المعلم خشبة: انت ياواد يا قطنة إحنا لازم نوسع النشاط أنا بفكر نفتح فرع جديد فى بورسعيد وفرع فى السويس وفرع فى إسكندرية.. قطنة: ليه يامعلم احنا ملاحقين على اللى بيموتوا هنا ده ربنا رزقنا من وسع من يوم مرسى ما مسك الحكم اللى دفناهم فى حوادث القطارات واللى دفناهم فى أحداث الاحتفال بالثورة خير ربنا كتير والخير على قدوم الواردين ومرسى سره باتع عامل "كونتراتوا " مع عزرائيل. المعلم خشبة: ياواد يا ابو مخ ضلم انت عارف كام واحد متوفى فى بورسعيد 31 جثة راحوا مننا يابن الكلب لو كان لينا فرع هناك كان زمانا كوشنا على الميتين دول ده غير اللى ماتوا فى السويس أنا استخرت ربنا ونويت افتح فرع حانوتى ثورة يناير فى بورسعيد وزيه فى السويس. قطنة: يا معلم بلاش طمع ده انت بقيت مليونير ده انت نازل واكل طالع واكل سيب حاجه لغيرك. المعلم خشبة: واسيب ليه يلا حد يقول للرزق لا ده ياواد احنا أحسن من غيرنا ماهو من يوم الثورة ومحدش عارف ياكل عيش غيرنا أصل احنا اتظلمنا كتير فى عهد حسنى الله يكحمه مطرح ما راح. لكن ما شاء الله على عهد مرسى الموت بيرفرف عليه. قطنة: خلاص يا معلم اللى تشوفه عايز توسع دايرة الشغل وسعها واهو مصائب قوم عند قوم فوائد. المعلم خشبة: ندر عليا يوم ما يموت مرسى على الخير اللى هل على قدومه دفنته وخرجته وصوانه من كل شىء عندى.. الأمير ابن الأمرا جلاب الخير. قطنة: العب غيرها يا معلم يعنى همه حيستنوك انت عشان تقوم بالواجب الجماعة والرئاسة حتعمل كل حاجة. المعلم خشبة: أنا بفكر ياواد أعين له طقم حراسة من عندى أصل حياته غالية عليا أوى ده انا ممكن ابعت أستورده من أمريكا من بتوع " الكوماندوز" ومهما صرفت مش هيكون قد اللى كسبته من وراه. قطنة: فكرة برضك يا معلم ممكن تعرضها على الرئاسة أو مجلس الوزراء أو مجلس الشورى. المعلم خشبة: فكرك حيوافقوا ياولا ولا حيشكوا فيا. قطنة: الحكاية دى مش مضمونة يامعلم أنا بقول دارى على شمعتك تقيد وماتفتحش على نفسك أبواب انت فى غنى عنها وخاصة الضرائب. المعلم خشبة: على قولك ياقطنة كله كوم والضرائب كوم تانى وكفاية على مرسى الدعوات اللى بدعيهاله مع كل ميت بغسله واكفنه دى دعوات من كترها تدخله الجنة حدف وكفاية عليه كده. قطنة: عداك العيب يامعلم يلا نقفل بقى ونحلق نروح ننام لنا ساعتين قبل ماتحصل مصيبة تانية الصبح مانلحقش ننام. المعلم خشبة: يلا ياولا ياقطنة كلامك صح احنا مابنلحقش ده كل يوم يا عمارة تقع يا قطار يدخل فى قطار يا شوية ثوار بيموتوا خلينا نرتاح لنا شوية إيدك معايا نقفل المحل نزل ياواد الباب الصاج وماتنساش تيجى تصحينى بدرى. قطنة: حاضر يامعلم ليلتك زى العسل وتصبح على خير. المعلم خشبة: خير إيه يابن الجزمة قولى تصبح على شر على أموات ده الصباح اللى بيريحنى يا حمار. قطنة: حاضر يا معلم تصبح على دستة ميتين. المعلم خشبة: أيوه كده أهو ده الصباح الحلو سلام يا حمار. قطنة: سلام يا معلم خشبة.