ربنا معاكم يا منتخب الشاب صحيح على رأى المثل (كلوهم لحم ورموهم عضم ) وتقريبا مصمصوا لحمهم ليه علشان دول شوية عيال طافوا بيهم بلاد العالم وصرفوا عليهم حوالى 20 مليون جنيه حسب كلام أحد كوادر الاتحاد سابقا وهو مذيع شهير كان لاعبا للكرة. يعنى هو نفسه ناله من الحب جانب (من اللحم والعضم ) وفى الآخر طلعوا شوية عيال المذيع المشهور اتهم من تحت لتحت سمير زاهر أنه ذهب لسكوب وتعاقد معاه فى بلاد من غير ماحد يعرف واتضح بعد ماتش كوستاريا أن المدرب مش قد كده يعنى فى الآخر طلعوا شوية عيال. بعد أكثر من سبعين مباراة خاضها منتخب الشباب وتم صرف مكافآت فوز وتعادل وحتى الهزيمة لكل خلق الله اللى شارك فى إعداد الفريق حتى مسئول غرفة خلع الملابس له 50% من مكافأة أى لاعب فى أى مباراة يلعبها الفريق والكلام على عهدة المذيع المشهور عضو اتحاد اللعبة سابقا فى برنامجه اللى مش بينام بسببه خالص وفى الآخر طلعوا شوية عيال. الكل استرزق وفى النهاية الكل قلب الترابيزة على الشباب لأنهم شوية عيال الكل استغل تصريحات اللاعبين إنهم المسئولون عن الهزيمة وقالوا فرصة هم اللى قالوا على نفسهم كده علشان كده قالوا عليهم شوية عيال أبو ريدة يمسك منصبين فى الفريق والمونديال علشان أى حد غيره يبقى ضمن شوية العيال. المنتخب فيه حوالى 20 مدير كلها مناصب وأرزاق وفى الآخر يتقال على اللعيبة (دول شوية عيال) عرفتم مين همه (شوية العيال)؟!!