يا عمرو موسى ويا حمدين .. ياسى البرادعى وياسى البدوى رايحين فين.. عاملين تكتل معارض بس مش عارفين.. تتوصلوا لحل ويا المرسى والملايين .. محتاره بينكم وبينه وكلنا شاهدين.. لا بتوصلوا لحل ولا عن كتر الكلام ساكتين.. وريس الدفة بيناور بين الطرفين.. وانتم فى ألف اجتماع مع الجميع رافضين.. والناس ما بينكم وبينه والنبى تايهين .. ما تخلصوهم بقى من ثورة الثايرين.. وكل يوم زحف دموى بيفجع الملايين.. وسحل ما بين رجال الشرطة والرافضين.. والتصريحات نازلة بينكم كلها تفانين.. ما تريحونا وقولوا لنا إحنا فين رايحين.. هى الزعامة خطب وكلام كبير وتخين.. لأ لأ بقى حددوا موقف من الحاكمين .. وبطلوا مغازلة بينكم إحنا مش ناقصين .. فيه خلق باصين لكم.. وناس لهم باصين.. وخلق تايهين ما بينكم فى الشقى عايشين.. وآخرتها إيه ربنا أعلم ومش عارفين.. وكله هايص ما بين إخوان وأحزاب دين.. وبين معارضين فى وسط الزحمة ناس لايصين.. يا عمرو موسى يا سيد بدوى يا أيمن نور ويا حمدين.. يا سى البرادعى يا كل الناس يا مصريين.. الرمل بيقول حنفضل فى الميدان واقفين؟ وما فيش حلول طول ما كله بالكلام راضيين.. وحتندموا والرئيس برضه راح يندم ليوم الدين.. علشان ما فيش حل بينكم.. وإنتم أهه شاهدين.