«أنت مضحك؟» سؤال الإجابة عنه تحدد إماكنية الانضمام ل«الحزب الكوميدى» من عدمه، فالحزب الذى يرفع شعار «الضحك للجميع»، حرص على أن تكون العضوية سهلة للغاية، فما عليك إلا أن: «تمسك المايك وتقف أمام الجمهور وتضحكهم». هشام الجارحى، مؤسس الحزب، الذى يتكون من 20 «كوميديان»، أكد أن فكرة تأسيس الحزب جاءته حين رآى عشرات الأحزاب تتكون فى أعقاب الثورة، ففكر فى تأسيس حزب للكوميديا، خاصة أن الضحك هو القيمة التى يفتقدها الناس منذ الثورة: «كل الناس عملت أحزاب، اشمعنا إحنا؟ على الأقل شغلتنا نِضَحك الناس ونفَرحهم، وبدل ما كل واحد من الشباب اللى بيقدموا ستاند أب كوميدى شغال لوحده، قلت ليه مانشتغلش كلنا مع بعض ونظهر مع بعض، تطبيقاً للشعار الشهير: مشاركة لا مغالبة». «الجارحى» يواظب منذ فترة على تقديم حفلات مفتوحة لتقديم ال«ستاند أب كوميدى»، بواسطة فنانين ومبتدئين: «عضوية الحزب مش محتاجة كارنيه وشغل السياسة الفاكس، المُضحكين اللى بجد أهلاً وسهلاً بيهم، بنعمل لهم ورش ونتعرف على بعض، ونشوف مضحكين فعلاً ولا لأ، بعدين بيكون فى حفلة المايك خلالها مفتوح للمواهب الجديدة وهكذا». «مش بحب أكون موظف ولا بحب أشتغل عند حد.. بس دى سنة الحياة ولازم الواحد يعمل كده عشان ياخد خبرة ويقدر يكمل»، قالها «الجارحى»، الذى يعمل استشارى تسويق وعلاقات عامة، رافضاً الروتين المصاحب للوظائف الإدارية. يطمح الشاب العشرينى فى الوصول بحزبه إلى العالمية: «إن شاء الله عاوز أصدر الموضوع بره مصر، ويكون حزب عالمى الناس محتاجة تضحك، ما ينفعش نفضل مكتئبين على اللى فى البلد ونندب، أنا عن نفسى بطلت أتفرج على الأخبار، عشان ما أشد فى شعرى، الظروف اللى إحنا فيها ملهاش بديل لازم نضحك عشان مفيش بديل، إيه البديل غير الضحك؟».