذابين ومنافقين، ومصر كانت مش مهم عندهم خالص، المهم عندهم أنهم وصلوا للحكم عشان يقتلوا ويسرقوا باسم الدين.
تستكمل سما "اخترت اسم "فلول" بعد ما كنت هختار "30 يونيه" بس عشان محدش يقول إن ثورة "30 يونيه" بتاعة الرقاصين".
وأوضحت "أنا صاحبة هذه القناة أنا وفريق عملي ومفيش رجل أعمال بيديني مليم عشان القناة "فلول" ديه بتعبر عني وأنا بمولها لأنها بتعرض اللي عايزة أقوله بمزاجي من غير ما حد يقولي ما ينفعش".
وعن علاقتها بالسياسة تقول سما "أنا من حقى أعترض على أى حاجة، ومش ههاجم الإخوان بس، أنا كمان هعمل أغنية هنتقد فيها حكومة الببلاوي، أنا ما كنش ليا في السياسة بس الفضل للإخوان".
وعن طبيعة البرامج التى ستقدمها، قالت إنها ستكون برامج ساخرة تتنقد عددا من الشخصيات مع أغنية ساخرة عن كل شخصية في كل حلقة يتم تقديمها ومن بين هذه البرامج " الجيبة ضيقة" و"بانوا".