فتحية أخيرا جبت حد يساعدنى فى تشطيب المطبخ، ندهت على مرات البواب إمبارح ، صحيح صوتى إتنبح لغاية لما سمعتنى، وطلعت بعدها بنصف ساعة كاملة، بس أهى جت وخلاص، وكنت كاتبة فى ورقة صغيرة المطلوب منها بالتفصيل، تشطيب الحوض، تنفيض الشباك، فك الشفاط وغسله، تنظيف الثلاجة بالديتول، مسح الأرض ووضع عجينة النمل فى أركان المطبخ... ولسه هقرأ لها الورقة، فاجأتنى: ◄قالت: هاتى حضرتك الورقة أنا هشوفها وحضرتك خشى ريحى ..... هيء هيء هيء (ضحكة)... (لم أفهم الضحكة). ◄قلت: إيه ده يا فتحية أنت بتعرفى تقري؟؟ ◄ضحكت بخجل ريفي: أنا طالعة من أولى إعدادى، وحافظة جزء فى المصحف. ◄ما شاء الله عليكى يافتحية، وبتعرفى بأه تنضفى؟ ◄أمال إيه يا أبله، حضرتك هتشوفى دلوقت. ◄بصي،أنا عايزة أعرفك نظامى، المواعين بصابون كثير وميه سخنه نار وتشطفيهم كويس وترصيهم بنظام، وأوعى الشفاط يبوظ منك وإنت بتفكيه.... ◄يا أبله ما أنا عارفه كل حاجه، دا الأبله اللى فى الرابع بتقول كله إلا فتحية ... حضرتك هتشوفى دلوقت. ◄إنتو فى العمارة من زمان يا فتحية؟ ◄قبل ما حضرتك والماشمهندس تيجوا هنا ييجى كده بكام شهر، كت ساعتها عروسة جديدة .... هيء هيء هيء (نفس الضحكة الخجولة الممزوجة بجرأه لا أعرف مغزاها). ◄تكمل كلامها: هتشوفى دلوقت شغل فتحية...... دا أنا شايلة العمارة شيل يا أبله، فكرك (رجب) يعرف يروح واللا ييجى من غيرى، أنا يوماتى على الله طالعة نازلة فى العمارة إيشى مكواه، خضار من السوق، مسح عربية، تغيير بمبة بوتجاز، تنفيض شقق، ده غير مسح العربيات كل يوم الصبح... ◄قاطعتها: أمال (رجب) بيعمل إيه؟ ◄ردت: يا أبلة كفاية علية إمارة البهوات اللى فى العمارة، ده لازم ما يتنقلش من بوابة العمارة.... بس أنا بقى يا أبلة إيه... (تمصمص شفتيها).. حضرتك ما شوفتنيش أيام ما كت عروسة جديدة لسه، ده كان حالى غير الحال. ◄قلت: ليه يا فتحية ما أنت حلوه أهوه، إيه اتهديتى من الشغل؟ ◄قالت: لأ يا أبله لأ الشغل ما يتعبش، كله منها الولية الله يسامحها ... الولية حماتي... ◄قلت: مالها ومالك، هى مش عايشه فى البلد؟ ◄قالت: عايشة آه فى البلد، بس يوماتى تكلم (رجب) فى المحمول عشان تطمن علينا... (ترى نظرة التساؤل فى عيني) ... تطمن يعنى علينا إكمنى اتأخرت فى الحَبَل... (نظرة أسى فى عينيها). ◄قلت: ومستعجلين قوى كده ليه؟؟ ◄قالت: أصل (رجب ) كان الواد الوحيد على خمس بنات، وأم رجب عايزة تفرح بإبن ابنها يا أبله... ده أنا الشهر اللى فات كله بلف على الدكاتره وعلى التحاليل... أهو .. قاللولى مفيش حاجة تمنع لا عندى ولا عند رجب... ◄قلت: الحمد لله يا فتحية، خلاص بقى....ده حتى شكلك صغير ما يكملش 20 سنة صح؟؟ ◄قالت: 18 سنة يا أبله. ◄قلت: يا نهار أبيض، ليه القلق ده؟ ده انتى صغيره قوي، ده أنا أكبر منك بسنين، ولسه برضه معنديش أولاد، دى حاجات بأيد ربنا. ◄قالت: طب حللتى يا أبله؟؟ ◄قلت: لأ ◄قالت: يا أبله العيال حلوه، ده الأبلة اللى فى الدور الثامن أم مريم، البت مريم بنتها الكبيرة تمت تسع سنين، وأخوها الصغير يادوب لسه عنده كام شهر، الفرق بين الواد وأخته تسع سنين. ◄قلت: جايز ربنا ما أرادش قبل كده.. ◄قالت: لأ لأ يا أبله إية الكلام ده، ده هى اللى ما كنتش عايزه خلف تاني، لولا البت مريم زنت عليها عشان تجيبلها أخ ولا أخت ... ده اسمه كلام يا أبله، ده الواحدة تفرح لما تجيبلها أربع خمس عيال كدة وهى لسه فى شبابها، ويكبروا حواليها ويملوا عليها البيت.... ◄ابتسمت لها ولسان حالى يقول "كفاية رغى واشتغلى يا فتحية".. ◄قالت: وانت بقى يا أبله جايز ما يكونش عندك مانع ولا حاجة.. أصل ... أنا مكسوفة منك يا أبله.. قصدى يعنى فيه أوقات معينة فى الشهر هى اللى بيحصل فيها الحَبَل... الدكتورة قالت لى كده... عند هذا الحد أسقط فى يدى، ولم أعرف بماذا أرد، وكيف وصل الحديث لهذه التفاصيل وحاولت أنهى الحديث.... ◄قلت: بس أهلك استعجلوا قوى على جوازك يا فتحية... انت لسه صغيرة، وإن شاء الله ربنا هيرزقك بأطفال، ده انتى لسه متجوزة بقالك كام شهر، لسه بدري... ◄قالت: لأ ما هو يا أبله ... أصل ده مش أول بختى، أنا والله مكسوفة منك يا أبله ... أصل أنا كت متجوزة واحد أكبر منى فى البلد وأنا لسة 13 سنة ... بس مفيش نصيب، ما اتفقناش ... حصل اللى حصل. ◄قلت وأنا متعجبة: يعنى هى حماتك دى اللى كل يوم تكلم ابنها عشان الخلفة، رضيت إزاى تجوزه لواحدة اتجوزت قبل كدة... ما تزعليش منى يا فتحية... ◄قالت: لأ ما أنت ما أنت ما تعرفيش رجب، ده فرخة بكشك عند أمه، وهو قال ما اخدش غير "مَلَك" هتجوزها يعنى هتجوزها .. هو حد يقدر يرفض له طلب.. ◄قاطعتها وأنا متعجبة فعلا. "مَلَك" مين يا فتحية؟؟؟ ◄قالت ضاحكة: هيء هيء هيء.... ما هو ده اسمى الحقيقى يا أبله، منه لله أبويا سمانى على اسم امه.. وإكمنه يعنى اسم قديم شوية، كت (مألسة) البلد، قلت بقى فتحية أحلى، يعنى اسم كده مدلع نفسه... هيء هيء هيء.... (تضحك) .. وكمان عاجب الواد رجب، ... أصل يا أبله الواد رجب ده بيعشقنى عشق يا أبله ... آى والله... ◄قلت: مَلَك؟؟؟؟؟؟؟؟ ده اسم موضة جدا هنا فى مصر...قصدى يعنى الناس بتحبه...أنا لو خلفت بنت هسميها مَلَك ان شاء الله... ◄قالت: آه بس افتكرى بقى الأيام اللى أنا قلت لك عليها...عشان الحَبَل يعنى يا أبله...وابقى ادعى لفتحية....
