وصل إلى علم المرشد الذى يتحمل مسئولية تأهيل قيادات الإخوان نفسيا أن القيادى المتحمل للمسئولية الخطيرة فى هذه المرحلة الخطرة الدكتور قنديل حيث يمر بأزمة نفسية حادة قد يكون «مصيرخ» والعياذ بالله الهروب فجأة ولا يعرف له حد "طريق جرة" خاصة أن مرسى مزنق عليه قوى وكل يوم يقول شد حيلك النهاردة عندنا "ماتش شتيمة" إنما ولا يهمك كله يطلع فى الغسيل وعشان الإخوان كله يهون. اتصل المرشد برجالة قنديل وبلغهم رغبته فى مقابلة قنديل وبما أن الليل ستار راح قنديل قبل صلاة الفجر بساعة. المرشد مهللا ومكبرا: أهلا وسهلا الله وأكبر يا راجل ما أنت زى الفل أهه بسم الله ما شاء الله قنديل متأثرا: الحمل تقيل على قوى يا مرشدنا المرشد: تحمل أنت من الصالحين ما أنا قدامك كل يوم باخد نصيبى وباقى الإخوان، ومع ذلك كلنا بنتحمل مش نتعب ونقول مش قادرين يضرب على صدره - "احنا رجالة ولازم نقف وقفة رجالة" زى ما قال أخونا المليجى رحمه الله الإخوانى الأصيل. قنديل: هو المليجى صحيح من الإخوان؟ المرشد: الحمد لله كان من قيادات الإخوان، وكان من الرعيل الأول وكان ليه دور مهم ونفذه على أكمل وجه عشان كده كان دايما يقول "احنارجالة" وكان يقصد الإخوان. قنديل: معقولة الفنان المليجى من الإخوان؟ المرشد: وإيه اللى فيها كان «رجل صالح» وتحمل كتير ونشر تعاليم الإخوان كلها من خلال أفلامه. قنديل: طيب ما نقول ده للناس عشان يمكن تسكت عننا شوية عشان خاطره. المرشد: ده غلط هو مات وسره معاه احنا نفضحه عشان الناس تكرهه؟ لا طبعا عيب ده سر من أسرار الجماعة ولا نفشى السر أبدا قنديل: ومين تانى من الإخوان يا مرشدنا. المرشد ضاحكا: مين أكتر واحد فى تاريخ السينما كان يقول للست ولدته "يا نينه". قنديل وهويفكر: الفنان عماد حمدى. المرشد: الله ينور عليك العالم كله بدل كلمه يا ماما بقى يقول يا "نينه" وزرع فى الناس إن كل واحد "يبوس ايد أمه" هى دى أخلاق الإخوان ومع كده مفيش فى يوم من الأيام قال لحد أنه من الإخوان صح؟ قنديل: بس الشعب زودها قوى وبصراحة أنا زهقت خالص مفيش حل معاهم المرشد: بيقولوا عليك فاشل وإيه يعنى حكومتك فاشلة وإيه يعنى طز يا سيدى احنا اللى يهمنا الإخوان راضين عنك هو ده المهم. قنديل: طب والبلتاجى مش عيب اللى بيقوله كل شوية إنى فاشل فاشل. المرشد: أنت مش عارف ده الشعب كله عارفه وبيقولوا عليه "هجاص" يعنى كلامه هجص فى هجص. قنديل: حاضر فضيلتك. المرشد: مبارك الله يمسيه بالخير كان يقول لنظيف الشعب المصرى طيب "يطلع يطلع وينزل على مفيش"، وكانت الناس تصحى من النوم عشان تشتمه ومع ذلك قعد على قلب الشعب كام سنة. قنديل ضاحكا: يعنى خلينى بارد. المرشد: زى أخوك البرنس شوف بيعمل إيه فى الناس وهو بارد اتعلم بقى الشعب ده مش عايز غير كده. قنديل: وتغير الحكومة وأنا أروح بيتنا. المرشد: "كلام وبس" زى ما شادية كانت تقول لمدبولى فى مسرحية "ريا وسكينة". قنديل: والريس مرسى دايما زعلان منى ولسة امبارح قاللى: أنت خربت البلد وهتضيعها. المرشد صارخا: أنت إيه مبتفهمش والله فعلا أنت فاشل مرسى ميقدرش يعمل حاجة من غير رضا الإخوان فهمت يا فاشل؟ قنديل: ما تزعلش فضيلتك، حاضرحاضر فهمت وآخر مرة أتقمص خلاص. المرشد: إحنا لينا هدف لازم نحققه ويولع الشعب كله المهم الإخوان ولازم ننجح فى ده فهمت، لو الشعب نجح وحد غيرنا خد الحكم يبقى كلنا هنرجع السجون تانى فاهم. قنديل: فاهم طبعا هو أنا "غبى" لا دا أنا أفهمها وهى "طايرة" والدليل أننى ملطشة الشعب وهو ده دورى فى الفترة دى صح الكلام. المرشد: هايل أنت كده من الصالحين. قنديل يبوس جبين المرشد ويده وينصرف وهو من الصالحين.