الشيماء سعد مصممة المشغولات اليدوية بالخرز الكريستال كانت تري أن مفارش وأشغال الكروشيه الموجودة في كل بيت تحمل بصمة صاحبة المنزل ففكرت كيف تصنع بصمة جديدة خاصة بها في منزلها ووجدت الخرز وبدأت تصنع منه مشغولات يدوية رائعة الجمال وسوّقت منتجاتها واستطاعت تصدير بعض من أعمالها للسعودية والأردن، إنها الشيماء سعد مصممة المشغولات اليدوية بالخرز الكريستال.. وتقول الشيماء سعد ذات ال 28 عامًا خريجة كلية الحقوق: »بدأ معايا الموضوع اما خلصت كلية قدمت في وظائف كتير ومفيش فرصة جت كنت بشتغل في حضانات مش بحب التكاسل ولا القاعدة في البيت بحب دايما اعتمد علي نفسي واتخطبت وطلعت في دماغي اني اعمل مفروشات شقتي بالخرز زي المفارش اللي ماما كانت عاملاها لنفسها بالكروشيه زمان وفضلنا طول حياتنا مبسوطين بيهم لأنهم من ايديها حبيت أن شقتي يكون فيها حاجة انا عاملاها بإيدي، لفت نظري الخرز بجماله وألوانه قررت اعمل مفارش بالخرز حاجة شيك وجديدة ومفيش حد عاملها وكمان هوفر شوية عن المفروشات الهندي والتركي وقتها». وتكمل: »دخلت عاليوتيوب بدأت اتعلم الغرز واحدة واحدة عرفت الخامات بتيجي من فين كان بيشجعني وقتها خطيبي اللي هو جوزي حاليا كان بينزل معايا اسكندرية نجيب خامات وبعدين لفت نظري فانوس ميداليا صغير في المحل اللي بجيب منه اشتريته لابن اختي وأما رجعت البيت صممت اشوف هو معمول ازاي عرفت عدده وطريقته من شكله نفذت عليه واحد أكبر شوية خطيبي بقي قالي خلاص جهزي فوانيس وبالفعل جهزت دفعة فوانيس وهو سوقها علي صحابه في الشغل ودي كانت البداية وأوقات كنت ببقي تعبانة هو ينزل يجيب الخامات بدالي شجعني كتير ووقف جمبي ولسه بيدعمني». وتضيف الشيماء سعد قررت احتراف المهنة وأن أصبح مصممة مشغولات يدوية بالخرز الكريستال وقمت بتدشين صفحة علي الموقع الاجتماعي الفيس بوك لتسويق منتجاتي وفي فترة قصيرة أصبح لدي الكثير من العملاء بل وأيضاً ذاع صيتي ولدي عملاء من بعض الدول العربية مثل السعودية والأردن، وتكمل: »انا دايما حاسة ان الناس سندي وظهري هما اللي شجعوني ووثقوا في شغلي شغلي اتطور ونجح بفضل عملائي اللي ادوني الثقة اني اشتغل الشغل دا، الأوردرات زادت عليا وانا نفسي شغلي يبقي متوفر فوري في أماكن كتير مش بس عرض وطلب لا يبقي مشاهدة وشراء وقررت أعلم بنات كمان فن المشغولات اليدوية بالخرز الكريستال». وتقول: »انا دلوقت مش مجرد اني بشتغل خرز وخلاص لا انا بقيت بعشق الخرز وريحته والواناته الخرز، شغفي في الحياة علي اد تعبي في القطعة اللي بطلعها علي اد انها لما تخلص واشوفها قدامي كدا ببقي مبسوطة اوي وبنسي أي تعب». وعن أحلامها للمستقبل تقول الشيماء سعد مصممة المشغولات اليدوية بالخرز الكريستال: »نفسي نوقف نستورد اكسسوارات منازل من خارج مصر، في فنانين وفنانات كتير في مصر مش بس الكريستال في كل المجالات إبداع ملوش حل ولا وصف ونفسي يبقي كريستال الشيماء في كل بيت في العالم نفسي يبقي في كل محافظة تسويق لشغل الكريستال حاليا بعلم بنات معايا وبيشتغلوا ويساعدوني بأجر ونفسي ابقي سبب في فتح أبواب رزق كتير ونفسي كريستال الشيماء يبقي براند عالمي».
