إسلام حسن شحاتة يكتب: فخور إن أبويا حسن شحاتة قبل ما أكتب أي حاجة بجد لازم أقول إني فخور إن بابا يبقي حسن شحاتة، الرجل اللي فرح مصر كلها مع لاعيبه المنتخب، الحمدلله إن ربنا نصره لأن مفيش حد يعرف هو تعب إزاي في الفترة الأخيرة خصوصا بعد ماتش الجزائر في السودان. كثير من الناس معرفتهم بحسن شحاتة قدام كاميرا التليفزيون وبس، الرجل اللي كان بيظهر منفعل أمام الكاميرا مع كل هجمة لينا أو علينا مش أكثر من كده، أنا عايز أقول لكم إن حسن شحاتة بعيد عن الماتشات والمعسكرات والكلام ده كله من أحسن الشخصيات اللي ممكن تعرفوها في حياتكم. بابا بالنسبة لي مش مجرد أب بس، أنا بعتبره واحد صاحبي وهو معودني أنا وكريم علي كده من واحنا صغيرين، بيتعامل معانا بصراحة وبثقة وبصحوبية، ومع ذلك عينك ما تشوف إلا النور لما بيكون متعصب ومتنرفز، إحنا علي طول وقتها بنبعد من قدامه، لأنه وقتها مش بيعرف يتناقش وبينفذ رأيه هو وبس، وبالرغم من كل عصبيته دي إلا إنه عمره في حياته ما ضربنا، لأ وكمان بيكون في قمة الهدوء بعد دقيقتين بس من ثورة العصبية، ولما بنقعد معاه ونتناقش علي طول بيقتنع بكلامنا، لكن وهو عصبي بنبعد عنه فورا. حاجة كمان محدش يعرفها عن حسن شحاتة في البيت، وهي إن بابا طباخ درجة أولي بيعمل أصناف حلوة أوي وخصوصا صينية البطاطس في الفرن، وأم علي، وكذا صنف تاني، وده لأنه بابا عاش كتير لوحده في الغربة وكان بيعتمد علي نفسه في كل حاجة. أهم حاجة في بابا إنه طيب جدا لدرجة مش معقولة، بيرفض تماما يزعلنا حتي لما بنكون عاملين حاجة غلط، طريقة العقاب بتاعته بتكون إنه يخلينا إحنا نعاتب نفسنا، لما بيحسسنا إننا مزعلينه، وكمان عمره ما فرق في التعامل بيني وبين كريم، مع اني بحس الصراحة أنه بيحبني أكتر شوية عشان أنا الصغير وكده. علي فكرة دي نفس الطريقة اللي بيتعامل بيها مع لاعيبه المنتخب عمره ما فرق بين لاعب والتاني خالص، وده سر نجاحه مع المنتخب فعلا.. آخر حاجة نصيحة أقولها لبابا إنه لو جاله عرض رسمي لتدريب نيجيريا ياريت يروح لأنه دي حاجة كويسة لاسمه واسم مصر بجد، مع إنه مش عايز يسيب المنتخب خالص، لكنها خطوة كويسة ياريت يوافق عليها. كريم شحاتة يكتب: سرك في بير يا بابا طبعا لو اتكلمت عن كابتن حسن شحاتة المدير الفني لمنتخب مصر وإنجازاته وبطولاته هحتاج لمقالات أفضل أكتب فيها أيامًا وشهورًا وسنين، لكن لو اتكلمت علي بابا حسن شحاتة مش هحتاج غير أني أقول «حبيب قلبي». أبويا حسن شحاتة بجد راجل زي العسل يعرف إمتي يكون بابا وإمتي يكون صاحبي، أنا فاكر وأنا صغير إزاي كان دايما يخاف علينا من نزولنا للشارع لوحدنا أنا أو إسلام، وكان عامل قواعد معينة لتأخيرنا بره البيت، بس لما بدأنا نكبر سنة ورا سنة بدأت القواعد دي يفكها شوية، وبقي يقول لنا عملتوا إيه مع اصحابكوا، وسهرتوا فين، وكلام بتاع واحد صاحبي مش مجرد استجواب من أب لابنه، عشان كده دايما بتكلم معاه بصراحة لأنه عمري ما خوفني منه، وده عودني أني أقول له علي كل حاجة بتحصل لي بصراحة، وللسبب ده أسراري كلها مع بابا، وكمان في المقابل هو كل أسراره معايا وبنتكلم فيها كأصحاب عادي، وأنا بس عايز أوجه رسالة لبابا بعد السطر الأخير ده وأقول له متخافش يا معلم حسن مش هكتب حاجة، أنت صحيح سرك معايا بس سرك في بئر زي ما اتعودنا. بابا من الناس اللي تكسبها جدا لما تكون صريح معاه ويحترمك ويعتبرك صاحبه وهو فعلا صاحب صاحبه بجد، وأنا بشوف ده في تعامل بابا مع أصحابه والناس اللي بتحبه بجد، أما الناس التانية اللي متستاهلش إنه يتعب نفسه في التوضيح لهم والرد عليهم، مبيحاولش يرد لأنه عارف إن مفيش فايدة واللي قلبه مش صافي هيفضل طول عمره كده. عايز أقول كمان إن حسن شحاتة ابن نكتة أوي، وعلي طول بيحب الضحك سواء معانا في البيت أو مع اللاعيبه في المنتخب، وبجد ده أنا بعتبره من أهم أسباب نجاح بابا في شغله، لأنه مفيش حاجة مش حلوة بينه وبين حد في اللاعيبه أو الجهاز وبيتعامل معاهم بموده زي ما هي عادته علي الطبيعة.. بجد بحبك يابو علي. ينشر بالاتفاق مع جريدة عين