حسين لبيب يحسم 3 صفقات ويكشف موقف صفقة الموسم ومصير ثنائي بيراميدز والنقاز ويؤكد: رحيل حارس الزمالك والتجديد ل 9 لاعبين

تحدث حسين لبيب، رئيس اللجنة المكلفة بإدارة شئون نادي الزمالك، بصفة مؤقتة، عن كواليس الفترة الأخيرة قبل حصد الزمالك للقب الدوري، إلى جانب الحديث عن مستقبل الفريق.

وكشف لبيب في تصريحات تليفزيونية لقناة الزمالك، موقف كل اللاعبين من حيث البقاء والتجديد أو الاستمرار والرحيل.
وقال لبيب أن المغربي أشرف بن شرقي هو لاعب مثل أي لاعب آخر، وليس مميز عن زملائه مشيرا إلى أن هناك 9 لاعبين بالفريق مطلوب التجديد لهم.
وتابع: "مفيش حاجه اسمها النادي محتاجله اكتر احنا كل اللاعبين مهمين عندنا ، احنا خلصنا مع الكابتن اشرف بن شرقي كل حاجه والاختلاف بس على نقطتين". وأكمل : "هنقعد مع كابتن اشرف بعد الاحتفال بالدوري واعتقد الاختلاف والتجديد هيخلص في نفس القعده دي".
وأضاف لبيب: "الجمهور كان بيتكلم على الصفقات واحنا لسه مستمرين في الدوري عشان خايفين على الموسم الجديد ، طيب ما انا لسه بنافس على السيزون ده يبقي عندنا دوري وبعدين نشوف التدعيمات والحمد لله بقا عندنا دوري".
وواصل: "الزمالك عنده ذخيره محترمه وعندنا 2 من هدافين الدوري مصطفى فتحي وعمر السعيد وبامبو وكمان اوناجم وعدد كبير من الناشئين، ومعتقدش ان اوناجم قال مش عاوز يرجع وهو مقالش كده وبقولها تاني اي لعيب مش عاوز يلعب للزمالك هو الخسران لان الزمالك اكبر من اي حد ومن اي لاعب، وكل المعارين اتبعتلهم جواب انهم يرجعوا بلا استثناء.
وعن صفقات الزمالك، أكد لبيب أن الفرنسي باتريس كارتيرون طلب ضم 3 صفقات في مراكز الدفاع وخط الوسط ومهاجم، مشيرًا إلى أن المدرب الفرنسي لم يشترط أن يكونوا محترفين، وأكد لبيب أن الثلاث صفقات تم الانتهاء منها بالفعل على أن ينضموا للزمالك عقب نهاية الموسم الجاري.
وحول حراس الزمالك، قال لبيب: "محمد صبحي راجع للزمالك وفي واحد من الحراس الحاليين ماشي رسمي من النادي ومش هقول اسماء حاليا، وفي اجرائات عقابية في كل الالعاب بالنسبة لجنش وهو من كباتن الفريق ولكنه اخطئ واخطئ معناها انه يتعاقب وزي ما هو بياخد حقه يبقى لازم النادي كمان ياخد حقه لما هو يغلط والكلام ده مش مرتبط بالموسم اللي جاي وبعد الموسم ما يخلص هنشوف كمجلس ادارة ايه العقاب اللي هنشوفه ليه وهي دي مبادئ النادي واللي اتعلمناها منه" وتابع: "أما بخصوص رحيل الحراس، سؤال صعب اني ارد على كام حارس هيمشي لان عندنا 5 حراس حاليا وده عدد كبير لنادي واحد".
وأكد: "عقد مصطفى محمد لم يتم توثيقه ولكن مصطفى محمد من ابناء النادي وفي تواصل معاه ودي مفيهاش مشكله حاليا ، بالنسبه لجالاتاسراي في بند شراء هيردوا علينا في ديسمبر وده شئ مشابه لسيف الجزيري واحنا كزمالك فعلنا البند ده خلاص، وحتى الان جالاتا سراي لم يتواصل معنا من اجل الشراء وفي حال شراء العقد ستصلنا الاموال في شهر 6 القادم".
واشار: "تفعيل بند شراء الجزيري تم والاموال هيتم دفعها على فترات ، رمضان صبحي وعبد الله السعيد لعيبه مهمه جدا وكمشجع زملكاوي اتمناهم لانهم مهمين لاي فريق وسن عبد الله مش عائق واعتقد قدامه سنتين او 3 كمان ولكن مفيش معاهم اي مفاوضات رسميه، وعن نفسي مقعدتش مع بيراميدز واتكلمنا نقعد مره او اتنين لكن مفيش جلسه رسميه حتى الان".
وقال: "مسأله التجديد للاعبين بنعملها بمهاره لان في 3 مراحل اولهم المدير الفني ثم لجنه الفنيه ثم الاداره لذلك اللاعب مبيعرفش مين صاحب قرار التجديد او جي من عند مين وده بيساعدنا جدا في مسأله التجديد مع لاعبين زي زيزو والونش او شراء عقد الجزيري"
واوضح: "حمدي النقاز في تضارب اراء عليه ونبص للمسأله من كذا جانب لذلك لم نحسم القرار النهائي في مسأله عوده النقاز وثقوا تماما فينا ان اي قرار هيتم اتخاذه هيبقى لمصلحه الزمالك فقط، وحمدي النقاز حاليا في النص لا قريب ولا بعيد و حمزه المثلوثي ادائه ارتفع بعد المعسكر وساهم دفاعيا وهجوميا في أهداف كثيره.
واختتم رئيس الزمالك حديثه متحدثًا عن صفقة الموسم حسام حسن مهاجم سموحة وقال: "حسام حسن نجم كبير ولكن نادي الزمالك عنده لاعبين مميزين في المركز ده ولكن هو حاليا مش في اختياراتنا وحاليا مرتبات اللاعبين مقسمه لفئات وكان هناك فروقات كبيره جدا بين اللاعبين لذلك حاولنا تقليل الفرق بينهم".