أصدقاء وصديقات..إضافات..ناس ما شفتهمش من عشرين سنة..ناس قرايبك..زمايل فى الشغل..مديرك..أخواتك..ناس غريبة وناس عبيطة وحاجات تانية كتير!! وتكتشف بعدها العجب العجاب! أصدقاء الماضى كانوا-كما كنت أنت- فى قمة الحماس للبحث عنك وإضافتك وبعد أسبوع من هاى وباى ولازم أشوفك بحححححح تحولوا لكائنات فضائية صامتة!!وتحولت أنت معهم كذلك! زمايلك فى الشغل ومنهم اللى صاحبك بجد واللى ما بتطيقش تقوله صباح الخير!! والمصيبة انتوا الاتنين بتضيفوا بعض!!! ويقعد كل واحد فيكم كل ما يقرأ كومنت عن التانى ينفخ ويقول-جاتك نيلة تاخدك! طيب بتضيفوا بعض ليه؟؟؟ بيقولوا إن القصد من الفيسبوك كان الصداقة!! وهو حد شايف إن دى صداقة؟؟ واحد حبيب قلبك من جوه.. وهو اللى طلب يضيفك وبعدما ضيفته تلاقيه قافل كل صوره- وده من حقه- وقافل الوول ومش عارف تكتبله عليه حتى كلمة بم !!وقافل المعلومات اللى عنه!! وكأنك ضيفت ظابط مخابرات!!! يا شيخ اتلهى وهو احنا كنا عاشقين بعض فى الضلمة!! وإنت كنت ضيفتنى ليه أساسا؟! ناس غريبة اللى بروفايلة عمر ودياب واللى صورتها أليسا والمصيبة السودة لو ضيفتهم ودخلت تقرأ تعليقات صحابهم تلاقى واحد أهبل-مثلا- كاتب تحت صورة لأليسا اللى احنا نعرفها (إيه الجمودية دى يا نفيسة)!!!وهو يا حبيب ماما انت بتستهبل نفسك!!! وهو فيه نفيسة ممكن تبقى أليسا أو نانسى أو شارون أو أنجلينا؟؟ دا غير الأقرع اللى بكرش وحاططلى صورة توم كروز! وهو فيه عيب إنك تبقى من غير شعر أو تخين بس عايش نفسك مش حد تانى!! وقرايب ليك تضيفهم وتكتشف أنهم مش عايزينك تعرف عنهم حاجه أو ضافوك على مضض!!وحد يدليتك وتكتشف بعد كدا إنه دليتك لأن الفريندز عنده كان فيهم 200 ساقطة وهو المعروف عنه إنه الشيخ الشعراوى!! وناس يضيفوك عشان يراقبوا حياتك وينفسنوا وينقوا ويعرفوا أسرارك ودول بتشوفهم كل يوم على الحقيقة وبيدخلوا كل يوم الفيسبوك يمققوا عيونهم عندك بس ولا عمرهم قالولك مساء الخير يا عم الحج! ويروح الفيسبوك يخترع أوبشنز الخصوصية واقفل ده وبلوك دا وحدد دا وازنق على دا واخنق دا!!! ايييه يا "أخونا"؟؟؟ ملعون أبوها عيشة !!!هو أنا داخل وكالة ناسا للفضاء؟؟ ليه مش صادقين مع نفسنا ومع الناس؟؟ ليه ما نقولش للى ما بنطيقوش فى وشه بقولك ايه فكك منى؟ ليه ما بنعش بحقيقتنا فى الفيسبوك زى براه؟؟ ليه بنافق ونفسن وندارى ونمثل؟ دور فى الفريندز عنك ..اقسملك بالله من فوق سبع سماوات انه فى كل 100 أنت ضيفتهم فيه 3 أو 4 بالكتير هما اللى صحاب بجد!! هما اللى رجالة وستات جدعان.. يقفوا جنبك ويفدوك بحياتهم.. وفى 3 أو 4 هما اللى أهلك بجد زى ما قال ربنا فى كتابه!!! طيب واحنا ما كناش نقدر نعرفهم إلا على الفيسبوك؟! طبعا كان ممكن. لكن النفوس البشرية بتعقيداتها وتشكيلاتها الغريبة.. وجنون البشر اللى مخليه مش فاهم هو عايز إيه أصلا.. والتخلف العقلى اللى احنا عايشينة هو اللى خلانا كلنا نحس إن الفيسبوك ده من أساسيات حياتنا!! وإن كنت أنا شخصيا أجزم أنه أسهل وسيلة لمعرفة الأشخاص على حقيقتهم وبكل كلاكيعهم وديفوهاتهم اللى بيحاولوا يخبوها قدام الناس.. أنا بس عندى اقتراح أخير. ليه تبعت إضافة لحد انت مش حابه أصلا؟؟!! أرجوك بلاش.. ليه تضيف حد هاتقفل عليه 7 أبواب زى جهنم ؟؟ماضيفوش ياسيدى! ليه مستحمل فريند غتت وابن لزجة عندك وخايف تدليته..دليته وابعتله ماسج قوله أنت لزج أخر 3 حاجات! ليه بتزعل لوحد دليتك!!!؟؟؟ ماهوه اللى خسران أصلا.. دا لو أنت شخصية جامدة وما بيهمكش حد. راجع الفريندز بكل شجاعة وانسفهم لو بجد مش فريندز وبلاش مبدأ اللى ما تحتاجش لوشه بكرة تحتاج لقفاه عيش حقيقتك وأفكارك وصورتك بلاش زيف وخداع ..كله عارف كله. فبلاش تدعى إنك مثقف..ابن ناس..هاى كلاس..ريتشى مان..رقيق موت..شيك آخر حاجة خليك أنت وطزززز فى اللى مش عاجبه وأخيرا ومن غير أى خوف لو أنا مش عجبك وعندك فى الفريندز يبقى فيس بوكك منى.
