◄ كابتن حسن الماتش ده ودّى.. ولا لأ.. طب لو.. ودّى.. خرجت إسلام بعد 40 دقيقة ليه؟! ◄ ليه قلت لكريم شحاتة عن "قرصة ودن" أحمد على.. ولا كريم مش إعلام؟! ◄ حيرتنا.. تزعل من النقد.. ومش عايزنا نزعل ونتقهر على بلدنا لما نتغلب.. حتى لو.. ودّى يا سيدى؟! اعتبرها رسالة.. اعتبرها رجاء.. اعتبرها زى ما تعتبرها.. بس لأجل النبى اعتبرها !! بداية ملخبطة أعذرونى عليها لأنى حاولت أكتب كلام عن مباراة منتخبنا مع قطر، وكل ما أبدأ أقول: لو كتبنا نقد ها يزعل.. طب تنويه.. برضه ها يزعل.. طب رصد أكيد ها يزعل.. ممكن رسالة.. أكيد مش ها يقبل! مرة تانية اعذرونى هو ده المعلم شحاتة من ساعة خروجنا من تصفيات مونديال 2010 الله لا يعيد الخروج ده قولوا آمين، وزادت قوى بعد فوزنا بكأس أمم أفريقيا 2010 بأنجولا.. من وقتها أصبح المعلم لا يسمع إلا نفسه ولا يرى إلا إنجازاته وإنجازات رجاله، اللى كرمناهم أكتر حتى مما أعطوا لبلدهم.. اللى هى بلدهم زى ما هى بلدنا. حاولنا نلقى الضوء على وجوب التغيير وبدء عملية تجديد الدماء لأنها سنة الحياة.. يعنى تنفع سنة الكرة طبعاً! لكن نقول لمين؟.. هو فيه حد بيحب مصر وبيفهم فى الكورة زى المعلم.. طبعاً لأ! يقول بعد مباراة النيجر التغيير وجوبى.. وقبلها قال: أى نتيجة غير الفوز تعنى نهاية جيل، ثم يرجع فى كلامه ونطلع إحنا غلط.. قلنا ماشى! يقول هغير.. يعنى ها يبدأ يتعامل مع نجم النجوم أبو تريكة ورفاقه باعتبارهم رصيد ضخم فى بنك الكرة المصرية واستخدامهم يحتاج لوجودهم كعناصر خبرة، يشاركوا فى أوقات الحاجة فيزيد شكل الفريق فنياً.. ثم يرجع برضه فى كلامه ويعطى كتيبة 2006 و2008 وعشرين عشرة كل الاهتمام من جديد.. برضه قلنا ماشى! يقول مباراة قطر ماتش بجد أو رسمى بعد مباراة أستراليا، اللى الفوز فيها كان بمثابة "اللعنة" والعياذ بالله على الفراعنة، ويرفض أن يتحدث للإعلام الغلبان اللى همه الأول والأخير المواطن أو الشعب العظيم اللى بيصنع النجوم على حساب قوت أولاده.. ويتحدث فقط للإعلام بتاع "الحبايب" والمحاسيب نقول ماشى.. لكن لحد إمتى ها نفضل نقول ماشى؟! ولحد إمتى كلام المعلم لا راد له إلا قضاء الله؟! مرفوض أن نناقش الاختيار الزى يحمل أحيانا ما يحتاج لتفسيرات عظمى أكبر من فهمنا المتواضع؟! مرفوض أن نناقش طريقة اللعب.. أو سن النجوم.. أو عدم وجود نجوم الكل يتفق على جدواهم إلا المعلم! مرفوض أن تناقش عملية تجديد الدماء.. رغم أن كل اللاعبين المختارين فى كل المعسكرات تم اختيارهم على الأقل مرة أو مرتين منذ تولى "أبو على" مسئولية تدريب الفراعنة أواخر 2004.. وأرجعوا للأوراق الرسمية.. والأوراق الشعبية وأى أوراق تعجبكم! مرفوض أن نسأل لماذا لم يختار المعلم عبد الله السعيد.. أو نسأل حتى عن "جملة مش مرحلته"؟! مرفوض أن نسأل شيكابالا مستبعد ليه؟! مرفوض أن نسأل عن تصريح المعلم حول هروب شيكابالا.. تم اعتماد التقرير الطبى الأبيض من طبيب المنتخب؟! مرفوض أن نسأل المعلم عن قناعته بأن شيكا يهرب من خدمة بلده.. وفى هذه الحالة لازم يكون فيه قرار نهائى.. مينفعش فيه "جورج قرداحى".. لأنه لازم يكون قرار المعلم طبعاً.. بس عدى يا ليلة؟َ! مرفوض أن نسأل لماذا اختار الحضرى فى عز أزمته مع الأهلى ليتم تجهيزه حرصاً على المنتخب؟! ثم يرفض من جديد أى تساؤل عن رفض وجود الحضرى "الموقوف مؤقتاً".. ليتم تجهيزه برضه.. حاجة تحير مش كده.. والنبى؟! مرفوض نناقش غياب "ميدو" أحد أهم مشاهير الكرة المصرية والعربية والأفريقية.. ومرفوض برضه أن نسأل متى تنتهى "قرصه الودن" وتستفيد مصر من أولادها يا معلم؟! مليون مرفوض.. ومرفوض.. بس اللى عدى غير اللى جاى مش ها يفوت لأنه طبعاً مش مرفوض أن نسأل المعلم عما سيفعله إذا لم ينجح فى التأهل لأمم أفريقيا 2012 و 2013.. حتى لو لم يجب؟! ومش مرفوض أن نسأله ها يعمل إيه لو خرجنا "بخفى حنين".. "والفاصلة".. و"سوء الحظ" و"التوفيق" وكل "قواميس" الخروج وأخواتها من تصفيات مونديال 2014.. والعياذ بالله.. وهل سيظل يحدثنا عن انتصارات "2006 آخوان"؟! ومش مرفوض ولا ها يكون مرفوض، وإنما مفروض أن يرد علينا: هى مباراة قطر لو ودية ومش مهمة.. طب خرج إسلام عوض ليه بعد 40 دقيقة؟! وليه كان "نرفز" جداً وجرى فى اتجاه الحكم بسبب حته فاول لا يودى ولا يجيب فى الودية.. وليه قال هو وشوقى غريب قبل السفر إنها مباراة جادة وشبه رسمية؟! مفروض كمان يرد علينا هيعمل إيه الفترة الجاية.. ونقل الدم هيتم إزاى! مفروض يرد علينا ويقول "قرصه ودن" شيكابالا و"ميدو" ها تنتهى إمتى؟! مفروض كمان يرد ويقول لنا إيه حكاية "قرصة ودن" أحمد على مهاجم الإسماعيلى، اللى عرفناها من الإعلامى كريم حسن شحاتة.. يعنى يرد علينا زى ما بيرد على كريم.. ولا كريم شحاتة مش إعلام؟! مرفوض إن المعلم شحاتة يزعل من النقد لدرجة إن اللى بينتقده يعتبر بينتقد مصر.. تخيلوا؟! اللى ينقد شحاتة مش مصرى.. تخيلوا.. اللى حصل فى قطر مسئول عنه الإعلام تخيلوا؟! المعلم بيزعل خالص قوى لدرجة "الكره" من النقد الإعلامى؟! بس بيرفض إن إحنا كمصريين نزعل لما بلدنا تخسر ولو مباراة ودية كان فيه 45 ألف مصرى موجودين فى استاد خليفة نفسهم يناموا فرحانين.. لكن مفروض إنهم يحمدوا ربنا أن المعلم راح هناك.. كفاية عليهم كده قوى! يا معلم مفروض كمان نزعل لأن كل انتصاراتنا معاك دايماً يا بعد المرور من عنق الزجاجة.. يا بعد الفاصلة.. يا بعد ما تطلع روحنا علشان أنت ما تزعلش.. ليه يا عم.. هو فيه إيه؟! يا معلم ده ربنا بيسمع الناس.. أنت مش عايز تسمع لنا ليه؟!
