علي فين يا ريس ما تقول لي.. علي فين رايحين.. وحأقول لك إيه مركبي تايهة بين الشطين.. وأخرتها إيه أنا مش عارف الناس ضايعين.. وكل يوم زحمة في زحمة.. طالعين نازلين.. نفسي تقول للناس مرة.. بطلوا تفانين.. أحسن خلاص الروح طلعت.. راح نشكي لمين.. ونفسنا نرتاح حبة.. ماحناش عارفين.. وكل يوم نسمع خطبة.. نرجع تايهين.. والناس تقف وسط الحيرة.. في شمال ويمين.. محتارة من كتر الدهشة.. حتصدق مين وتكدب مين.. يا إخوانَّا مش بالهتيفة.. تبقم ناصحين.. هي البلد ناقصة يا ريس.. ما أنتم شايفين.. الشعب محتار وف حيرته محتاج له معين.. لكن مهما سكوته يطول أيام وسنين.. مسيره حيهب ويخرج في ألوف ملايين.. ويقول لكم أنا طول عمري.. صابر وحزين.. لكن بقي أنا فقت خلاص.. وعمري ما أرجع للتفانين.. تعبنا من كتر الأوهام.. ووعود عشان نفضل ساكتين.. واللي يفكر راح نسكت.. يبقي بيحلم كالنايمين.. الرمل بيقول للأحباب.. مصر العزيزة دي جوة العين.. وخلُّوا بالكم من حالكم.. أحسن في ناس بينكم قاعدين.. يستنظروا مرة نغمض.. فيخطفوا رزق المساكين.. وما فيش كلام تاني يا ريس.. ومافيش خطب خليكوا شاهدين.. أنا قلت وإنتم سامعينِّي.. وبادعي قولوا يارب آمين.. يارب حقق أحلامنا.. واكشف لنا مكر الماكرين.. وآخرتها فيه شعب وناسه.. راح يفضلوا واقفين ناصحين.. دي مصر شعب طريقه طويل.. وكلكم طبعا عارفين.. وبكرة نرجع ونفكر.. وأقول لكم علي فين رايحين.