عمر كمال عن نجوم رفضوا التعاون معه: هثبت أنهم غلط وأني استحق

كشف المطرب عمر كمال عن تفاصيل ألبومه الجديد والذي يحمل إسم "عمر كمال الرهان كسبان"، وأوضح عمر كمال قائلاً: "كنت محظوظ أني تعاونت مع ناس لها اسمها ونجاحها الكبير زي تامر حسين وعزيز الشافعي ومدين ومصطفى العسال وتوما ورامي جمال.. ناس كتير جدا الحمد لله ربنا كرمني وحققت حلمي أني اشتغلت معاهم".
وتابع عمر كمال قائلاً: "لما نزلت صوري مع صناع ألبومي الجديد الناس قالت سقطة في تاريخهم ليه مش أنا بني آدم ومن حقي أجرب" مضيفا: "دي ناس سوية وشبعانة شهرة ونجاح وفلوس مفيش أي حاجة تجبرهم يشتغلوا معايا إلا لو شايفين فيا حاجة كويسة".
وتابع عمر كمال خلال لقائه مع «et بالعربي» كاشفا عن نجوم رفضوا التعاون معه قائلاً: "في نجوم كنت بطمح أني أعمل معاهم دويتوهات وشبه الاتفاق حصل وبعد كده رفضوا.. أنا مبسوط وده إداني تحدي أكبر وهثبت لهم أنهم على غلط وأني استحق".
وعن خروجه عن سياق أغاني المهرجانات في ألبومه الجديد علق عمر كمال قائلاً: "ده كان لوني الأساسي من البداية زمان كنت بغني للغربة وبغني لأبويا وكان عندي تجارب كتير في الأول ولكن لم تحقق النجاح اللي كنت منتظره".
واختتم عمر كمال حديثه قائلاً: "ربنا كرمني بفرصة كويسة أني أدخل من الباب الكبير لعالم البوب وده هيتنفذ بشكل رائع فانتهزت الفرصة وأخدتها".
وكان عمر كمال حرص مؤخرًا على توجية رسالة مؤثرة للنجم الكبير محمد فؤاد كاشفاً فيها عن قصة إعجاب استمرت لأكثر من ثلاثين عاماً، وذلك عبر صفحته الشخصية موقع التواصل الإجتماعي "فيس بوك".
وكتب عمركمال قائلاً: "أنت أستاذي وحبيبي.. وأنا مش أنجح منك على اليوتيوب ولا أنجح منك في أي حتة، أنا مجيش أغنية جوه ألبوم من ألبوماتك أنت الوحيد اللى عارف أنا بحبك وبحترمك إزاي".
وأضاف: "عندى 36 سنة، منهم 30 سنة بحبك وبلف وراك حفلاتك في بلاد ربنا"، قائلا: "وكنت فعلا بروحلك عند الاستديو وبيتك وأنا سنى 14 سنة".
وتابع عمر كمال: "كنت استنى لحد الفجر عند محلات الكاسيت استنى شريطك ينزل عشان اشترى نسخة شريطك الماستر اللى محفور عليه اسم شركة الإنتاج عشان أحس إنى ساهمت في نجاحك في كتر المبيعات".
واختتم عمر كمال حديثه قائلاً: "صوتك كان بياخدلي حقي من الدنيا.. كان بياخدلي حقي من اللى سابتني.. وكان ونسي في خدمتي في الجيش.. وكان معايا في كل مراحل حياتي".