سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
الرئيس السيسي: الدنيا كلها كانت بتقول فى 2013 هو الجيش سايبنا ليهم ليه؟.. ويمازح مصطفى مدبولى: أكتر واحد بيتعذب معايا فى الحكومة.. تحركنا فى 2013 بالشكل اللى يرضى ربنا وراعيت ببيان 3 يوليو تماسك الدولة ومجتمعها
* الرئيس السيسى: "ربنا حبيبى وغالى عليا وكرمه على مصر فوق الخيال" * الرئيس السيسى: الممارسات الدينية تحتاج "إعادة طرح فهم عصرى" * الرئيس السيسي: "مافيش حاجة فيكى يا مصر كانت واقفة على حيلها" * الرئيس السيسى: على مؤسسات الدولة مساعدة الحكومة فى كل إجراء * الرئيس السيسى: "أى موضوع عاوز أخلصه بقول للجيش يعمله" * الرئيس السيسي: بنضيف 7 ملايين متر للإسكندرية وبنعمل أحسن ميناء فى الدنيا * الرئيس السيسي: "الناس موجودة فى كل حتة وشايفة الشغل قدامها" * الرئيس السيسي: "المسار الفكرى لبناء دولة يحتاج تضافر الجهود"
تحدث الرئيس عبد الفتاح السيسى، عن الفترة فى أعوام 2011 و2012 و2013، قائلا: "هقولكم شوية حاجات كده عشتها الفترة اللى فاتت، وتحديدا ساعة ما حصلت الأحداث بتاعت أعوام 2011 و2012 و2013".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "الدنيا كلها كانت بتقول هو ساكت ليه.. هو سايبنا ليهم ليه.. وهما هيعملوا فينا إيه.. الجيش يعرف اللى بيقوله ده كويس.. وبعض المفكرين يفهموا ده كويس.. الجيش جزء الدولة المصرية ومن الكيان ويخضع لرئيس الجمهورية".
ومازح الرئيس عبد الفتاح السيسى، الدكتور مصطفى مدبولى، رئيس مجلس الوزراء خلال كلمته بختام بالمؤتمر الاقتصادى مصر 2022، قائلا: "أكتر واحد بيتعذب معايا فى الحكومة هو الدكتور مصطفى مدبولى".
وتحدث الرئيس عبد الفتاح السيسى، عن الفترة خلال عام 2013، قائلا: "كان مين علم الرجل ده ونبهه إلى أن البلد رايحة فى حرب أهلية.. وأن الحد الأدنى لمنع ده هو استمراره فى الوظيفة.. وحد أقصى حياته.. هل كان عارف ده كويس وفهمه؟!.. ولا حد عمله؟".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "الواقع اللى ماشيين فيه.. اتغير عن الواقع دلوقتى .. 7 سنين فى مسيرة دولة مش كتير أوى.. وتم التحرك وقتها بالشكل اللى يرضى ربنا.. خلال المرحلة دي.. وإعطاء فرصة كاملة للناس اللى كانت موجودة.. الأمينة المخلصة الشريفة والمهم اللى بتفهم.. اللى بتفهم.. أن فيه قضية كذا وكذا.. فيه ناس من مجلس الوزراء كانت موجودة فى الوقت ده لما كنت وزير وانا بقول القضايا اللى بنتعامل معها فى الوقت ده.
وتابع الرئيس السيسي: "الموضوع كان شريف والشرف لا يتجزأ.. والشرف مش بيتعمل شوية وينتهى.. ده سمة متغلبة.. ده حاجة ثابتة والرزق على الله".
وقال الرئيس عبد الفتاح السيسى، أن كرم الله على مصر فوق الخيال، مضيفا: "والله والله والله كرمه على مصر فوق خيالكم، وعندما حدثت الأحداث، وساعتها لما جيت عملت البيان 3 يوليو كنت حريصا على تماسك الدولة المصرية ومجتمعها بما فيها هذا الفصيل، لأجل خاطر مصر".
تابع الرئيس السيسى، فى كلمته بالجلسة الختامية للمؤتمر الاقتصادي: "كنت موجود فى مجلس الوزراء فكانوا بيقولولى إحنا عايزين نحافظ عليك، وأنت الأيقونة بتاعتنا، وأنت البطل، طيب هو البطل خلاص بقى ولا إيه؟ أنا ضهرى ربنا، واللى يقدر على ربنا يتفضل".
وأكمل: "أثناء ترشحى فيه 2 من الإعلاميين الأفضل -أقدرهم وأحترمهم- قالوا نعمل معاك لقاء، قلت طيب كويس، وبعد ما خلصت اللقاء معاهم قالولى إحنا ما نمناش امبارح، قلتلهم ليه، قالولى أصل أنت زجاج لا نحب لمسه لأن اللى اتعمل كتير جدا، وإحنا لازم نبقى شايفين وإحنا بنتكلم معاك نخلى بالنا، ولكن بعدها بكام شهر، كنا بنفتتح مشروع للمناطق الخضراء، فحد قال السجادة الحمراء ماشيين عليها! ياااه بعد كام شهر كده؟!، لأ انتوا مش عارفين السياق الإعلامى المطلوب لإدارة الدولة دى فى المرحلة دى لمدة 20 سنة، السياق الإعلامى مش خدمة الرئيس ولكن خدمة الفكرة، أنت عايز توحد الجهود، أدبيات التعامل مع الواقع فى ظروف غير مناسبة".
وتحدث الرئيس عبد الفتاح السيسى عن علاقته بالله، قائلا: "حد بيقولى أنت بتتكلم كتير عن ربنا ليه.. ربنا حبيبى وغالى عليا.. وأنا اللى شايف عمل إيه معاكم.. وأنتوا ممكن تكونوا شايفين.. بس أنا شايف أكثر.. والله والله والله كرم ربنا على مصر فوق الخيال".
وتحدث الرئيس عبدالفتاح السيسى، عن أدبيات وثقافة البعد البيئ للدين، قائلا: "أنا والله العظيم لا أقصد أى حاجة علشان محدش يزعل.. كنا بنتكلم على أهمية تصويب وإصلاح الخطاب الدينى، فمرة قلت يا جماعة الواقع اللى بنشوفه فى منطقتنا والفهم والممارسات الدينية اللى موجودة فى بلدنا محتاجة إعادة طرح فهم عصرى، ليس فى ثوابت الدين، ولكن لفقه يتعامل مع المتغيرات والتحديات فى كل مجتمع بس".
أضاف الرئيس السيسى خلال الجلسة الختامية للمؤتمر الاقتصادى مصر 2022: "اتكلمت عن وثيقة الطلاق وتبقا مكتوبة لحماية حقوق الناس وبعدين من غير ما اذكر اسم أو أسماء احنا طرحنا الموضوع ده على لجة علمية متخصصة نسبة كبيرة واقفت ونسبة صغيرة قالت لا طيب لماذا لم تقره؟ قالوا اصل انت قلته ولما تقولوا انت ولو احنا وافقناك يبقا بندعم السلطة.
تابع الرئيس: "الكلام ده يعكس الفهم اللى محتاج يتطور تجاه يعنى ايه دولة ويعنى إيه دور؟ لو انت دايما حطتنى فى مكان وانت فى مكان تانى ده مش حقيقى صح احنا دايما مع بعض..مجرد لما طرحته بقا غير قابل للتنفيذ لأحسن يقولوا إيه دا انت مشجع لأيه؟ يعنى تسيب الحق لأجل الكلمة دي؟".
وقال الرئيس عبدالفتاح السيسى، أنه خلال وقت ترشحه التقى عددا من المستثمرين وذكر خلالها أن مصر تحتاج 100 مليار جنيه لمجابهة الأحداث من 2011 وحتى 2013، مضيفا: "لقاءى مع المستثمرين فى فترة الترشح قلت محتاجين 100 مليار علشان أجابه الحالة من 2011 – 2013 خفت أن انطباعى يقولوا جاى اخد مال الناس ده لا يرضى ربنا ولا هيرضى ربنا لا طبعا، لكن لازم نشوف المسار اللى مشيت بيه الدولة خلال 30 سنة ونشوف نتائجه ايه والا هنبقا زى ما احنا".
أضاف الرئيس السيسى خلال الجلسة الختامية للمؤتمر الاقتصادى مصر 2022:" فيه جزء كبير جدا من اللى اتعمل وناس بتتكلم على كوبرى،.. كوبرى إيه؟ ده مفيش حاجة فيكى يا مصر كانت واقفة على حيلها.
وقال الرئيس عبد الفتاح السيسى، أن مؤسسات الدولة يجب أن تساعد الحكومة فى كل إجراء طبقا لفهم واسع وفكر عميق لحجم القضايا التى تواجهنا، متابعا: "الاقتصاد أمر مهم جدا ومفيش كلام، لكن بناء أمة ليس فقط على الاقتصاد، ولكن على أشياء كثيرة جدا من ضمنها الاقتصاد".
أضاف الرئيس السيسى، فى كلمته بالجلسة الختامية للمؤتمر الاقتصادى: "لو أنا النهارده واخد مسار إصلاح اقتصادى قاسى ومؤلم، أنت كموسسات دينية إسلامية ومسيحية هتعمل ايه؟ لابد أن نتفهم أن هناك إجراءات أخرى تتكامل مع الموضوعات حتى ينجح، وهل المؤسسات الدينية فى مصر ستكسف جهودها لدعم مسار الحكومة اللى هو عبارة عن توكيل من الشعب لإدارة شئونه لفترة زمنية بما فيهم أنا، إذا مؤسسات الدولة لابد أن تساعدنا فى كل إجراء".
وحذر الرئيس، من خطورة الترويج للأفكار السلبية فى الإعلام، قائلا: "لما حد يتكلم فى الإعلام ويقولى أن كرتونة البيض زادت 10 جنيه، أنت بتساعد فى المسار؟ ده لا يعنى أننى أرفض الفكرة، ولكن الادبيات اللى انتوا بتجيبوها وتشتغلوا بيها قد لا تتوافق مع واقعنا يا جماعة، إحنا محتاجين حشد للاتجاه".
وأكمل الرئيس: "فيما يتعلق بالاستثمار، لما تقعد وتقول مش سايبين لينا فرصة، والاستثمار مش واضح وفيه حد بينافسنا، أنت بتدى بيئة جاذبة ولا طارده؟ ولما تقول بيضيقوا علينا.. انت بتقول كلام بيضر نفسك، والمستثمر مش هيجيلك لما أنت كمصرى بتقول لأ".
وأردف: "فوجئنا فيما يتعلق بموضوع الموانئ فى مصر، الموانئ دى تم طرحها قبل كده فى إطار الاستثمار الخاص، ولا بأس من ذلك، لكن أنا كمسئول عندما أنظر إلى هذه القضايا أشوف التاريخ والنتائج، لو لقيتهم بيساعدونا فى الاستمرار فى المسار أكمل، لو محتاج أعدل أعدله، ولو لم أعدل يبقى مش قادر اتعامل مع المرونة الكافية فى التغيير، فكان فيه أحد الموانئ عندنا الميناء اتعمل من 25 سنة ولم يتطور كثيرا وقلنا يا جماعة عايزين نعمل شبكة موانئ تليق بدولة تستطيع أن تقوم بمهام لوجيستية فى منطقتها التى تتميز بموقعها الجغرافى، قلت لكامل الوزير الموضوع ده – الموانئ – يتعمل كله، قالى يافندم ده عايز 40 أو 50 مليار جنيه، قلتله يتعمل يا كامل.. أنا صريح ومش بخاف، كامل قالى مش معايا فلوس، قلتله الجيش يساعدك، طيب هل فيه رجال أعمال مستعدة تدفع 40 مليار جنيه؟ علشان نعمل الميناء من أجل بناء قدرة وانطباع لدولة قادرة على تلبية متطلبات التجارة العالمية".
وتحدث الرئيس عبد الفتاح السيسى، عن جهود الحكومة والجيش، قائلا: "انا بتكلم احنا بنفكر فى حياتنا ازاى وبنتكلم ونساعد بلدنا ازاي.. الحكومة بتقوم بجهد جبار.. لكن أى موضوع عاوز اخلصه.. الجيش.. يا محمد يا زكي.. بقول ايه يا محمد.. الجيش يعمله.. وأنا بحييك.. وبحيى الجيش".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "طب بقول كده ليه.. علشان انا من الجيش.. لا والله.. لا والله العظيم.. بسجل لكم وللتاريخ.. اللى الجيش علمه من بعد ما خد طعنة فى النكسة.. وعى الدرس والعوز والحوجة.. وكان فيه جولة علشان يجيبوا دعم له فى حربه المقدسة.. قولنا لا يمكن أن الجيش يبقى كده تاني".
وأكد الرئيس عبد الفتاح السيسى، أن الأمن القومى المصرى مرتبط بالجيش، قائلا: "الأمن القومى المصرى متعلق فى رقبته.. يكمل ويدعم ما أمكن.. أيوة"، ممازحا رئيس الوزراء: "يعنى الكلام ده هيزعل الدكتور مصطفي.. والله هيزعل الدكتور مصطفي.. ازعلك يعنى يا دكتور مصطفي.. أنا على الهواء".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "الميناء اللى بنتكلم عليه بقى أحسن ميناء فى الدنيا.. مين عنده حل تانى من أبو قير ادخل 3-4 كليو.. علشان اضيف 7 ملايين متر لمدينة الإسكندرية اللى غرقانة فى التجاوز.. 7 ملايين متر.. أرصفة 22 مترا.. مين ده.. مين اللى بيعمل الرصيف 15 كيلو".
كما تحدث الرئيس عبد الفتاح السيسى عن جهود الدولة المصرية فى التنمية والبناء فى مختلف المجالات، متابعا: "حد يقولى أنت مش خايف من أن التغطية الإعلامية للى بيتعمل فى الدولة الناس ما تشوفهاش.. لا.. الناس موجودة فى كل حتة شايفة الشغل قدامها".
وأضاف الرئيس السيسى، خلال الجلسة الختامية للمؤتمر الاقتصادي: "اللى ساكن فى المقطم يشوف.. واللى ساكن فى المرج والمطرية وعين شمس.. أنا اللى بدخل المناطق دى علشان نغير حياة الناس".
وتابع الرئيس السيسي: "الحوار الوطنى نتكلم مع بعض.. علشان نتكلم بلغة واحدة.. تبقى شبكة الموانئ اللى موجودة أحسن حاجة".
وقال الرئيس عبدالفتاح السيسى، أنه عند البناء الفكرى للدستور لم يؤخذ فى الاعتبار قدرة الدولة على تلبية بعض المطالب، مثل التعليم، حتى أصبحت هذه المطالب التزامات، متابعا: "يبقا البرلمان يحاسب الحكومة، والوزير ياخد فى البرلمان على وشه، التعليم العالى والصحة والكهرباء زيه، ليه؟.. لأن اللى بيطلب، بيطلب حاجة مش موجودة".
أضاف الرئيس السيسى خلال الجلسة الختامية للمؤتمر الاقتصادى مصر 2022:" يبقا المسار الفكرى لبناء دولة، يحتاج تضافر كل الجهود بما فيها الفهم علشان البلد تطلع لقدام، مش علشان عبدالفتاح يقعد فيها، ده تفكير ضيق قوى".
