سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
ننشر نص أقوال والدة قتيل سجن طرة.. الضابط نور أنهى زيارتنا لعصام لما عرف إننا إدناه شريحة موبايل.. وأثناء خروجى صرخ: الحقينى يا أمى وعرفت أنهم حطوله خرطوم فى الشرج وشربوه 2 لتر مياه بصابون
حصلت "اليوم السابع" على نص أقوال أنعام حسن محمد والدة قتيل سجن طرة "عصام" فى تحقيقات النيابة، حيث مثلت بصحبة كل من سيد فتحى المحامى ومحود خالد وماجد محمد المحامين وننشرها على النحو التالى: النيابة: إيه اللى حصل؟ والدة عصام: اللى حصل إن ابنى عصام على عطا كان اتقبض عليه 25/2/2011 بتهمة الاستلاء على مسكن بحى المقطم وبتاريخ 26/2/2011 اتحكم عليه بسنتين سجن حكم عسكرى، وبعد كدا راح سجن الاستئناف وقعد هناك 3 شهور، وكنت بزوره كل أسبوعين، وبقالى 3 شهور مزرتهوش لحد ما رحت زرته يوم الثلاثاء اللى فات 25/10/2011 كانت معايا واحدة جارتنا اسمها آية وبنتى الصغيرة سلمى كنت وخداهم معايا عشان الشنط كانت تقيلة ولما دخلنا الزيارة قابلنا عصام وكنا قاعدين على كوفرتة على الأرض وكان معانا واحد مسجون تانى فى الزيارة مع أهله وكان فى واحد تانى بيعمل شاى مسجون وعرفت من عصام إن ليه عنده خمسة جنيه رفض يدهاله وشد معاه فى الكلام وقال إنه هيتصافى معاه لما يدخل جوه وأنا قلت له سيب الخمسة جنيه زكاه عنك واديته الزيارة واديته شريحة تليفون كنت شيلاها مع آية ولما ادناله الشريحة هو اداها لزميله المسجون اللى كان موجود علشان هو أقدم منه وساعتها المسجون اللى بيعمل الشاى شاف ابنى وهو بيدى الشريحة لزميله فبلغ ظابط اسمه نور وبلغله باللى حصل وطلبوا ينهوا الزيارة وراحوا مطلعنا بره واحنا خارجين سمعت عصام بيصرخ وبيقول الحقينى يا امى وبعدها زقونى بره وقفلوا الباب بصيت على الشبابيك السلك لقيتهم حطوا البطانية والكوفرته على الشباك علشان منشفهمش واستنينا بره لحد العصر بنحاول نعرف ندخل معرفناش وبعدين روحت وحاولت اتصل على تليفون كان بيكلمنى منه ابنى لقيته مقفول وبعدها بساعة التلفون اتفتح وعرفت من واحد مسجون رد عليا أن ابنى حطوله خرطوم فى فتحة الشرج وشربوه حوالى 2 لتر ميه فيهم مسحوق غسيل بعدها بأربع ساعات لقيت ابنى بيكلمنى من الخط القديم اللى كان جوه السجن وحكالى وقالى إن الضابط نور بيعذبه وحطله خرطوم فى فتحة الشرج وشربه حوالى 2 لتر ميه بمسحوق وساعتها قفل وكلمنى تانى الساعة 11 مساء وطلب أشحن له رصيد على الخط اللى أنا ادتهوله عشان كان عاوز يتكلم مع أبوه واخواته فعلا شحنت له كارت بعشرة وكلمته وتأكدت إن الرصيد وصل ولما روحت هو اتصل بابوه وطلب منه أن يقدم شكوى للنائب العام بسبب التعذيب اللى حصله من الظابط نور حسن وساعتها محمد أخوه كلمه وشدوا مع بعض فى الكلام وقاله إنه لو قدمنا شكوى هيتعذب زياده وقفل على كدا وكلمنا تانى يوم الأربعاء 26/10 الساعة 11 مساء سأل عليها وطلب منى تانى اشحن له كارت بعشرة وفعلا شحنت له كارت وتأكدت أنه وصل وانقطعت معاه الاتصلات من وقتها لحد يوم الخميس حوالى 4 العصر كلمتنى واحده جارتنا اسمها فايزة من عابدين وقالتلى إن عصام تعبان فى المستشفى وطلبت أن احنا نروح له ساعتها وبعدها ايه كلمتنى وطبت منى اقابلها فى السيدة عيشة عشان عرفت أن ابنى تعبان وبيموت وفعلا لفيت معاها على مستشفيات كتير لحد لما رحت القصر العينى وعرفت أن ابنى فى مركز السموم ولما رحت عرفت أن ابنى توفى وموجود فى التلاجة ولما دخلت التلاجة عشان أشوفه لقيت وشه وارم ومناخيره لونها أزرق وعلى بقه فيه رغاوى مختلطة بالدم وبطنه مفتوحة وجسمه كله وارم. النيابة: منذ متى وابنك عصام على عطا مقيد الحرية؟ والدة عصام: من يوم 25/2/2011 كان بتهمة الاستلاء على مسكن وصادر فيها حكم سنتين عسكرى يوم 26/2 النيابة: وما الذى حدث عقب صدور حكم الحبس لنجلك؟ والدة عصام: هو تم ترحيله على سجن الاستئناف قعد فيه حوالى 3 شهور ونقلوه من شهر 5 أو 6 على طرة شديد الحراسة. النيابة: وكم عدد المرات التى قمتى بها بزيارة نجلك أثناء تواجده بالسجن؟ والدة عصام: وهو موجود فى سجن الاستئناف كنت بروح له كل أسبوع لحد ما تم نقله فى سجن طرة. النيابة: وهل قمتم بزيارته بعد تواجده بسجن طرة؟ والدة عصام: كنت بروح له كل أسبوعين بس انقطعت عنه الزيارة من 3 شهور. النيابة: وما سبب ذلك الانقطاع؟ والدة عصام: بسبب الظروف المادية النيابة: وما الذى حدث عقب ذلك؟ والدة عصام: أول مرة أروح له بعدها كان يوم الثلاثاء 25/10/2011 النيابة: ومين برفقتك آنذاك؟ والدة عصام: كانت معايا واحده جارتنا اسمها آية وبنتى الصغيرة سلمى وكان معانا زيارة أكل واخدينه لعصام النيابة: وما الذى كانت تحتويه تلك الزيارة والتى من المفترض تسلمها للمجنى عليه أثناء زيارتك؟ والدة عصام: أنا كان معايا 6 شنط فيهم أكل عبارة عن مكرونة وفول ورز وزيت وسكر وشاى وفاكهة وبطانية وملاية وبعض الملابس ده غير أنه كان طالب منى خط اتصالات عشان يبقى معاه جوه السجن ودا أنا كنت شيلاه مع آية عشان تدهوله فى الزيارة النيابة: وهل توجهتى لزيارة نجلك المجنى عليه صباح يوم 25/10؟ والدة عصام: أيوه النيابة: ومتى تحديدا وصلتى للسجن؟ والدة عصام: أنا وصلت 8 الصبح وعلى ما دخلنا كانت الساعة 2 الضهر النيابة: وما هى الإجراءات المتبعة أثناء دخولك من داخل السجن من ناحية التفتيش الخاص بالزائرين وما بحوزتهم؟ والدة عصام: هما فى البداية فتشونا على الباب الرئيسى وبيحطوا الحاجات اللى معانا على جهاز علشان يشوفوا فيها ممنوعات ولا لا وبعد كدا بيفتشونا بمعرفة واحده ست بعد كدا بنركب وندخل جوه النيابة: ما الذى حدث بعد ذلك؟ والدة عصام: دخلنا على الزيارة فى أوده كبيرة وقعدنا على الأرض لأن ابنى كان فارش كوفرته على الأرض النيابة: ومن الذى كان متواجدا مع ابنك فى الغرفة؟ والدة عصام : كان موجود ابنى عصام وأنا وآية وسلمى وكان فى واحد تانى مسجون كان أهله يبزروه وواحد مسجون ثالث بيعمل شاى دا غير بتوع الشرطة اللى كانوا موجودين أثناء الزيارة. النيابة: وما هى الحالة التى كان عليها نجلك عقب مشاهدتك له آنذاك؟ والدة القتيل: كان وشه وارم ساعتها. النيابة: وهل قالك على سبب ذلك؟ والدة عصام: أيوه النيابة: وما الذى قاله لك بشأن ذلك؟ والدة القتيل: هو قالى أنه مضروب من الظابط الى اسمه نور حسن. النيابة: وهل وقفتى على سبب قيام الظابط نور حسن بالتعدى على نجلك محدثا به الإصابات التى شاهدتيها أثناء الزيارة؟ والدة عصام: أيوه النيابة: وهل ثمة إصابات شاهدتيها بنجلك؟ والدة عصام: لا مكنش فيه أى إصابات غير وشه اللى كان وارم. النيابة: وما الذى حدث أثناء تلك الزيارة؟ والدة عصام: أثناء الزيارة أنا عرفت إنه كان ليه خمسة جنيه عند المسجون اللى بيعمل الشاى فى الزيارة وطلبها منه ورفض يدهاله وقاله لما نبقى ندخل جوه وأنا قلت له سبها زكاة عنك وإيه ادتله شريحة الموبيل اللى كان طالبها. النيابة: وما هو رقم تلك الشريحة؟ والدة عصام: أنا اديتله شريحة رقمها 01555164916ملحوظة: ( قدمت لنا الحاضره علبة كرتونة خاصة بشرائح الهواتف المحمولة مدون عليها ذات الرقم والتى قررت تسليمها لنجلها) النيابة: وما الذى حدث عقب تسليم نجلك تلك الشريحة؟ والدة عصام: آية هى اللى ادت الشريحة لابنى وآخدها منها واداها للمسجون التانى واللى كان موجود فى نفس الزيارة ساعتها. النيابة: وما سبب قيام نجلك باعطاء تلك الشريحة لذك المسجون؟ والدة عصام: عشان المسجون التانى قديم عشان هو يدخلها. النيابة: وهل معلوم لك أسماء المساجين الذين تواجدوا؟ والدة عصام: لا النيابة: وما ألذ حدث عقب ذلك؟ والدة عصام: لما ابنى ادى الشريحة لزميلة المسجون زميلة التانى اللى كان بيعمل الشاى شافه وبلغ بتوع المباحث اللى راحوا قالوا لنور أن ابنى بيبلع حاجة والكلام دا مش صحيح وساعتها نور قالهم ينهوا الزيارة وخلونا نخرج بره وهما بيقفلوا الباب سمعت ابنى وهو بيصرخ وبيقول الحقينى يا امى. النيابة: وما الذى تناهى إلى سمعك تحديدا آنذاك؟ والدة عصام: أنا سمعته بيصرخ وبيقول الحقينى يا امى النيابة: وما التصرف الذى صدر منك عقب استغاثته؟ والدة عصام: أنا لفيت عشان أشوفه من خلال الشبابيك السلك بس هما كانوا حطوا البطاطين والكوفرتة على الشبابيك علشان منشفش حاجة. النيابة: وهل وقفتى على سبب تلك الاستغاثة؟ والدة عصام: لا معرفتش هو بيصرخ ليه. النيابة: وإلى أين اتجهتى عقب ذلك؟ والدة عصام: بعدها أنا روحت وفضلت أتصل على الرقم اللى كان بيكلمنى منه والرقم دا غير الرقم الجديد اللى اشترتهوله وادتهوله فى الزيارة. النيابة: وما هو رقم ذلك الهاتف المحمول الذى حاولتى الاتصال على نجلك عليه؟ والدة عصام: أنا معرفش رقمة بالضبط ولكن الرقم دا مع آية. النيابة: وهل اعتاد نجلك مهاتفتك من خلال ذات الهاتف المحمول أثناء ما كان محبوس فى سجن طرة؟ والدة عصام: كان على طول بيكلمنى من رقم اللى بتعرفه آية لحد ما اشترت له خط جديد. النيابة: ما الذى حدث عقب انصرافك من زيارة نجلك؟ والدة عصام: بعدها روحت وكنت بحاول اتصل بيها بعدها واحنا فى الطريق آية اتصلت فرد عليها مسجون وقالها عصام راح التأديب وقال إنه حطوله خرطوم فى فتحة الشرج وشربوه ميه بريل. النيابة: وما التصرف الذى بدر منك عقب قيام من تدعى آية بإجراء ذلك الاتصال والذى علمت من خلاله بما حدث لنجلك المجنى عليه؟ والدة عصام: أنا بدأت أصرخ بعدها بأربع ساعات اتصل بيا ابنى بلغنى باللى حصل معاه وطلب منى أبلغ والده. النيابة: وما الذى أبلغك به نجلك؟ والدة عصام: قالى إنه هما دخلوه التأديب وأنهم حطوله خرطوم ميه فى فتحة الشرج وشربوه حوالى 2 لتر ميه بريل وأخدوا منه الزيارة لولا زمايله فى السجن اللى دخلوا للضابط نور وقالوا له ان مبيشربش حاجة وملوش فى اى حاجة علشان كدا خرجه من التأديب بس قالى انه هو تعبان. النيابة: وهل قرر لك نجلك أسباب ذلك الإعياء آنذاك؟ والدة عصام: قالى إنه اضرب واتبهدل وقالى موضوع الخرطوم وطلب منى أنى مبلغش انى هشتكى الظابط نور. النيابة: وما هى الفترة الزمنية التى استغرقتها تلك المكالمة تحديدا؟ والدة عصام: هى ما تزدش على نصف ساعة وتزيد على ربع ساعة. النيابة: وهل كانت تلك المكالمة الهاتفية من الشريحة التى استلمها منك أثناء الزيارة؟ والدة عصام: لا دى كانت من تليفون قديم جوه السجن. النيابة: وما الذى حدث عقب ذلك؟ والدة عصام: فى نفس اليوم اللى هو يوم الثلاثاء 25 /10 الساعة 11 مساء عصام اتصل بيا تانى من نفس الرقم القديم وطلب منى اشحن له الرقم الجديد عشان عاوز يكلمنا منه وبالفعل أنا شحنت له كارت بعشرة. النيابة: ومتى تحديداً حدثت أول مكالمة هاتفية من شريحة الهاتف المحمول والتى قمتى بتسلمها لنجلك والذى قررتى سلفا بالتحقيقات أنها تحمل رقم 01555164916؟ والدة عصام: بعد ما شحنت له كارت بعشرة المكالمة كانت الساعة 11 مساء. النيابة: وعلى أى هاتف محمول قام المجنى عليه بمهاتفتك من الخط سالف البيان؟ والدة عصام: مش فاكره النيابة: ما فحوى الحوار الذى حدث خلال تلك المكالمة؟ والدة عصام: هو كلمنى طلب يتكلم مع والده وكان عاوز أبوه يروح يشتكى نور حسن للنائب العام بس أخوه محمد كلمه وشد معاه فى الكلام وقاله لو قدم شكوى هو هيتعذب زياده. النيابة: وهل تلك المكالمة يقوم بها المجنى عليه إليكم من الهاتف المحمول؟ والدة عصام: أيوه النيابة: وما هى الفترة الزمنية التى استغرقتها تلك المكالمة الهاتفية؟ والدة عصام: حوالى ربع ساعة. النيابة: وما الذى حدث عقب تلك المكالمة؟ والدة عصام: بعد ما عصام كلمنا وكلم أبوه وأخوه قفل وانقطعت الاتصلات لحد ما اتصل بينا تانى يوم الأربعاء 26/10 الساعة 11 بالليل. النيابة: وما مضمون تلك المكالمة؟ والدة عصام: هو طلب منى اشحن له كارت تانى بعشرة وشحنت له وساعتها قالى روحى علشان هيتصل بينا هو. النيابة: هل قام بمهاتفتك عقب ذلك؟ والدة عصام: أيوه هو اتصل لما روحت وكلمنى وكلم أبوه وسأله إذا كان قدم شكوى فى نور حسن ولا لا وأبوه قاله إنه هيقدمها ومحمد أخوه كلمه ساعتها وشد معاه فى الكلام وقاله خليك راجل علشان لو اتقدمت شكوى هتتأذى بعدها قفل وعرفت من بناتى الاثنين بعدها أن هو اتصل وكلمهم عشان يطمن عليهم وبعد المكالمة دى معرفتش حاجة غير أنه فى المستشفى النيابة:وكيف نما إلى علمك بكون نجلك متواجد فى أحد المستشفيات؟ والدة عصام: يوم الأربعاء لما كلمنى قالى إنه تعبنا ويوم الخميس حوالى الساعة 4 العصر اتصلت بيا واحده جارتى اسمها فايزة من عابدين قالتى ابنك تعبان أوى فى المستشفى روحى شوفية وبعدها مباشرة كلمتنى إيه وطلبت منى أقابلها فى السيدة عيشة عشان نروح نشوف عصام. النيابة: وكيف نما إلى علم المدعوه فايزة بكون نجلك مريض آنذاك؟ والدة عصام: فايزة عرفت من بنتى الكبيرة اسمها ياسمين بأن فى واحد اتصل بياسمين وقالها إن عصام تعبان النيابة: وما هو الاسم الثلاثى لفايزة؟ والدة عصام: فايزة ده اسم الشهرة والاسم الحقيقى ليها زينب أحمد خليل ومقيمة فى 4 حارة عبد الدايم عابدين النيابة: وكيف نما إلى علم من تدعى آية بكون نجلك مريض؟ والدة عصام: معرفش النيابة: ما التصرف الذى بدر منك عقب علمك؟ والدة عصام: انا قابلت آية فى السيدة عيشة 5 مساء ولفينا على مستشفيات كتير لحد ما رحت القصر العينى حوالى الساعة 8 عرفت ان ابنى فى مركز السموم اللى بجوار طب أسنان. النيابة: وما التصرف الذى بدر منك آنذاك؟ والدة عصام: رحت مركز السموم وهناك مفيش حد كان راضى يدينى معلومات لحد ما عرفت ان ابنى توفى وانه هو فى تلاجة وساعتها كان أبوه واخواته جم ودخلت ان وأبوه التلاجة بالعافية علشان اشوف عصام. النيابة: وما هى الحالة التى شاهدت نجلك عصام عليها؟ والدة عصام: انا لقيته نايم ووشه وارم ومتغطى ببطانية ومناخيره بتنزف دم وجمسه وارم وبطنه منفوخة وكان فيه رغاوى على بقه من المسحوق اللى كان شاربه مختلط بالدم. النيابة: وما الذى حدث بعد ذلك؟ والدة عصام: بعدها احنا طلعنا من التلاجة لحد لما ابنى ودوه المشرحة ودا كل اللى حصل. النيابة: وهل كان نجلك متعاطى لأى مواد مخدرة؟ والدة عصام: لا النيابة: هل كان نجلك يعانى من أى أمراض نفسية وعصبية؟ والدة عصام: لا النيابة: كم عدد المرات التى اتصل بك من الهتاف المحمول الجديد؟ والدة عصام: مرتين النيابة: وعلى أى هاتف محمول تحديدا يهاتفك من خلال هذا الرقم؟ والدة عصام: مش فاكره النيابة: وكم عدد المرات التى قام نجلك بمهاتفت والده آنذاك؟ والدة عصام: مرتين من نفس الرقم النيابة: ما سبب قيام الضابط بالتعدى على نجلك؟ والدة عصام: معرفش النيابة: وما هى الأفعال المادية التى مورست قبل نجلك؟ والدة عصام: ضربوه وعذبوه دا غير انهم حطوله خرطوم فى فتحة الشرج وشربوه 2 لتر ميه مسحوق غسيل النيابة: ما قولك فيما قرره أحمد السيد صديق من أنه عقب عودة نجلك وعقب توقيع الكشف الطبى قرر بقيامه بتناول أقراص وعقاقير ومواد مخدرة أثناء الزيارة الخاصة به؟ والدة عصام: الكلام دا محصلش لان انا اتفتشت اثناء الزيارة النيابة: وما تعليقك فيما قرره سالفى الذكر؟ والدة عصام: الظابط هددهم النيابة: ما علاقتك بالظابط نور حسن؟ والدة عصام: انا معرفوش ومشفتش شكله النيابة: ما قولك فيما قرره نجلك محمد عطا من ان الهاتف المحمول الذى قمتى بادخال شريحته للمجنى عليه يحمل رقم 01155164916فى حين اقرارك سلفا فى التحقيقات تحمل رقم 01555164916 ؟ والدة عصام: ده الرقم الى أنا دخلته لابنى واللى انا قدمت كرتونه بتاعته النهارده تحديداً النيابة: بما تتهمى الظابط نور حسن؟ والدة عصام: انا اتهمة بموت ابنى. النيابة: ومن تحديداً الذى قام بإتيان تلك اأفعال ؟ والدة عصام: ضابط اسمه نور ومعاه 3 مباحث معرفش أسماءهم. النيابة: وكيف نما إلى علمك بوجود 3 أفراد برفقته؟ والدة عصام: ابنى اللى قالى انه هما الثلاثة اللى كانوا موجودين أثناء الزيارة وطردونى بره. النيابة: وما قصد الضابط نور ومرافقيه من أفراد الشرطة؟ والدة عصام: معرفش النيابة: ما قولك فيما قرره كل من أحمد السيد عبد الرحمن وأحمد السيد صديق ومحمد على السيد والسيد عثمان محمد وسيد رزق من أنهم قد أبصروا نجلك المتوفى وهو فى حالة إعياء شديد وسألوه عما أصابه قرر لهم بتناوله طعام فاسد؟ والدة عصام: لا محصلش النيابة: ما قولك فيما قالوه إنه عقب ذلك فانه قد تم عرضه على طبيب مستشفى السجن والذى قام بإسعافه إلى أن تم عودته لمحبسه وتحسن حالته؟ والدة عصام: ده محصلش النيابة: هل لديكى أقوال أخرى؟ والدة عصام: لا
