عندك مثلا: محمد بديع، وخيرت الشاطر، وعصام العريان، ومحمد البلتاجى، وصبحى صالح، والكتاتنى، وسعد غزلان. حضرتك على الأقل تعرف نصف أصحاب هذه الأسماء، صح؟ لماذا تعرفهم؟ وما هى الصفة التى يطلون بها بوجوههم السمحة على حضرتك من الجورنال والراديو والتليفزيون والغسالة؟ الصفة: «قيادى بجماعة الإخوان المسلمين». أهلا وسهلا يا سيدى، حصل لنا الرعب والتهديد، خير بقى؟ مفروض نعمل لحضرتك إيه باعتبارك قيادى فى الجماعة؟ أو حتى عضو فى مكتب الإرشاد؟ ولا حتى المرشد نفسه؟ إيه علاقتنا بسيادتك من الأساس؟ عندك محمد البلتاجى مثلا، طلع زى الباشا من يومين، وقال: «إنه سيدلى بأقواله أمام النائب العام فيما يخص قضية نخنوخ»، طب كتر خيرك والله، ثم دعا كل من لديه معلومات تفيد جهات التحقيق فى كشف شبكات البلطجة المنظمة أن يتواصل معه. ماذا يعمل البلتاجى؟ قيادى بحركة الإخوان الكويسين؟ تمام، بيشتغل إيه يعنى؟ قيادى، أيوه، بيعمل إيه يعنى؟ متفهمش. حضرتك مواطن شريف وعندك معلومات حول شبكات البلطجة، نفّض للشرطة، ونفّض للنيابة، ونفّض لأى جهة مسؤولة أو مؤسسة حكومية، وروح بلّغ البلتاجى. بيشتغل إيه البلتاجى عشان نبلغ عنده؟ بيشتغل قيادى مع بديع والشاطر والعريان وصبحى صالح. أيوه، قيادى فى إيه يعنى؟ قيادى فى «الشلة التى تحكم مصر».