يدخل فاهم يلاقي فهيمة تغني وترقص على أغنية "والله وعملوها الرجالة" ويا حبيبتي يا مصر واخترناه وحرر جنودنا وإحنا معاه. فاهم: فعلا مرسي أثبت أنه رجل المواقف.. حرر الجنود في 24 ساعة . فهيمة مبسوطة قوي: عشان تعرفوا إن الريس لما يقول كلمة بينفذها عرفتم فايدة الصوباع إيه وهو مجرد ماطلع صوباعه والخاطفين اترعبوا وعلي طول قالوا ليهم راحو بسرعةعشان مرسي ما يزعلش . فاهم: تصدقى إننا ظلمنا مرسي.. إزاي الشعب كله يظلم الريس مرسي . فهيمة: مش عارفه ليه حاسة إن كلامك كله تريقه . فاهم: معقولة ده المفروض يبقى يوم 22مايو عيد تحرير الجنود ...ده رفع راسنا قدام العالم كله.. عاش مرسي وعاشوا الإخوان . وقام وهات يارقص والله وعملوها الرجالة وبعد وصلة رقص محترمة دموعه نزلت وصرخ إنتم إيه فاكرين الشعب ده إيه ..أي نعم هو طيب ماشي بس برضه بيفهم وكويس قوي . فهيمه: انتم مفيش حاجة عاجباكم ولا حاجة يعملها مرسي وترضوا عنها أبدا خليكم كده بس في الآخر الإخوان كسبانين كسبانين . فاهم: حلوة المسرحية دى بس المخرج طلع لا مؤاخذة عارفة ليه عشان النهاية مش حلوة كان المفروض جابو 5 مجرمين وقالوا إحنا اللي خطفنا الجنود وشفنا الريس في المنام قالنا عيب يا اولاد عشان كده رجعناهم . فهيمة: حجة الفاشل اللي عمله مرسي ده يدرس أول حاجة حافظ على دم المصريين المخطوفين والخاطفين وفى نفس الوقت حافظ على هيبة الجيش وكمان حافظ على سمعة مصر قدام العالم إن المصريين بيقطعوا في بعض وكمان ياسيدي دخل البهجة والسرور على أسرة المخطوفين وكمان فرحة المصريين كلهم برجوع الجنود تساوي كام..دي كلها مش إنجازات يامفتري ياظالم وربنا لو حد خطفك ما خلي مرسي يرجعك . فاهم: حلوة اللعبة دي ناس تتخطف والريس مرسي يرجعهم من غير ما ياخد حلاوة عليهم لوجه الله هو ده الشغل عاش مرسي . فهيمة: مش مهم رأيك ورأي اللي زيك أهم حاجة رأي الشعب الجميل اللي بيصون الجميل ولما نقوله رد الجميل يرد على طول . فاهم: طبعا في الانتخابات رد الجميل صح! فهيمة: مش عيب. فاهم: فعلا اللي يعمل كده يستحق أوسكار في التمثيل والإخراج والتأليف ده انتم عباقرة . فهيمة: عشان تعرف اللعب معانا خطر يا حبيبي . فاهم: تصدقي يا فهيمة مش بعيد يتخطف حد تاني ويتعمل نفس الفيلم ونقضي السنة دي في الخطف "والترجيع" قصدي الرجوع ومرسي يبقى وحش مصر زي فريد شوقي ماكان وحش الشاشة! فهيمة قامت ترقص وتغني: مرسي مرسي هو. هو .هو