تم القبض على حمامة من النوع الزاجل فى طريقها لخارج مصر وتحمل ميكروفيلم، خبر لم يقنع شباب «فيس بوك» الميكروفيلم الذى يتحدث عنه الخبر وتوقف استخدامه قبل اختراع شريط الكاسيت. عبر الفوتو شوب أبدع الشباب فى تصورات شكل الصور التى ينقلها الميكروفيلم وكانت صورة الحمامة المتهمة وهى تتعلم مبادئ علم الجاسوسية عبر كتاب هى الأكثر انتشارا عبر مواقع التواصل الاجتماعى المختلفة. كما لقى الخبر عشرات التعليقات الساخرة، فماذا كانت.. عمر أبو عيطة: وعندها خرج عمر سليمان من قبره وولع فى نفسه بجاز بسبب ما آلت إليه أساليب الجاسوسية من بعده. فتحى عبد المطلب: مش ملاحظين حاجة يا جدعان.. البلد فى زمن الإخوان بقت عشة طيور.. الحمامة الزاجلة بتاعة الميكروفيلم وطائر النهضة والعملية نسر بتاعة سيناء.. الواحد قرب يبيض يا جدعان. عبير المتولى: بمناسبة الحمامة.. بيوقلك اتنين جواسيس اتفقوا أنهم يبعتوا لبعض الأخبار بالحمام الزاجل لأن وسائل التكنولوجيا متراقبة.. بعد شهر جات حمامة من الجاسوس الأولانى بيبص فى رجلها لاقاها فاضية.. سكت مردش.. بعد شهر تانى لقى حمامة تانية جاية فاضية.. مفهمش عايز إيه ده... بعد أسبوعين لقى حمامة تالتة فاضية بردو.. راح قال أتصل بيه بقى مبدهاش.. اتصل عليه قاله إيه يا عم الرسايل الفاضية دى؟ قاله يا غبى مش معايا رصيد ببعتلك علشان تكلمنى. وأنا من موقعى هذا.. أحب أهدى الإخوان أغنية "أستاذ حمام نحن الزغاليل". عواطف نجاح: قفشوا حمامة من النوع الزاجل وفرجلها ميكروفيلم وعملوا ضجة كبيرة وحرروا محضرا واتحفظوا ع الحمامة وبعتوا الميكروفيلم لتنزيل محتوياته.. ده بجد والله.. فاضيين.