أثار تصريح المهندس إبراهيم محلب، رئيس الوزراء، الذي طالب فيه الشباب بالعمل سائقي «توك توك»، وتأكيده أن عصر الوظائف الحكومية انتهى، سخط المواطنين على مواقع التواصل الاجتماعي، مؤكدين أن دور الحكومة توفير الوظائف للشباب. وقال «خالد»: «مش المفروض الدولة فرضت غرامة على قيادة التوك توك ومنعت استيراده.. إزاي بتطالبنا بالشغل على التكاتك». وأضاف «مينا»: «جرب تسوق توك توك.. هو مفيش مشكلة يا فندم.. بس ما تقننها وترخصه وتحددلهم طرق... إنما متقولش كلام في الهوا كدا تبقى مش رئيس وزراء إنت كدة تبقى عامل نشاط اقتصادي». وتابعت «نور»: «عشان تقبضوا عليهم بعد ما طلعتوا قانون إن غرامة سواق التوك توك 1500 جنيه». وعلق «محمد»: «الأحسن نشتغل حرامية أراضي ونجيب مبيدات مسرطنة ولوحات معدنية للعربيات نتاجر فيها أحسن يا معالى رئيس الوزراء». وقال «حمدي»: «الوظائف الحكومية للوساطة والكبار فقط، ده غير إن الجهاز الإداري أغلبه عواجيز، شباب إيه بقى ودولة متقدمة إزاي، قمة التناقض في التصريح نفسه». وأضافت «إيمان»: «يبقي نعلم عيالنا ليه ونصرف دم قلبنا علشان كلية محترمة وفي الآخر تقولي توك توك طيب سيبهم عايشين على المثل القديم إن فاتك الميري إترمي في قرفه وترابه حتى القرف والتراب مستكتره علينا لا إله إلا الله». وقال «حسين»: «طيب يا محلب فين المصانع وقناة السويس الجديدة، والإنجازات العلمية الجبارة والمليون وحدة سكنية والعاصمة الجديدة، الحاجات دي أخبارها إيه». وعلقت «لبنى»: «كده عيب لأننا بندفع دم قلبنا في تعليم أولادنا وهل ممكن أولادكم برضوا يشتغلوا على توك توك، عيب كدة كل إنسان ليه حق إن بلده توفر له وظيفة وحياة كريمة». وأضاف «جمال»: «طيب مدام أخرتها توك توك بالمرة يلغوا التعليم، هتفرق إيه إن كان سواق التوك توك معاه شهادة ولا معهوش، يعنى أنت ترضى إن أبنك يكون معاه شهادة ويشتغل على توك توك». وقال «ياسر»: «ده كلام يقوله مسئول في دولة محترمة كل أولاد القضاة قضاة، وكذلك الشرطة والجيش، يرضي مين ده يا ناس باقي الشعب يشتغل على توك توك ولما يركبه يصادروه منه حرام عليك يا محلب». وعلق «أيمن»: «طيب بالنسبة لأبناء المستشارين لما يخلصوا دراسة حيشتغلوا على توك توك برضه ولا ساعتها الوظائف حتتوفر وتبقى موجودة». وتهكمت «هدى» قائلة: «قمة النجاح لرئيس الوزراء، فعلا كفاءة عالية، مش أي واحد يقدر يعمل الإنجاز ده ويبتكر الأفكار والحلول العبقرية دى، أهم حاجة إن الشعب مبسوط جدا ومرضى، وشايف حجم الإنجازات اللى بدأت تظهر آثارها على الغلابة». وكان المهندس إبراهيم محلب رئيس مجلس الوزراء، قال إن عصر الوظائف الحكومية انتهى، مضيفًا: «فكر تنزل تشتغل بنفسك، فكر تشتغل على توك توك». وأوضح رئيس الوزراء، خلال لقائه ببرنامج «القاهرة 360»، تقديم الإعلامي أسامة كمال، المذاع على فضائية «القاهرة والناس»، أن الأوطان تبنى بالجهد والعرق، وأن الإصرار والإخلاص في العمل أقصر الطرق لتقدم الدول.
