«خناقة» على السوشيال ميديا... رانيا علواني لأحد متابعيها: «إنجازاتك أيه»

أشتبكت رانيا علواني عضو مجلس إدارة النادي الأهلي مع مجموعة من متابعيها على موقع التواصل الإجتماعي تويتر عقب نشرها لأحد التدوينات التي هاجمت فيها لعبة كرة القدم وطالبت بدعم الرياضات الأخرى.
وهاجمت علواني مجموعة من منتقدي تغريدتها على «تويتر».
وعلقت عضوة مجلس الأهلي، قائلة: حد تاني واخد باله أن رياضتنا وأبطالنا السنة دي زي الفل في كل اللعبات، إلا الكورة هما دول اللي يستأهلوا بجد عاش أبطال مصر نوظف مواردنا صح بقى.
ليرد المشجع: لا إحنا واخدين بالنا من الفشل المستمر في الاختيار جوه النادي من يوم ما المجلس مسك وكنتوا معشمنا أن النادي في طريقه الصحيح للإصلاح وإعادة مكانته وفي الآخر طلعنا بنغرق أكتر ما كنّا.
وقالت علواني: هو حضرتك ما أخدتش الدوري.
وأشار المشجع: لا حضرتي طلعت بفضيحة من صن داونز وخسرت من بيراميدز في الكأس ولو المقياس الدوري ما مجلس الاستاذ محمود طاهر كسبه يبقى وقفنا ضدهم ليه.
وانفعلت عضو مجلس الأهلي: والله حضرتك روح اطلب من كابتن الخطيب بنفسك، هو شخصيًا ولجنة الكرة اللي بيختاروا المدربين لأن دي حاجة فنية، المدرب ده واللي قبله واللي قبله.
وواصلت: هو ده الجهل بعينه، لما تتكلم على ألعاب مصر اللي كسبانة واللعيبة اللي في الألعاب كلها اللي شرفونا من كل الأندية مش الأهلي بس وباقول لازم نشجعهم، يقوم كام واحد متكلمين برده عّن الكورة والمدرب والفشل ! حاجة غريبة بجد.
وأضافت: أنا ما عنديش حاجة اخاف منها و مجلس الادارة ما اختارش حد و لا المرة دي و لا اللي قبلها و أظن الكابتن واضح جدا في الاعلام ان هو محدد اختصاص جهاز الكرة كويس،انا مش هاسمح لحد يقول كلام مالوش أساس من الصحة.
وأختتمت: احنا ما اختارناش، اللي اختار لجنة كلكم عارفينها، حاسبوها هيا علي اللي فات و اللي جاي مش تيجوا علي اللي هايرد عليكم بأدب.
وكان مجلس إدارة النادي الأهلي أعلن، صباح السبت، تعيين فايلر لقيادة الفريق خلفا للأوروجوياني مارتن لاسارتي عقب خروج الفريق من مسابقة كأس مصر على يد بيراميدز.