شريف مدكور عن منتقدي محمد رمضان: يبقى عبيط لو سمع كلامكم (فيديو)

دافع الإعلامي شريف مدكور عن محمد رمضان بعدما اثار الجدل مؤخرا بسبب سجوده على خشبة المسرح بأحد الملابس الشفافة، في حفله بالساحل الشمالي، الأمر الذي أثار ضجة عبر مواقع التواصل الاجتماعي. قائلا إن الفن والموسيقى تعتمد على الذوق والحس الفني.
وأضاف مدكور في فيديو نشره على صفحته في موقع التواصل الاجتماعي "فيس بوك"، أن بعض الممثلين والمطربين في فترة الستينيات والسبعينيات، كانوا يرتدون ملابس شفافة من "الشيفون"، برغم موهبتهم، وكل جسمهم باين، محمد رمضان بيعمل شو رقص وغنا هو بيعمل الأغنية بطريقة دراما على المسرح فاللبس أولا فيه جزء بيسجد في الكواليس، من حقه يا جماعة يسجد، لاعيبة الكرة بيسجدوا بالشورت، ورجليهم وركبهم باينة، يعني العورة مكشوفة، وبتسموهم منتخب الساجدين، وفي الآخر منهم ناس ببتحرشوا".
وتابع مدكور: "أن رقص رمضان وملابسه تعجب الكثير من الناس ممن يطلق عليهم الأيه كلاس والبي كلاس والسي كلاس، والحفل كان يضم أعدادًا كبيرة جدًا من الجمهور، أكبر من جمهور حفل جنيفر لوبيز، وأكبر من جمهور ناس تانية كبار، والناس كانت فرحانة جدًا".
وأوضح مدكور: "أنا متابع رمضان على انستجرام وفيس بوك، وهو عنده على صفحته عدد رهيب من المعجبين، مش معقولة كل الناس دي وحشة، وبعدين في 2 انترفيو عملهم رمضان، واحد منهم مع الأستاذة نجوى إبراهيم، والتاني مع الأستاذ عمرو أديب، اتفرجوا على الاتنين، في ناس هتعترض أنتوا أحرار، بس اللقائين بيثبتوا أن رمضان عنده قدر كبير من الثقافة، بيعرف يتكلم، وهو راجل ذكي".
وأكمل مدكور: "رمضان راجل عامل شغله بزنس، لأنه بقى براند، بيكسب عشرات الملايين، لو هو غيّر الطريقة بتاعته دي مش هيكسب، أنتوا إزاي تقنعوني أنه يقول لأ، ده يبقى عبيط لو سمع كلامكم، وهو مش عبيط، هو عامل سكة ولاين لنفسه، هتعجب ناس وهيتفرجوا، هما أحرار، مش هتعجب ناس تانية، هما أحرار برضه، مش ضروري وجع الدماغ ده".
واستطرد: "كلنا بنحب أحمد عدوية دلوقتي، مع أن في بدايته كان بيغني أغنيات اتسببت في الهجوم عليه زي السح الدح إمبو أنا مش عارف إحنا بنعمل كدة ليه، رمضان راجل ناجح".
واختتم مدكور: "أنتوا إزاي عايزين رمضان يسمع كلام 5% من المجتمع، اللي هما النخبة، ويسيب ال95% من اللي بيحبوه، واللي كسبوه كل العربيات والقصور اللي عنده، ربنا يزيده، هيسمع كلام ال5% اللي عايزينه يطلع يغني ببدلة وباللغة العربية الفصحى، أكيد لأ، تصبحوا على خير وربنا يهدي الجميع".