أبين زين أبين زين.. وأقول على المستخبى.. واللى مش معروف.. وأضرب فى ودعى.. وتمللى بأدعى.. والمستخبى بأقوله ع المكشوف.. ياعسكرى الشرطة يابنى ربنا وياك.. الكى خايف عليك.. واقف بيستناك.. وإنت إبننا كلنا.. شعبك مالهوش سواك.. والأمر نازل عليك من فوق بدون إدراك.. إنت صحيح ابننا وما فيش ما بينَّا عراك.. لكن فى ناس فوق عليك.. تؤمر وهى هناك.. إنك تمرمط أخوك وتْجُره شدُّه وراك.. وإنت فى وسط الميدان.. محتاس بين الأشواك.. يمكن أخوك اللى سَحْلُه.. متعاطف وياك.. وهو زيك تمام مصرى وروحه فداك.. وبرضه ثاير عشان حقك وحقه معاك.. والشرطة مش للخلاف.. أو هذا يأمر ذاك.. الشرطة هى الحماية من مرض فتاك.. بيشخصوه اسمه قهر وظلم.. مش إرباك.. لأى واحد يقول الحق فيه إهلاك.. وانت البسيط بس افهم يبقى إيه معناك. .طب قول لى إيه فى البلد عجبك وأنا وياك.. واللى يخالف قانون ارميه ورا الأسلاك.. مش كل واحد يعارضك تضربه بعصاك.. الالتزام بالقانون فوق كل أمر أتاك.. من اللى عايز يوقع ناس معاه فى عراك.. بيطالبوا بحقوق لهم.. تايهين مع الأفْلاَك.. يابنى أنا قلت لك.. فكر وقول لى رُواك.. وبُكْرَه لك يوم حساب فى الدنيا وف أُخْراك.. فاسمع كلامى أنا واقف وباستناك.. ونفسى نبقى سوى.. والناس بتترجاك.. تعظيم سلام وانتباه.. شوف إيه بقى اللى وراك.. فريد طه