أكد المخرج محمد دياب، والذى يشارك بفيلم "اشتباك" فى مسابقة "نظرة ما" بمهرجان "كان"، أنه لا يشعر بالحزن بسبب عدم حصول الفيلم على جائزة من المهرجان، ولكنه حزين لرغبته فى وجود شىء جيد يسعد المصريين. وكتب "دياب" على صفحته على "فيس بوك": "السبب الوحيد اللى مخلينى زعلان إننا مخدناش جايزة، كان نفسى الناس تلاقى حاجه تفرحها وسط الغم، وإن كل شاب محبط يحس إنه يقدر يوصل لأى حلم حلمه.. الأيام اللى فاتت حسيت إنى محمد صلاح لعيب الكورة اللى بقى مصدر السعادة الوحيد وهو بينجح وبيرفع راس مصر بين أهم أنديه العالم". وأضاف دياب: "مع كل خبر عن الاستقبال الإيجابى للفيلم أو عن اختيار النقاد ليه من أهم 10 أفلام فى المهرجان، أو اختياره من الخمس أفلام المدعومة من رابطة السينمات المستقلة فى فرنسا كنت بشوف الناس بتفرح كأنه جون لمصر فى كاس العالم". وتابع دياب: "الحاجة الحلوة إن اللخبطة اللى عايشنها فى مصر بتتحول لمصدر إلهام فنى لجيل جديد.. معنديش شك إن كل مهرجانات العالم وأى تظاهرة فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم.. كنت هتضايق لو كنت حاسس إن وجودنا هنا صدفة ومش هيتكرر، بس ده اجتهاد وتعب وعرق وتفكير وأكيد مكلل بتوفيق ربنا.. عشان كدة متأكد إن لينا جولات تانية كتير". وقال المخرج محمد دياب: "يمكن تكون رحلة مهرجان كان انتهت، بس رحلة اشتباك لسة بادئة فى كل مهرجانات العالم، ولو الدعم اللى شايفه منكوا اتوجه لقاعات السينما فى مصر، ساعتها هنشوف أفلام زى اشتباك، وأحلى من فنانين كتير محتاجين دعمكوا". وأضاف المخرج: "نفسى أشكر كل إنسان باركلنا أو دعمنا أو دافع عن الفيلم (خاصة الزملاء الفنانين)، وبعتذر إنى معرفتش أرد على كل واحد وأشكره بنفسى، وشكرا ليوسف شاهين ويسرى نصر الله وصناع ال23 فيلم مصرى اللى شاركوا قبل كدة عشان إنتوا اللى فتحتولنا الباب هنا، وشكرا لكل الفنانين المصريين اللى مستوى شغلهم تطور فى السنين اللى فاتت، واللى كانوا مصدر إلهام شخصى". واختتم دياب: "وأهم شكر للى آمنوا بالفيلم وقت ما ناس قالت مستحيل يتعمل، وكل شخص اشتغل فى الفيلم وعمل أضعاف المجهود.. واللى هيشوف الفيلم ده هيعرف قد إيه اللى اشتركوا فيه بيحبوا بلدهم، وزى ما قولت قبل كدة احنا كسبنا أهم جايزة وهى احترام العالم". موضوعات متعلقة.. المخرج محمد دياب: فيلم "اشتباك" رسالة عن الإنسانية
