لاحظ كنباوي حالة من الملل والضيق والسخط تنتاب كنباوية في الأيام الأخيرة وأنها على غير عادتها لا تضحك وتبتسم بالكاد وفي حالة شرود دائمة وسرحانة فراح يسألها ويستفسر منها عن سر تغيرها المفاجئ هذه الأيام الأمر الذي لم يعتد عليه. كنباوي: مالك يا كنباوية ما بقتيش زي الأول خالص، لا ضحك ولا تنكيت، ولا هزار ولا رغي ولا غنا، نفسي إنك تعملي لنا أي حاجه حلوه حتى الأكل بقيت أحس إنك عملاه تأدية واجب من غير نفس ولا مزاج مالك؟ إيه اللي جرالك ؟ إيه غير حالك؟ فيكي إيه؟ إيه اللي صايبك؟ ونايبك ومبدل حالك؟ مكروبة ودايما مهمومة ليه؟ كنباوية: مفيش يا كنباوي إنت ناقصك حاجه؟ فيه يوم جيت من شغلك ما لقتش فيه أكل؟ كنباوي: هي الحكاية حكاية أكل؟ أنا كل اللي شاغلني هو حالك اللي اتغير فجأة كنباوية: ماله حالي ما أنا أهه زي الفل كنباوي: لأ ما هو واضح إنك زي الفل بأمارة السرحان والتوهان والنوم الكتير من المغرب ولا عدتي تضحكي معايا زي الأول ولا حاجة خالص كنباوية: هو فيه إيه يفتح النفس يا كنباوي؟ ولا فيه إيه يضحك؟! كنباوي: للدرجة دي شايفه الدنيا سوده؟ كنباوية: وأكتر شويه يا كنباوي كنباوي: يا ساتر يا رب ليه كل ده؟! إيه بجد؟! كنباوية: ما هي المصيبة إن مفيش حاجة جدت كل يوم في الأسوأ والحال زي الزفت كنباوي: تقصدي حال البلد؟ كنباوية: هو فيه غير حال البلد اللي شاغل بالي طبعا هو حال البلد كنباوي: بكره تتعدل كنباوية: إزاي قولي؟ كنباوي: لما الإخوان يغوروا في داهية كنباوية: مش بالساهل كده إنهم يسلموا دول ولاد ستين......... كنباوي: عارف مش محتاج إنك تكملي الشتيمة أنا فاهم همّ ولاد ستين إيه من غير ما تقولي كنباوية: كويس إنك عارف وفاهم كنباوي: هو حد قالك عني إني حمار؟ كنباوية: حاشا لله يا كنباوي أنا عارفه إنك فاهم وواعي ومتنور كنباوي: إيه اللي قالقك كده؟ كنباوية: 30 يونيو كنباوي: يوم تمرد؟ كنباوية: أيوه يوم المصريين كلهم مش يوم تمرد بس أو لوحدهم ده يومنا كلنا يوم الثورة التانية يوم الثورة الجديدة على الاحتلال الإخواني الغاشم لمصر بلدنا أم الدنيا كنباوي: وانتي قلقانة من اليوم ده ليه؟! كنباوية: الإسلاميين مش حيبصوا بمنطقية لطلب سحب الثقة من مرسي حيبصوا بغشومية إننا بنطلب سحب الثقة من رئيس إسلامي إخواني وده حيعمل بلبلة في البلد وخاصة لو ميليشيات الإخوان نزلت بالسلاح كنباوي: الجيش مش نايم ومش حيسمح بحاجه زي دي ما تخافيش وريحي بالك واهدي شويه بدل ما يجيلك السكر ولا الضغط والإخوان مش حينفعوكي ساعتها الله يجحمهم ويولع فيهم بجاز وسخ كنباوية: أنا مش طايقه أسمع سيرتهم وقرفت قرف السنين منهم وبقيت أطيق العمى ولا أطيقهم كنباوي: بكره يغوروا في داهيه كنباوية: ده احتلال يا كنباوي.. احتلال كنباوي: عارف وحاسس بده.. ده الاحتلال الإنجليزي والاحتلال الفرنساوي كانوا أرحم من الاحتلال الإخواني كنباوية: همّ خايفين من تمرد بس همه بيقولوا إن تمرد مش حتقدر تجمع 15 مليون توقيع بسحب الثقة وأنا نفسي تمرد تخذلهم وتجمع العدد ده كنباوي: حتجمعه بإذن الله انتي ما تعرفيش الناس متجاوبة إزاي مع الحملة دي كنباوية: لأ عارفة بس خايفة ما يقدروش كنباوي: لأ حيقدروا بعون الله.. حيقدروا بس انتي قولي يا رب كنباوية: يا رب يا كنباوي.. يا رب كنباوي: أيوه كده خلي عندك إيمان بربنا وقدرته على الظالم والمفتري وابن الحرام كنباوية: ونعم بالله يا كنباوي.. ونعم بالله
