ريهام سعيد ترد على انتقاد أحمد حسن: كلامك تأليف وظلم (فيديو)

بعدما رد لاعب كرة القدم المعتزل أحمد حسن نجم منتخب مصر السابق، على تصريحات الإعلامية ريهام سعيد عن أصحاب السمنة ووصفها لهم بأنهم ميتون وعبء على الدولة، من خلال حسابه الرسمي على موقع الصور والفيديوهات الشهير "إنستجرام، علقت الإعلامية ريهام سعيد على كلامه بقولها: "واضح إنك ماتفرجتش على الحلقة أنت كمان وزيطت مع الزيطة وهيصت مع الهيصة".
وأضافت منذ قليل، من خلال مقطع فيديو نشرته على حسابها الشخصي عبر موقع التواصل الاجتماعي "فيس بوك": "كابتن أحمد حسن مامتك زي القمر وكل حاجة محدش قال إنها مش زي القمر، لكن واضح إنك ماتفرجتش على الحلقة أنت كمان وزيطت مع الزيطة وهيصت مع الهيصة.. هي زي القمر وممكن تبقى زي القمر أكتر لو خست.. مينفعش تشجعها على إنها تبقى تخينة عشان الضغط والكوليسترول ورجلها مش هتقدر تمشي عليها ونفسها تقيل، اسألها هي.. هو ده اللى أنا كنت عايزة أغيره".
وتابعت: "بيقولوا أنتم حلوين وزي القمر كده، لكن ده غلط لأنه بيتعبهم، أنا كنت منهم لكن كنت بعالجهم، لازم يمشوا صح ويحبوا الحياة وينعموا بالنعم اللى ربنا أداهالهم لأن التخت بيموتها عندهم، أنا ما قلتش حاجة عن التخان، كل ده تأليف وظلم بس انتم خدمتوني وأنا مش راجعة تاني، أنا اتوقفت 30 مرة، وأول مرة أقول كده.. أنا مش راجعة تاني، لأن عندي حاجات اهم أعملها.. ربنا وبعدين ولادي.. بشكركم جدا كل واحد ساهم في وقفي، بشكر جمهوري اللى هيفضل يدعيلي طول عمره، هتوحشوني وانتم عارفين أنا عملت ايه وده يكفي".
وكانت الإعلامية ريهام سعيد أعلنت اعتزالها العمل الإعلامي والفني، وذلك بعد ما تعرضت له من انتقادات لاذعة بعد تنمرها من أصحاب الوزن الزائد خلال حلقتها الأخيرة من برنامج "صبايا".
وأصدر المجلس الأعلى للإعلام، مساء أمس الجمعة، قرارا بوقف الإعلامية ريهام سعيد ومنعها من الظهور في الإعلام، كما أمرت قناة "الحياة" بوقف برنامج "صبايا"، الذي كانت تقدمه الإعلامية ريهام سعيد لحين انتهاء التحقيقات.
وكان أحمد حسن قد علق على صورة له مع والدته قائلا: "الأستاذة ريهام سعيد خرجت علينا وقالت بالنص "الناس التخينة ميتة، عبء على أهلها وعلى الدولة، وبيشوهوا المنظر"، "منظرك بيكون مش حلو وأنت بالعباية أو الجلابية ومش قادرة تمشي، بتفقدي جزء من أنوثتك". بصي يا ريهام هكلمك عملي وبدون تنظير.. شايفة الست القمر السمينة دي! تبقى أمي وفي زيها ملايين من أمهاتنا واخواتنا العظيمات إللي جابوا رؤساء وعلماء ومبدعين و رياضيين وفنانين و إعلاميين للأسف انتي واحدة منهم وناجحين في كل المجالات في البلد".
وتابع أحمد حسن حديثه: "الناس دي تعبوا وشقوا وعرقوا واشتغلوا وقعدوا على ولادهم وعلموهم وحاجات كتيرة فى مشوار الحياة، الأمهات دول بركة حياتنا وكفاية دعوة واحدة بس منهم تريح القلب وتفتح الأبواب المقفولة الناس دي اللي انتي متعرفيش عنهم وعن ظروفهم حاجة انتي اتكلمتي عنهم بسوء لأنك بإختصار معرفتيش قيمتهم ولا هتعرفيها لأن الناس اللي وصفتيهم بالميتة دول مبيموتوش حتى ولو رحلوا عن الدنيا لأننا بنعيش بكل حاجة حلوة علموها لينا وسابوهلنا وبيسبوهلنا".
وأختتم "حسن" قائلا: "يا ألف خسارة على الإعلام اللي بدل ما يعلم وينصح ويقدم رسالة محترمة بقى يسخر وينظر على الطيبين اللي فاضلين في حياتنا، نصيحة لوجه الله على الملأ زي كلامك ما كان على الملأ .. راجعي نفسك وحاولي تعتذري لكل الناس اللي زعلتيهم جايز يسامحوكي".