توفى الجد شرقاوى أكبر معمر على مستوى الصعيد ومصر والعالم عن عمر 136 عاماً فى قريته نجع العبابدة التابعة لمحافظة قنا. مات الجد أمس الأول الخميس، وكان كعاداته بصحة جيدة قبل مماته يشرب السمنة البلدى على الريق، ولا يقترب من الأدوية ولا يشاهد التليفزيون، مصراً على إمساك فأس الزراعة التى يعمل بها فى الأرض بجانب أحفاده البالغ عددهم 120 حفيداً.. الجد شرقاوى الذى حاورته أكثر من مرة قبل مماته كان أول صعيدى يشترك فى بناء سجن ليمان طره وهناك قابل الملك فاروق. عن لقائه بفاروق، قال "دخل علىَّ فاروق وأنا أشيل الحجارة وكان لابس شورت وفانلة"، وقال "منين جبتوا دا من تحت الجاموسة".. ويضيف "كان فاروق أبيض وشركسى ويستهزئ بوجوه المصريين السمر". ويصف الاحتلال الإنجليزى قائلاً: كرهت الإنجليز، وشفتهم بعينى بيتراهنوا على بطن واحده ست حامل، وبيقولوا فيها بيبى دكر ولا بيبى نتايه، وبعدين قرروا إنهم يشقوا بطنها ويشاهدوه.. ولما رحلت السويس محبيتش أدخل فى المقاومة رغم إن ابن عمى الصعيدى كان قائدا لمجموعة تقاتل الإنجليز، وهناك سجنونى بالظلم قالولى اركب العربية "خبيبى"، قلت مش راكب العربية، ولكن شالونى ودخلونى جوا العربية ووضعونى فى السجن وقعدت فيه لمدة 6 شهور، ولما قامت الثورة خرجونى، ومن يومها من قيام الثورة حتى اليوم وأنا معديتش برا نجع العبابدة، الديابة اللى هنا أرحم من الإنجليز. كان الجد شرقاوى يقص الحكايات لأحفاده وينصحهم بشرب السمن البلدى على الريق، وينصحهم بشده إن اللى يكسر الإنسان أى إنسان الهم والحزن بجانب السجاير ومعاهم النسوان. أحد أحفاده واسمه منصور محمد قال: جدى كان لا يعرفنا، فنحن 120 حفيداً، وفى آخر حياته تعود أن الجميع يناديه بالجد حتى الغرباء، وكان يسأل "انت واد مين وامك مين"، ولما يفاجأ إن الذى يسأله حفيده بالفعل يضحك ويقول هو يعنى أنا جدك الأساسى، والله يا بنى أنا معرفك ثم ينظر بشده للى جنبه ويقوله تسمع حكاية عن الإنجليز ويسترسل كعادته.
