بسبب ألبوم عمرو دياب.. حرب تصريحات بين محمد صلاح العزب وأيمن بهجت قمر

أشعل ألبوم الفنان عمرو دياب الجديد «ابتدينا» حرب تصريحات جمعت بين المؤلف محمد صلاح العزب والشاعر أيمن بهجت قمر بسبب انتقاد الأول لكلمات أغاني الألبوم الجديد؛ الأمر الذي لم يصمت اتجاهه أيمن قمر لتشتعل معها أزمة بين الطرفين.
انتقاد محمد صلاح العزب لكلمات أغاني «ابتدينا»
وكانت بداية الأزمة مع المؤلف محمد صلاح العزب والذي انتقد عبر صفحته الشخصية على فيسبوك كلمات عدد من أغاني ألبوم عمرو دياب الجديد وكتب: «سيبك من الألحان والتوزيع والموسيقى والطبل والزمر والهيصة وعمرو دياب والتريند وفرحة الصيف وأنا مهما كبرت صغير..وادخل على اليوتيوب هتلاقي تحت كل أغنية مكتوب كلماتها اقعد اقرا الكلام ده كده راجل لراجل من غير دوشة وغلوشة وطرمخة».
وتابع: «المفروض إن اللي مكتوب ده هو زبدة الزبد وعصارة آلاف السنين من الشعر العربي والغنائي والخلاصة المصفّاة لتجارب الحب والشوق والألم والخذلان واللهفة والجنون والمجون واللوعة واليلاهوي سابتني ومشيت أو يا فرحتي رجعت لي وحنت وعصير خبرات وأدمغة وتاريخ طويل جدا من الشعر والغنا مع أكبر وأغلى مطرب بيغني بالعربي على مدار التاريخ».
واختتم حديثه قائلا: «خير يا جماعة انتو بتقولوا إيه؟ بلاش نصعبها ونكبرها ونفخمها وتاريخ وجغرافيا ونعلي السقف حاول تطلع منها أي صور أو تراكيب أو حتى إحساس؟ مش مفروض يكون فيه جملة تعلم حتى طلعت غصب عن اللي كاتبها؟ إحساس حلو حتى لو مزيف بس ملفوف في ورق ملون شكله شيك؟ لحظة مراوغة اتقفشت بالصدفة قبل ما تزوغ؟ زلة لسان عبقرية طلعت بالغلط؟ يا عم أي حاجة تيجي من ريحة الحبايب.. مش كده».
إقرأ ايضا: كواليس نادرة.. أحمد زكي وعمرو دياب في كليب أغنية «رجعت من السفر»
رد أيمن بهجت قمر
ليعلق أيمن بهجت قمر على انتقاد محمد صلاح العزب مطالبا إياه بالتركيز في عمله قائلا: « إحنا كمان بنشوف مسلسلات مملة وبتتذاع وبتتنسي وبنسكت وبنحترم زمايلنا رغم اختلاف أعمالهم» مضيفا:« فأقترح تراجع شغلك قبل ما تنظّر على ناس بتتعب وبتقدم أعمال محترمة».
هجوم محمد صلاح العزب على أيمن بهجت قمر
ليعلق بعدها المؤلف محمد صلاح العزب على رد الشاعر أيمن بهجت قمر وكتب عبر صفحته الشخصية على فيسبوك قائلا: «فيما يتعلق بموضوع كلمات ألبوم عمرو دياب وده آخر كلام هقوله في الموضوع ده ما لم يجد جديد» موضحا: «اللي حصل كالتالي: كتبت على صفحتي الخاصة اللي مشتريها بفلوسي وبدفع النت بتاعها على حسابي رأيي المتعلق بذوقي اللي هو بتاعي ويخصني إن مش عاجبني بعض كلمات أغاني ألبوم عمرو دياب.. ما أنا حر يا عم».
وأضاف:«لا جبت سيرة حد بالاسم ولا قلت كل الأغاني مع إنه برضه عادي.. قام الزميل اللي له كل احترام وتقدير الأستاذ أيمن بهجت قمر رغم إنه مجرد شاعر من وسط 10 شعرا كبار مثلا في الألبوم ودخل يقولي ما احنا بنتفرج على مسلسلات سطحية ومبنتكلمش اللي هو انت برضه لما تلاقي زمايلك عاملين حاجات سطحية متتكلمش».
وتابع محمد صلاح العزب :«هو المنطق ده متسق مع طريقة التفكير ده جدا لكن أنا يا سيدي مبتضايقش لما حد ينتقد شغلي وعمري ما رديت على حد قال شغلك حلو ولا وحش ويا ما اتقال حلو واتقال وحش ودي طبيعة الشغلانة».
وأضاف موضحا، أن الشاعر أيمن بهجت قمر هو كاتب كلمات أغاني تترات المسلسلات التي قام بتأليفها قائلا: «كمان صحيح المسلسلات بتاعتي اللي مش عاجبة الأستاذ دي هو اللي كاتب لها أغاني التترات أساسا بس هو اكتشف إنها مش لطيفة دلوقتي عشان التترات دي نحتاية ع السريع كده مش لازم يعرف المسلسل ده حلو ولا وحش أصلا قبل ما يقرر يشارك فيه.. المهم الشيك».
اقرأ أيضا: عمرو أديب: الهضبة ضحك عليا.. وألبومه الجديد «فخ»
وأضاف: «ويا عم أنا شغلي كله وحش وأوحش واحد متزعلش نفسك» مشيرا إلى أنه حذف أيمن بهجت قمر من أصدقائه على صفحته على فيسبوك منذ أكثر من عام قائلا:« الأستاذ المبجل ده كان عندي على فيس بوك في الأصدقاء ومسحته من سنة ونص ولا حاجة عشان نفس الفكرة والشخصية المهزوزة وإنه كل ما حد ينتقد شغله من الجمهور يقعد يتخانق معاه والواحد معندوش مرارة زيادة يقعد يتفرج على الهم ده فمسحته في صمت وخلصنا».
واختتم محمد صلاح العزب هجومه برسالة إلى أيمن بهجت قمر قائلا: «وبالمناسبة أنت حسيت صح هو في حاجة في 2025 اسمها رماني ف شبكه وعيوني ارتبكوا؟ يا راجل؟ مش كده.. وآخر نصيحة من صديق فيس بوك قديم اشتغل أقل بجودة أكبر عشان هي مش مسابقة على لقب شيخ النحاتين».