أهدى الفنان خالد الصاوى أهل السويس قصيدة بعنوان "أرض السويس"، والذى قام بتأليفها خصيصا لشعب السويس، وجاء نصها كالتالى: قالوا: السويس مولعة، أنا قلت: إيه؟! صهيونى ثانى ولا إيه؟؟ قالولى : مصرى! قلت: ليه؟؟؟ قالولى: عبد وكتِّفوا برشاش إيديه يعنى السويس الحرة ست البيوت إللى الشهادة تحتها تصبح مزاج تصد جيش داوود بغنوة سمسمية وشبابها يأتوا المعجزة جوة الطاغوت ييجى عليها اليوم وتولع من نيرون؟؟ والشعب ياخد طلقته فى الظَّهر ليه والغدر مين دلُّه على بيوت السويس؟ يا عبد وأنت مسلسلك عبد ابن عبد ومسلسلين كده كلكم جوة التابوت يا موحشين شكل الحياة.. يا ناس روبوت بالأمر تفهم، وإن فهمت تموت قوام شنبات غليظة والعصا وكروش تقرَّف ودم أهلك فى الهزار لا تقول وتوصف تضرب قنابل فى السويس إزاى يا نيلة؟ وتنسى نفسك فى الدمار وترد ديب ما تقولش مصرى اتحرمت والله عليك الشكل واحد واللسان والغمازات بس القساوة حفَّرت جواك خرابة تمد إيدك بالغبا على ناس غلابة وتجرّى أصحاب البيوت جوة السويس يا ضيف ثقيل.. يا عار يا شوم الموت مفحفح من هدومك والبيادة يا خسارة التعب اللى راح على دى الرباية يا ضبع، يا محتل، يا نحس الجراد يا خاين اللقمة، يا دون، يا ابن الحرام خسارة فيك والله التحية العسكرية وإن مت ما تعتِّبش من باب الشهيد يا شىء، يا ميكروب التعاسة والأسى يا عبد خانع بالنجوم والكتَّافات حل القيود وارتد راجل مش نفر وخللى عندك مالخشا ومن النظر ده أنت فى سويس الحب فى سويس المقاومة يعنى انحنى واخشع.. واخلع ناعِليك ملِّس على بيوت السويس والسمسمية طبطب على البحر الكبير والبمبوطية واطفى السيجارة عند شارع الأربعين ومللى عينك ماللى كافحوا من سنين وارمى الحمول فى المينا واركبلك بلا نص خش استحمى اياك تفوق وصلى -مسلم أو مسيحى- خش صلى بالدموع ياللى أنت راضع غاز مسيّل للدموع وكُح دم إياك تعود زى أما كنت تترد لك حتة ضمير وتتوب على أرض السويس يذكر أن الفنان خالد الصاوى من ضمن الفنانين المعارضين للنظام، وقد شارك فى يوم الغضب بعد صلاة الجمعة 28 يناير الماضى، وعبر مع المتظاهرين إلى ميدان التحرير.
