ليه القتل وليه التار؟ تعالوا نعيش الدنيا عمار تعالوا نسامح بعض ونصفح نلاقى الحب طرح أشجار بلاش نخلى حياتنا عذاب هروب وتربص ليل ونهار لمَّا بإيدك تاخد حقك تصبح غابه وتبقى دمار لمَّا بتقتل نفس بريئه غضب المولى عليك والنار معانا قانون يدينا حقوقنا ميزان العدل دا لينا شعار تيتم طفل برىء إيه ذنبه؟ وتقتل حلمه فى عز خضار جبن وغدر كمان وخيانه لمَّا تهاجم ناس أبرار تقتل تدبح تفسد أرض تخطيط لجريمه فيها اصرار قسوة قلب بشكل غريب لو قلنا صخور نظلم أحجار دايرة حرب أديها مفتوحه نفس الخطأ يجيب تكرار لمَّا الدم الطاهر يسيل طعم الدنيا هيبقى مرار هتعيش محروم من كل أمان هتعيش متهدد قط وفار وكل أمالك راح تتحطم وحابس ابنك بين أسوار حل مشاكلك قبل ماتكبر شوف أسبابها وطفى شرار بنشكر أيوا جهود الشرطه بس الكل عليه أدوار إعلام تعليم ورفع الوعى تحسين دخل كمان أفكار لسَّا صعيدنا حقيقى محروم محتاج نظره ياناس ياكبار بتجيب سلاح بقوت أولادك وتزرع حقد ف قلب صغار بتقتل أحسن ورده فى أسره وتقول العيله غسلت عار ليك السجن أديه مستنى وابنك سابك هرب وطار بيتك بجهلك كله ادمَّر خراب وغراب عشعش فى الدار سيبوا عادات الجهل تموت ضميرنا ودينا وليه نحتار دا التار عمره ما حل مشاكل ندم ودموع وبيت انهار