اخبار الزمالك يحاور فلفل .. فريق القدم زود الضغط علينا وثقافة اليد في الزمالك مختلفة وهدفنا كأس مصر .. محمد علي اخويا وحسين زكي قالنا: "انسوا ماتش التعادل"

ساهم محمود خليل "فلفل" حارس فريق يد الزمالك في تتويج الفريق بلقب الدوري هذا الموسم بعد الفوز على الأهلي في مباراة فاصلة بنتيجة 18-17.
فلفل استطاع التصدي لرمية جزائية في الدقائق الأخيرة من عمر اللقاء الفاصل كانت من الممكن أن تمنح الأهلي التعادل لذلك كان فلفل له دورا هاما في الحفاظ على تقدم الزمالك.
موقع «أخبار الزمالك» في حوار خاص مع فلفل الذي تحدث عن التتويج بالدوري هذا الموسم وكيف أثرت هزيمة فريق القدم من الأهلي على فريق يد الزمالك فضلا عن طموحات الفترة المقبلة.
- في البداية حدثنا عن صعوبة هذا الموسم في ظل الأزمات الإدارية التي تواجه فريق اليد وتأخر بعض المستحقات؟
الموسم ده عندنا مشاكل كتير ولكن بننسى أي أزمة ومشكلة بمجرد نزولنا للملعب عشان نسعد جمهور الزمالك وهذا سبب النجاح رغم الازمات.

- حدثنا عن صعوبة التتويج بالدوري هذا الموسم وهل الزمالك تعرض لظلم تحكيمي في أول لقاء ضد الأهلي؟
الدوري هذا الموسم كان صعب للغاية ولكن الحمد لله ربنا كرمنا وحققنا اللقب في النهاية، كورة لوكا وهدفه في الأهلي اللي تم إلغائه كان غريب علينا كلنا ولكن الحمد لله ربنا عوضنا في الماتش الفاصل وكسبنا اللقب.


- حدثنا عن علاقتك بمحمد علي؟
محمد علي اخويا وصاحبي وحبيبي كلنا بنثق في بعض وبندعم بعض ومعانا هشام السبكي أي حد بينزل الملعب بنبقى واثقين فيه.
- ايه اللي قالوا حسين زكي للاعبين بعد التعادل في المباراة الأولى؟
كباتن الفريق الكبار والمدير الفني كابتن حسين زكي قالولنا ننسى الماتش ده وهو ماتش وفات وانتهى والماتش الفاصل مفيهوش تعادل ولازم نكسب ونفرح الجمهور والحمد لله ربنا كرمنا.

- هل خسارة فريق القدم قبل اللقاء الفاصل بيوم أثرت عليكوا؟
خسارة فريق القدم خلى الكل يركز معانا ويطالبنا بالفوز والتعويض وده زود الضغط علينا بس خلانا نتحمل المسؤولية والحمد لله قدرنا نعوض.

- كلمنا عن لحظات التصدي للرمية الجزائية؟
الحمد لله كنت واثق في ربنا وفي نفسي وقبل أي ماتش بحضر سيناريوهات ليا هنزل امتى وهيكون دوري ايه وربنا كرمني وتصديت لرمية جزائية مهمة.
- ايه سر تفوق الزمالك على الأهلي دايما في اليد؟
ثقافة نادي الزمالك في كرة اليد مختلفة ودايما بنلعب على الفوز لا بديل له وكلنا على قلب رجل واحد واثقين في بعض وده بيكون سبب النجاح بعد ربنا.
- رسالة لجمهور الزمالك؟
مستنيين دعمكم الفترة الجاية وان شاء الله هنفرحكوا اكتر بمزيد من البطولات وهدفنا حصد كأس مصر في الوقت الحالي.