توفى زوجها وهى تبلغ من العمر 35 عاما، تارك لها خمسة أطفال دون ميراث أو مبلغ تنفقه على أسرتها مستقبلا، لذلك أخذت تفكر "آمال حسن" الشهيرة ب"أم حسن" الحاصلة على دبلوم تجارة فى عمل ترزق منه حتى تستطيع أن تكمل مشوار الحياة هى وأولادها الخمسة. امتهنت "آمال" فى "مسح الأحذية"، لتنفق على أولادها، الذين نجحت فى أن يلتحقوا بكليات القمة، ولم تكتف بتعليم أولادها بل استطاعت أن تلتحق هى بالتعليم المفتوح لتصبح طالبة بالفرقة الثانية بكلية خدمة اجتماعية، لتستحق بعد ذلك ترشيح وزارة التضامن الاجتماعى لها للقب الأم المثالية. التقت كاميرا "فيديو7 قناة اليوم السابع المصورة " ب "آمال" أو "أم حسن" التى تحدثت عن كفاحها مع أولادها قائلة :"زوجى توفى وأنا عمرى 35 سنة ومعايا خمس أولاد بنت وأربع صبيان، ومفيش معايا فلوس ففكرت إنى أدور على شغل، وأنا معايا دبلوم تجارة ففكرت إنى اشتغل لامعة أحذية فتعلمت المهنة من جارى اللى كان بيشتغل نفس المهنة، واستلفت 50 جنيه من جارتى واشتريت الأدوات واتحاربت كتير فى شغلى". وتابعت: أول مرة نزلت اشتغل فيها كان فيه رجالة كتير وطردونى من المكان وواحد فيهم قالى وقتها "هى الشغلانة ناقصة ستات" روحت مكان تانى وبرضه، رجالة حاربتنى لحد ما واحد صاحب محل عصير وافق إنى أقعد جمبه ولحد دلوقتى قاعدة بقالى 16 سنة بشتغل". وأضافت:"الأول أخواتى نصحونى إنى أخرج عيالى من المدرسة، لكنى رفضت وحاربت عشان يتعلموا وكنت دائماً أقولهم: افتكروا دائماً إنى بشتغل وبتعب فى الشارع عشانكوا، وكنت بديهم دروس خصوصية عشان مفيش حد فى البيت يذاكر لهم لحد الحمد لله دخلوا أحسن الجامعات، وعندى بنت خريجة كلية تمريض وابنى فى كلية هندسة وواحد فى سياحة وفنادق وواحد فى اقتصاد وعلوم سياسية وولد فى أولى ثانوى، وكان نفسى طول عمرى أكمل تعليمى ومعرفتش أعمل ده عشان جوزى وعيالى، لكن الحمد لله ربنا وعدنى بست طلبت إنها تساعدنى إنى أكمل تعليمى وأصبحت طالبة فى ثانية كلية خدمة اجتماعية جامعة حلوان". ورشحت وزارة التضامن الاجتماعى آمال للقب الأم المثالية هذا العام بمناسبة عيد الأم، وتقول:"فرحت جداً وولادى فرحوا جداً لأنهم كانوا دايماً بيطلبوا منى إنهم يرشحونى، لكن كنت برفض لأنه كنت عايزة أترشح بعد ما ابنى الصغير يدخل الجامعة عشان أحس إنى أكملت رسالتى والسنة اللى فاتت زعلت بترشيح فيفى عبده لأن حسيت أنى ولا حاجة لكن الحمد لله ربنا أكرمنى السنة دى". وعن أمنيتها الوحيدة، تقول: "مش بتمنى حاجة ليا أمنيتى الوحيدة أن بلدى تكون أحسن وأولادى يكونوا بخير مش عايزة حاجة ليا".
