المعلم خشبة مندس بين المتظاهرين فى قصر القبة فى جمعة كش ملك يتابع الموقف داعيا أن يرزقه الله بقتيلين أو ثلاثة، المعلم خشبة لا يميل إلى الإصابات والسحل قدر ما يميل إلى الموت فهو الشىء الوحيد الذى يسترزق منه الكاميرا على المعلم خشبة يتحدث فى الموبايل مع قطنة صبيه المعلم خشبة: انت يا واد يا قطنة سايبنى هنا من صباحية ربنا وقاعد عندك بتعمل إيه أنا مش قايلك تعالى مكانى وخلى كلونيا يقعد عندك؟ قطنة: حاضر يا معلم مسافة السكة وأكون عندك بس طمنى الأول إيه الأخبار عندك ربنا فتحها ولا لسه؟ المعلم خشبة: لسه يا فقرى يا حيلة أمك، أنا مش فاهم 38حركة وائتلافا شبابيا موجودة هنا والدنيا هادية كده ليه يا دوبك شوية اشتباكات مش أكتر قطنة: مفيش حد مات؟ المعلم خشبة: واحد بس مش عارف إذا كان حيموت ولا لأ عربية دهسته على الأسفلت وباين عليها قصداه والإسعاف نقلته على المستشفى ربنا يسهل ويقابل رب كريم قطنة: آمين يا معلم المعلم خشبة: ولا يا قطنة باقولك إيه فيه مصورين هنا واقفين فوق بوابة القصر بيصوروا المتظاهرين أنا خايف ليكونوا بيصورونى وانت سيد العارفين إنى شخصية معروفة يشار لها بالبنان فى البلد ده لو حصل حيقولوا عليا إنى راجل انتهازى وما حدش حيقول إنى راجل ثورى نازل مع الثوار ضد حكم الإخوان قطنة: قوللى يا معلم يعنى إيه بنان؟ المعلم خشبة: انت حمار إيش حيفهمك انت فى البنان؟ البنان ده يا غبى الصوباع قطنة: منك نستفيد يا معلمنا بس هو انت يا معلم فعلا ثورى ومن الثوار؟ المعلم خشبة: اخص عليك يا ولا أمال لو أنا مش ثورى مين اللى يبقى ثورى؟ مش أنا يلا مسمى نفسى حانوتى الثورة أبقى إيه؟ ثورى ولا مش ثورى؟ ده أنا يا حيلة أمك أبوالثورة كلها قطنة: معلش يا معلم سامحنى بس أنا كنت عاوز أتأكد ما هو أنا كمان صبيك يعنى صبى حانوتى الثورة يعنى أنا كمان من الثوار المعلم خشبة: طبعا يا ولا قطنة: قوللى يا معلم قبضوا على حد؟ المعلم خشبة: قبضوا على 30 واحد والعيال عمالة ترمى مولوتوف على عربيات الأمن المركزى باين عليها حتولع يلا اقفل دلوقتى خلينى أشوفلى حتة استخبى فيها لحد ما تيجى وبسرعة كلم كولونيا ييجى من ميدان النهضة قوله المعلم بيقولك إنك حتفضل طول عمرك غبى مفيش حد حيموت فى ميدان النهضة، الإخوان ما بيموتوش علشان ما حدش يستجرى يضرب فيهم لأنهم جماعة الريس مرسى يعنى قعدته هناك مالهاش لزمة، فاهم يا غبى؟ أنا مش عارف مكتوب عليا أشغل أغبيا معايا ليه بس يا ربى؟ ربنا يرحمنى منكم انتم الاتنين وأدفنكم بإيدى فى خشبة واحدة وارتاح من قرفكم قطنة: حاضر يا معلم حتصل يا بيه خد بالك انت بس من نفسك يا ولى نعمتنا وكبيرنا المعلم خشبة: حاضر يا حيلة أمك اقفل الخط وسلام يا فقرى قطنة: سلام يا معلم وربنا يحرسك ويصونك وما تجيلكش طلقة خرطوش تاخد أجلك المعلم خشبة: أجل مين يا بن المقشفة؟ لما إيدى تطولك، بتفوّل عليا؟ قطنة: ما أقصدش يا معلم حقك عليا المعلم خشبة: غور فى داهية جاتك القرف انت وأمك ويقوم المعلم خشبة بإغلاق الخط والاندساس بين المتظاهرين !!
