55 قاعدة للتعامل المريح بين البنت والولد.. للشباب: أكل مراتك صحى ومفيد المشكلة إنك اتعودت على أكل مامتك.. اعرف حبيبتك عايزه إيه من غير ما تقول.. للفتيات: الراجل صاحب الريموت الأول والأخير

رغم حاجة كل منهما للآخر، واستحالة الحياة بدون أحدهما، فإن الصراع بين الولاد والبنات لا يتوقف، والمعركة هذه المرة دارت رحاها على صفحات الفيس بوك، فقد قام كل فريق برصد أشهر قواعد البنات والولاد، حيث قام الولاد بإبراز المظاهر السلبية ونقاط الضعف عند البنت المصرية.
وكانت أول قاعدة هى البنت دايمًا صح وأنت غلط.. مش فاهم ليه لسه فيه رجالة بتقاوح فى الموضوع ده مع إن فعلاً وفى أغلب الحالات (2٪) البنت بتطلع صح وفى الحالات النادرة (98٪) اللى الراجل بيطلع فيها صح بتكون لأنه السبب فى إن البنت غلطت وفى الآخر برضه لازم يروح يعتذر على ده.
أما القاعدة 2:إياك تسأل أى بنت مالك؟ لو لقيتها قاعدة متضايقة.. البنات بصفة عامة بيحبوا يقعدوا متضايقين وغالبًا ده ليه علاقة بالجينات والهندسة الوراثية.. لو قررت تبقى فدائى ورحت سألتها هاتديك الرد العبقرى (مفيش) وأنت ممكن تكون بالغباء الكافى وتصدقه.. فى الحالة دى هاتلاقيها ماشية تدندن (فيه حاجات تتحس ومتتقلش) وهتلاقى نفسك بتكرر السؤال تانى وتالت ومليون مرة لحد ما تبهرك بالرد التانى وهو: شوف أنت عملت أيه وأنت تعرف !.
أما رقم 3 كانت:أى أكل بتعمله مراتك هو الصحى والمفيد والطريقة الصح لعمل الأكل ده .. المشكلة إنك أنت اللى خدت على أكل مامتك مع أنه (ميتاكلش بصراحة) .!
4 كانت: أى بنت فى الدنيا مبتحبش تشترى لبس منتشر وفيه ناس كتيرة بتلبسه عشان تتميز عن الباقيين.. وده معناه إنك – لو لا قدر الله – فكرت تشتريلها لبس هدية روح اشترى درع رومانى عتيق أو زى خفاش بس يكون بينك .
ورقم 5: إياك تقعد ساكت قدام بنت وإلا هتسألك بتفكر فيه أيه .. هن ومهما حاولت مش قادرين يصدقوا إن الرجالة أغبى من إنهم يفكروا فى أى حاجة ذات قيمة وهيفترضن فورًا إنك بتفكر فى واحدة تانية ومخبى عنها بس باين عليك على فكرة وهى عارفة وساكتة بمزاجه .
أما رقم 6:البنت بتفهم فى الديكور وأنت لأ عشان دى حاجات بناتى وأنت أصلاً كنت عايش فى كهف ولو سابتك أنت تختار الديكور هاتعيشوا فى مقلب زبالة. !
وكانت القاعدة ال 7: البنت عايزاك تعرف هى عايزة أيه ومن غير ما تقوله.. ولو مجبتوش يبقى أنت يا غبى يا بخيل .!
وكانت القاعدة ال8: البنت بتقعد وقت طويل فى الحمام لأسباب ملهاش أى علاقة بالحاجات اللى بتدخلك أنت الحمام علشانها.. غالبًا هن بيدخلن.. يقفلن على أنفسهن .. ويبدأن حياة جديدة من داخل الحمام.
أما ال9: شعر البنت مهم جدًا ولازم تلاحظه وتاخد بالك من أى تسريحة جديدة عملتها حتى لو كان مجرد أنه متنعكش .. المهم تاخد بالك وتتبهر وإياك تقول رأيك بأمانة عشان أنت أصلاً شعرك وحش ومبتفهمش فى الموضة.
وقالوا عن القاعدة ال10 البنت بتتكلم عشان ربنا خلق لها لسان مش أكتر.. الفروق التلاتة بين الراجل والبنت لما بيتكلموا هو إن الراجل لما بيتكلم بيبقى عنده حاجة يقولها.. لما بيتكلم بيقول الحاجة دى فعلاً .. لما بيقول اللى هو عايزه بيسكت .!
أما القاعدة ال 11:البنت مبتتخنش إطلاقًا ووزنهن عمره ما بيزيد مهما أكلن.. الجاذبية الأرضية هى اللى بتضطهدهن .!
وكانت القاعدة ال 12 البنت لما بتمشى بتتحرك بخطوات بطيئة ولو عايز واحدة تمشى بخطوة سريعة قولها إن فيه تخفيضات على أول الشارع !.
وكانت القاعدة ال 13:البنت عندها أسماء تانية للحاجات غير المتداولة بين سائر البشر .. يعنى الكلب اسمه بوبى .. القميص اسمه شيميز .. والهدية اللى أنت جبتها فى عيد ميلادها اسمها العك اللى أنت جبته!.
وعن القاعدة ال 14:عيد ميلاد البنت هو مناسبة قومية وطنية لازم تاخدلها إجازة وتبدأ تحضرلها من قبلها بعشر شهور على الأقل ولازم تكون الهدية قيمة غالية بتقول إنك بتحبها وعارف بالضبط هى نفسها فى أيه، وذوقك هو نفس ذوقها .. من الآخر كده ليلة عيد ميلادها ارمى نفسك قدام عربية عشان تخلع .!
15:البنت لما بتضحك على أى حاجة بتقولها بيبقى عشان لقت إفيه هتقوله عليك لما تقابل صاحباتها بعد ما تسيبك .!
16:البنت متقدرش تشيل أى حاجة إلا إذا كانت هتحدفها عليك .!
17:البنت على طول زهقانة حتى لو خدتها فى جولة حول العالم وخضت معاها مغامرات مخضهاش أدهم صبرى فى حياته.
18 :البنت بتتعامل مع الطقم الصينى على أنه آثار نادرة لا يصح استخدامها إلا للطوارئ .. أنت كمان لازم تتعامل مع النيش على أنه مقبرة فرعونية لو دنستها هتجيلك لعنة الفراعنة .!
19 :البنت مبتعرفش تسوق ومش ذنبها إطلاقًا إنك كنت ماشى فى الشارع أو بتحاول تجرى من عربيتها وملحقتش .!
20:من حق أى بنت تقول على أى ممثل أنه قمور قوى فى حين أنه لازم يتطبق عليك الحد لو شفت مونيكا بيلوتشى ومقمتش جبت اللى بطنك امتعاضًا وقرفًا .!
أما القاعدة ال21:علاقة البنت بالتليفون هى نفس علاقتك بالكورة .. متحاولش تفهمها ولا تواجهها ولا حتى تتكلم فيها عشان متزعلش. !
22:أنت مبتقابلش صحابك إلا صدفة ودى غلطة بيقع فيها ناس كتير .. أصل لو عندك وقت تقابل صحابك يبقى ليه مقعدتش معاها .!
كما شدد الولاد فى القاعدة ال23 لو قابلت صحابك والبنت سألتك (هاه واتكلمتوا فى أيه؟) اديها رد يخليها تسكت .. قولها مثلاً: كنا بناقش نظرية نيتشه عن الجنس الآرى فى ظل المعطيات اللى ميشيل فوكو اتكلم عنها فى كتابه الأخير واللى دار رادوغا ترجمته عن الروسى .. تيجى أقرالك منه 3 فصول ؟!.
وكانت ال 24 هى:أى حلم بتحلمه أى بنت له دلالة ودايمًا التفسير حاجة من اتنين .. يا أنت ماشى مع واحدة تانية .. يا واحدة تانية ماشية معاك .!
أما عن القاعدة ال25:البنت دايمًا شايله بلاوى جواها وساكتة ومستحملة .. أيه هى البلاوى دى؟ .. الله أعلم .!
وكانت ال26:البنت لما بتضايق يتضحك ولما بتفرح بتعيط ولما بتقعد فى البيت بتبقى عايزة تخرج ولما بتخرج بتبقى عايزة تروح ولما بتحس إن جالها برد بتعمل كل اللى ربنا يقدرها عليه عشان تعديك .!
27: أنت بتستحمى بصابونة لكن البنت لأ .. البنت عندها 92343 مستحضر تجميل لو حاولت أنت تجربهم هتبوش أو هتتحول لضفدعة !.
وقالوا عن القاعدة ال28:البنت لما تقولك استنانى خمس دقايق يبقى أنت عبيط عشان مجبتش معاك حاجة تنام بيها !.
وعن ال29:البنت تحب الراجل اللى يحكمها .. عشان تجيبه وتمشيه على العجين بعدها .. هو ده التحدى .!
وكانت ال30:البنت لما تجيب سيرتك من وراك تأكد إنك أنت ونص عيلتك بتاخدوا حسنات ببلاش .!
واختتموا قواعدهم ضد البنات بآخر قاعدة وهى:البنات فعلاً أذكى مننا .. بدليل إننا منقدرش نعيش من غيرهم .!
ولم تقف بنات مصر مكتوفات الأيدى أمام هذا الكلام وقمن برصد القواعد الخاصة بالرجال، ردا على "قواعد البنات الأربعون" التى تناولت جوانب حياتهن بشكل ساخر جاءت كالتالى:
القاعدة الأولى:مين قالك إن الراجل بيحب التحكم، أبسلوتلى نوت، هو بس مفكرك عروسه بزراير يتك عليها تنور يضغط عى بطنها تنور على شعرها تكهرب على إديها تلعبط، معلش عنده نقص من وهو صغير أهله مش بيوده السيرك.
و2::الراجل بطبيعته رغاى، بس زى ما تقولى بعد سن المراهقة بيطلعله فقافيق فى بوقه بتخليه قليل الكلام والسمع بعيد عنك بعد كدا.
وكانت رقم 3: مين قالك إن الراجل قليل الأدب، أوف كورس نوت، دا حمل وديع هو بس اللى خلى أم وديع تحمل أصلا.
4-عادى يبص على واحدة، ويكون مركز ولما تاخدى بالك يعمل إنه سرحان.
وشددت الفتيات على أهم قاعدة وهى ال5 وهى: لو شعرك لونه أسود وعملتيه أخضر فسفورى مش هياخد باله وده عادى هيركز بس مع اللى بره وأى تغيير يحصل فى صحبتك أو جارتك.
6: الراجل بطبعه كائن اجتماعى متفتح، وكل فتحة وفتحة صعب تلاقيه من غير واحدة، آه دى أختى دى صحبتى دى بنت عمة خالت أخو بابا زملتى وبنت ابن أخت خالة ماما.
كانت رقم 7: سياسى محنك معه خبرة سنتين من الفرجة على بوستات الفيس وخصوصا بوستات سوسو الحيرانة وليلى السهرانة، إيش فاهمك أنتى يا جاهلة، هو الصح طبعًا ومعاه علامة الجودة.
أما رقم 8:صاحب الريموت الأول والأخير، زى ما هو صاحب البيت كدا زى ما بردو الأكل اللى بيحبه هو اللى يتعمل واللى بتحبه دا تاكليه عند "أمك" عشان مبيحبش ريحة القلقاس ولا الملوخية ولا البامية ولا البسلة ولا الفسيخ ولا الرنجة.
وكانت القاعدة ال9: صريح لدرجة تميل للبجاحة، لو مكنتش البجاحة نفسها تمر السنين مع بعض وفجأة يزيد الإهمال والوايتنج، أه أنا بحبك بس ماما مش موافقة، بابا رافض، أخويا بيسنن، تيتا ماتت وتعبانه على الآخر، عندى الكبد وخايف أعديكى، أنتى تستاهلى حد أحسن منى.
أما القاعدةال 10:هو دايما الصح حتى لو هو غلطان، أيوه يا ستى أيوه، هو كدا أنتى زعلانة بردو أنتى اللى تصالحيه، أنتى اللى عيانة بردو أنتى اللى خدى بالك منه، أنتى اللى مخنوقة بردو أنتى اللى تفتحى الكلام وتهوديه على أد عقله، وأنتى اللى تقوليله: قولى كلمة حلوة بقى عشان تصالحى بيها نفسك.
وعن القاعدة ال11 قالوا:وماجستير فى غسيل المخ، درجة أولى تلاقيه مزعلك ومطلع عنيكى وشاخط فيكى وقافل السكه فى وشك ومطلوب أول ما يقول بحبك تنسى كل حاجة.
12:لما يقولك فى عز الخناقة متعليش صوتك أنا بقولك أهووووووو أنا راجل وأنتى بنت رغم أنه هو الغلطان يقلب الترابيزة عليكى فى مينت، متزعليششششش، أولا الزعيق بيدل على أنه عنده مشكلة فى ودانه فى بيعلى صوته عشان يسمع نفسه، أنا راجل وأنتى بنت عنده فوبيا العظمة نستحملة معلش مريض يا بنتي، ليس على المريض حرج.
وكانت القاعدة ال13: بيتعب أى والله بيتعب بيروح الشغل محسسنى إنه بيشتغل فى وكالة ناسا المهم و يرجع ينام ويتفرج على التليفزيون وينزل لصحابه ! إنما أنتى تافهه مواركيش حاجة مهمة أصلا، أعمالك فى نظره تتوقف على قاعدة فى البيت معززة مكرمة بتتكلمى فى التليفون وتلعبى فى ضوافرك وتعملى شوبنج على أساس إن البيت دا تومتيكى توماتيكى.
وكانت القاعدة رقم 14: لو جاله شوية برد يالهوووووووى يحسسك أنه بيودع وخدى بالك من العيال يا بتعه وسكتى الواد و البت دول حرام يا عالم تعبان و عادى يعديكى ويخف هو ويقولك بطلى دلع دول شوية برد.. قومى هاتلى أشرب وحضرى العشا واكويلى القميص البنفسجى وخدى بالك من كسرة البنطلون البنى بسرعة بقى جعااااااااااااااااااااان أنتى لسه مقومتيش!.
وكانت القاعدة ال 15:الرجل يحب الفرفشة هو مالو هو ومال ضهرك وجعك وركبك ناقحة عليكى والأسعار نار ولا متخانقه مع مامتك ولا متخانقه معه هو شخصيا هو مالوووووو اضحكى فكى وشك عشان لو مفكتيش وشك هيروح لغيرك يفُك.
وعن رقم 16:عنده حساسية من كل الطلبات وخاصة كلمة عاوزين المصروف تلاقى وشه قلب شارب وجيبه كرمش والضغط ارتفع ! ناقص يقولك قلبى قلبى ولو طالبه 100 جنيه يرسو على 15 جنيها وربع.
وقالوا عن رقم 17:لا يوجود فى قاموسه كلمة معرفش تلاقيه فتاى فى كل حاجة ميقولكيش معرفش إلا لما يبقى قرفان منك بيقولهالك على سبيل التعذيب كأنه معه سر نملة الأرض.
18:بيفتكر إن زنك على الفرح ده عشان تغيظى أصحابك وتحطى صور على الفيس بوك وتلبسى فستان أبيض مش قادر يستوعب إنك بتحبيه ونفسك تكونى معاه بقيت العمر.
19:فاكر نفسه توم كروز ف بيعاملك على إنك مفروض تكونى مارلين مونرو .
وكانت القاعدة ال20:الراجل طفل كبير مسافة ما يملك الشىء يزهده فتلاقى النوع الذكر من دول بيعاملك على إنك عربية بلاستك فى فاترينة مسافة ما يشتريها يلعب بيها يكسرها يدور على حاجة جديدة.
21 :بيدخل الحمام بالساعة مصطحبا معه يا موبيله يا جورنانه بيعامل الحمام على أنه فقرة ترفيهه لكى يتواصل مع التكنولوجيا المستقبليهة
22: حسه الخيالى عالى ديما عايش دور المظلوم المقموص المهموم إنما أنتى كائنة جليدية من بلوتو.
23: الكائن اللى بيتعامل معاكى فى أول الخطوبة أو التعارف غير الكائن اللى هتشوفيه بعد ما تكملوا سنة عشان متتصدميش بس.
وقالت البنات عن القاعدة ال24:يعنى إيه زهقانة حضرتك مهو لسه مخرجك من كام شهر وعازمك على وجبة من كنتاكى من أم 13 جنيها مالك فيكى إيه أنتى ديما مبيعجبكيش حاجة!.
أما القاعدة ال 25لو قالك فى ساعة صفا احكيلى عن اللى فات من عمرك قبل ماتعرفينى "اووووووووعى تحكى بالتفاصيل أوى ... الصنف دا مش بينسى حاجة أبدا وهيعايرك بيها العمر كله كأنك وخده بشلة فى وشك.
55 قاعدة للتعامل المريح بين البنت والولد .. للشباب: أكل مراتك صحى ومفيد المشكلة إنك اتعودت على أكل مامتك .. اعرف حبيبتك عايزه إيه من غير ما تقول .. للفتيات: الراجل صاحب الريموت الأول والأخير.
- بالصور.. اكسسوارات الربيع مزيج بين برقع الجدات ودلع بنات 2015