تداول العديد من الشباب على الموقع الاجتماعى الشهير "الفيس بوك"، وبعض المدونات، رسالة تخيلية من الجنة، بعثها الراحل "محمد علاء مبارك" فى ذكرى رحيله إلى جده "مبارك"، كتبها أحد الشباب لتزامن الذكرى مع مطالب البعض بالعفو عن "مبارك"، وخاصة بعدما نشر بإحدى الصحف نعى لأسرة مبارك تتذكر فيه فقيدها، وهو ما أثار عدداً من التساؤلات حول هذه النعى، وظن البعض أنه محاولة للعب على مشاعر الشعب المصرى. وجاء فى الرسالة التخيلية من محمد علاء مبارك: (إزيك يا أمى وحشتينى قوى أنت وبابا وأخويا الصغير وجدو وتيتة وعمو جمال وكل أصحابى، ومصر كلها وحشتنى. يا أمى يوم 28 يناير أصحابى فى الجنة نادوا لى وقالوا لى تعال بسرعة يامحمد فى ناس من بلدك دخلوا الجنة قولتلهم مصريين؟! قالو أيوه دول شهداء كمان يا محمد، جريت بسرعة معاهم أشوف الشهداء اللى من بلدى وأسلم عليهم وأفتخر بيهم وكل يوم بيجى شهداء تانيين ولما كثرو قوى يا مامى وزادوا ووصلوا أكتر من 800 شهيد قلت لصحابى وأنا فرحان عارفين دا أكيد جدو بيقود مصر فى حرب تانية على إسرائيل أو أعدء تانيين. روحت يا أمى وقعدت معاهم علشان يحكولى عن جدو القائد واللى بيعمله واسمع بطولاتهم ولما سألتهم هى مصر بتحارب مين وأنتو استشهدتوا إزاى وفين؟، وجدو كرمكم قبل ماتيجوا الجنة! بصوا لبعض ومحدش رد!!! سألت تانى ردوا عليا مين قتلكوا؟ واتقتلتوا برصاص إسرائيل ولا مين؟ وجدو عمل أيه فى اللى قتلكوا؟ ولما بكيت لأول مرة لأن الجنة مافيهاش حزين قالولى لا مش إسرائيل ده رصاص مصرى يا محمد حراس جدك يا محمد هما اللى قتلونا، لقتنى مش فاهم حاجة صرخت وقلت مش عاوز أسمع حاجة وجريت ورحت قعدت لوحدى لكن الشهداء جم وقالولى متبكيش يا محمد أنت ملكش ذنب وخدونى فى حضنهم وطبطبوا عليا حسيت بدفا حضنك يا أمى وهما بيضمونى فى صدرهم، رفعت راسى وقلتلهم أنتو طيبين قوى.... قالولى مش إحنا بس اللى طيبين ده كل المصريين طيبين. يا أمى أنا مش هاسأل حصل أيه ولا عاوز أسمع حاجة لكن قولى لجدو أنا مش أغلى من أى واحد منهم عند أمه وزى ماحسيتى يوم ما أنا مت أوصفى له كل أم حاسة بأية دلوقت وقولى له أنت لأنى أنا مخاصمه إزاى هان عليه كل الناس دى ومعملش حاجة للى قتلهم. قولى له لازم يبرد قلوب الأمهات والأبهات دا الابن غالى وأنت عارفة يا أمى قوليلوا إنه خلاص مبقاش ينفع يبقى رئيسها بعد اللى حصل، جدو لازم يرتاح فى بيته ويسيب مصر لولادها هما أولى بيها ويسيبهم فى حالهم ويحاول يصلح اللى عمله أو اللى أخده وأنا هادعى له ربنا يغفر له. أوعى يابويا أخويا الصغير يأكل ويعيش ويتربى بمال مش من حقه وفيه مصربين كتير مش لاقيين. ساعتها تبقى كتبت عليا أفارق أخويا دنيا وآخره لأنه لازم يتربى بمال حلال عشان أقابله يوم فى الجنة، وقولى لجدو وتيتة وعمو جمال وطنط خديجة إن الجنة حلوة قوى أحلى من أى حاجة ولا أى مليارات مش حلال تستاهل يضحوا بالجنة عشانها دا ربنا بيسأل عن كل جنيه كسبته إزاى وصرفته فى أيه؟ والسلام عليكم يا عيلتى اللى بحبها).
