فهيمة تنادى على فاهم انزل بسرعة هات لينا" نص كيلو لب أبيض ""نص سوبر" ونص سودانى" "وكيس فشيار كبير" وبالمرة لتر ببيسى وتعالى بسرعة. فاهم مستغرب جدا : ايه هو احنا عندنا عزومة النهاردة ولا ايه. فهيمة : روح وبعدين تعرف كل حاجة. فاهم : بس أكيد رايحين جنينة الحيوانات بس انتى نسيتى الموز دة مهم جدا عشان "القرد " فهيمة : حد يروح جنينة الحيوانات بالليل يا ذكى. فاهم : يا حبيتى انت كل حاجة ممكن تحصل منك . فهيمة بعصبية : روح هات الطلبات دى بسرعة . فاهم : ما هو أنا لازم اعرف ليه وبعدين مين هيدفع حسابهم. فهيمة تطلع الفلوس : على حسابى أنا يا سيدى. فاهم بتعجب أكتر : فهيمة الجلدة تطلع مرة واحدة 50 جنيه عشان شوية حاجات من وجهة نظرها هايفة. فهيمة : طيب أبو الكرم منك نتعلم لوسمحت انا على وشك اتخنق منك اخلص . باقى نص ساعة. فاهم : نص ساعة على ايه لا تكونى عاملة مفأجاة وعزمتى أمى واخواتى على السهرة والله انا كنت ظالمك يافهيمة ايوة كدة ربنا يحنن قلبك كمان وكمان. فهيمة : ياعم الرغى اخلص وهات الحاجات. فاهم : ماشى بس ما تعيطيش اجيبهم من المقلة اللى على آخر شارعنا ولا المقلة اللى فى وسط البلد أحسن. فهيمة تصرخ لا انت فظيع انت عايز تجيب لى الضغط ياعم ابوس ايدك اخلص. فاهم ضاحكا : يا حبيتى دة انتم جبتم الضغط للشعب كلة ايش اكون انا جنبكم. فهيمة ضحكة مصطنعة : طيب ياحبيبى لوسمحت باقى ربع ساعة الله يخليك انزل بقى. فاهم : اية التنازلات دى كلها ايه الرضا دة كلة والله الموضوع فيه أن. فهيمة بصوت عالى : ارتاح يافاهم النهاردة هيخطب الريس بعد ربع ساعة خلاص ارتحت ياسيدى. فاهم : يعنى كل دة عشان خطاب الريس سبحان الله، والله لو تعبتى إن شاء الله والدكتور طلب منك كشف 50 جنية والله تموتى من الصدمة. فهيمة : ممكن تنزل تجيب الطلبات لوسمحت. فاهم : تعرفى انك عاملة بالمثل اللى بيقول لوكان ليك عند ........... فهيمه: لا حبيبي انت سيد الناس بس روح هات الطلبات. فاهم :لا إذا كان عشان خطاب الريس يبقى الموز على حسابى يا سلام هو احنا عندنا كام ريس. فهيمه: تعيش يا فاهم. فاهم يجيب الطلبات وفهيمة قدام التليفزيون كل المسليات خلصت والساعة قربت من الثانية بعد منتصف الليل والريس لم يلق خطابه. فاهم : يمكن مفيش كهرباء فى القصر. فهيمة تجرى على المطبخ وتربط رأسها وتصرخ يارب 50 جنية على الفاضى حسبى الله ونعم الوكيل. فاهم سعيد قوى ويصفق : يا رب الريس يخطب كل يوم عشان فهيمة تفك الكيس. . فهيمة : دى أول واخر مرة أفكر أسمع خطابة بعد المقلب السخيف ده. فاهم : انتى بتصرخى من مقلب مال الشعب يعمل ايه اللى بياخد كل يوم 500 مقلب.
