"فك نفسك" شعار اتخذه أول حزب مصرى للكوميديا والضحك على أى حاجة بتحصل فى بلدنا أو بره بلدنا، مجموعة من 28 شاباً "ستاند أب كوميديان" كونوا أول حزب فى مصر بعيداً عن السياسة، وأطلقوا عليه اسم "الحزب الكوميدى". بعيداً عن اكتئاب حياتنا السياسية والأحداث التى تمر بها بلدنا، وبسبب النكديين الذين يحاولون تحويل حياتنا لبؤرة من اليأس تحت شعار "مافيش فايدة"، قرر الشباب أن يخرجوا عن المألوف بنشر فكرة "الاستاند آب كوميدي" فى مصر بشكل أكبر. "الموضوع بدأ بإحسسانا إن المصريين عندهم حالة اكتئاب وحزن من الأحداث فى البلد، فقلنا نفكهم، فجمعت أصحابى من الاستاند أب كوميديان وكونا الحزب الكوميدى، ماهو أى حد دلوقتى بقى يعمل حزب سياسى لكن محدش فكر يعمل حزب كوميدى".. بهذه الكلمات يتحدث هاشم الجارحى، مؤسس الحزب الكوميدى ل"اليوم السابع"، مضيفاً أنهم بدأوا بعروض وحفلات بعد ثورة 25 يناير الآن أصبح لهم اسماً معروفاً لدى محبى فن الاستاند آب كوميدى. ويضيف "بنعمل حفلاتنا دايماً فى الأماكن المختلفة فى وسط البلد ومصر الجديدة والمعادى والزمالك ومدينة نصر فى مراكز ثقافية". ويتابع هاشم: "الهدف من الحزب الكوميدى إن الناس تفك نفسها وتخرج برة مود نشرة الأخبار والسياسة اللى كرهتنا فى حياتنا، واللى بيتكلم فيها دلوقتى كل الناس عشان كده قلنا نضحك الناس شوية". ويحكى عن فن الاستاند أب كوميدى قائلاً: "الفن ده بدأ فى العالم كله فى فترة السبعينات ولسه واصلنا مصر من 7 سنين بس ومش منتشر بدرجة كبيرة، لذا فكرنا فى نشره بطريقة جديدة، فهو فن قائم على الضحك فقط من خلال شخص واحد يقف على المسرح وأمامه الجمهور "أنت والجمهور والمايك بس" وهى فكرة "One man show". "عضوية الحزب مفتوحة للجميع ماعدا النكديين"، هذا ما يؤكده هاشم الجارحى، موضحاً أنهم يضحكوا الناس على أى شىء بصفة عامة حتى الإيفيهات السياسية، ولكن بشرط أن "يكون الإيفيه يحترم الجمهور ومن غير شتيمة فى حد.. وكمان من غير ما نقول حاجة تكسف الجمهور أو تحرجه، لأن ده بيكون حاجز نفسى بينا وبين جمهورنا اللى لازم نحترمه حتى فى الكوميديا والضحك الراقى". ويضيف: "فكرة الاستاند أب كوميدى شبيهة بفن المونولوج، الذى كان يقدمه إسماعيل يس قديمًا، ولكن مع وجود فارق، فهو يقدم أغانى مضحكة ونحن نقدم عرضا مضحكا للجمهور من إيفيهات ونكت وحكى مواقف حياتية ويتخلله أغانى أحياناً".
