قامت فهيمة من النوم مكشرة وزعلانة بشكل مستفز فاهم: أعوذ بالله من غضب الله يا رب حد يشوف الخلقة دي وربنا يرزقه طب إزاي اللهم ارفع مقتك وغضبك عنا. فهيمة: بتقول حاجة يا فاهم؟ فاهم: لا انتي مالك كدة قايمة من النوم كأن ابوك مات. فهيمة: زعلانة قوي يا فاهم شوفت امبارح اللي اسمه باسم يوسف حاجة مسخرة صحيح. فاهم ضاحكا: بس بذمتك ما ضحكتيش من قلبك؟ فهيمة: بصراحة وقعدت تبص حواليها كنت مبسوطة وضحكت ضحك في حياتي ما ضحكت زيه باسم ده تحفة. فاهم يرفع إيديه للسماء: يا رب أجب الدعاء اشف عن فهيمة حبيبتي ورجعها إلى عقلها مرة تانية قادر يا كريم. فهيمة تبكي: أنا خالفت الأمر يا فاهم وكده بقيت عاصية والمفروض يقام علي الحد ولو حد عرف مش بعيد يرجموني إزاي أتفرج على باسم؟ فاهم: هو باسم ده منكر وبعدين مين هيقول ليهم انتي خايفة قوي كده ليه؟ يا نهار اسود ده انتي جسمك تلج. فهيمة تبعد عن فاهم: ابعد عني انت شيطان أنا لازم أروح وأعترف وأطهر نفسي من الذنب ده. فاهم يضرب كفا بكف: يا نهار أسود تشوفي باسم يوسف يبقى ارتكبت ذنب ليه شربتي خمرة. فهيمة: تعرف لو شربت خمرة كنت استغفرت ربنا والموضوع خلص لكن الموضوع أكبر من شرب الخمر إزاي أشوف ألد أعدء الإخوان؟ إنت بتهرج؟ لا ياعم أنا هعترف دلوقتي واللي يحصل يحصل. فاهم: طيب ولو سألوكي مين شجعك على إنك تشوفي باسم هتقولي إيه؟ فهيمة: لا يا حبيبي متخافش هقول جوزي هو اللي هددني بالطلاق لو ما شفتش باسم. فاهم متعجب: بس ده ما حصلش وبعدين كبار القيادات بتوعكم بيشوفوه ويضحكو أكتر مني كمان فهيمة: يا حبيبي الموضوعات درجات إحنا مين عشان نحاسبهم وأكيد هما ليهم وجهة نظر يعني مش هبل زي حالاتنا وبعدين إحنا علينا السمع والطاعة وهما عليهم الأمر وبس. فاهم: طيب إيه العقاب اللي ممكن يحصل؟ فهيمة: بس أعتقد إنه هيبقى إحدى العقوبتين إما الجلد أو الغرامة والجلد ممكن 20 جلدة أو 2000 جنيه غرامة. فاهم يلطم: اختياري ولا إجباري؟ فهيمة: ممكن لو قلت إني مريضة يبقي أدفع 2000 غرامة مع القسم إني ما شفتهوش تاني. فاهم يحط يده على ضهره: يا ستي هما 20 جلدة وخلاص يعني هتموتي فيهم ولو موتي تبقي أكيد شهيدة مش كده؟ فهيمة تبحلق في فاهم: لا طب ما ادفع 2000 جنيه. وأريح نفسي من الجلد والتاني خزينة الإخوان فاضية وأعتقد إن الحكم هيكون غرامة بس يارب تبقى 2000 بس. فاهم يكلم نفسه: وانتي معاكي 2000 جنيه منين؟ أكيد من مصاريف البيت حسبي الله ونعم الوكيل. فهيمة تقرب من فاهم: حبيبي حضر 2000 جنيه بكرة عشان الموضوع ده يخلص. فاهم: وهو الجلد ماله مش عقاب عندكم وبعدين مين قالك اتفرجي على باسم وبعدين هو مرسي خلى معانا فلوس؟ فهيمة: يعني إيه مش هتوقف جنبي ماشي ماشي بس اللي ما يزعلش. فاهم مرتبك ومتوتر: والله اللي يقرب مني أقطعه إيه هي فوضى ولا إيه؟ لا أنا مش إخواني يا رب تقطعوا بعض مش موضوعي. فهيمة تصرخ: اهدأ يا أمور مش انت اللي حرضتني يا عنب قابل اشرب أحسن لك تدفع والإ....................وبعدين يرضيك المدام تجلد وإنت على وش الدنيا. فاهم: اتصرفي بعيد عني فلوس مفيش والبركة فيكم أخدتم الأخضر واليابس خلي الحبايب يدفعولك يا حلوة يا بيضة يا "مجلودة "حبيبي يا باسم يا كيدهم.