"فكرت كتير قبل ما أنزل حاجة زى كده على السوشيل ميديا أولاً أهلى ثم أصدقائي ثم المجتمع اللى عايشين فيه.. الفرق بين الصورتين ٥ سنوات".. هكذا بدأ مصطفي زغلول، 23 سنة، مقيم فى سوهاج سرد تفاصيل رحلته من عالم الإدمان إلى بطل كمال أجسام وإلى التفاصيل. قال مصطفى، إن صورته الممسك فيها بسيجارة كان فى ذلك الوقت مدمن مخدرات، قائلاً "مش مكسوف أقولها أنا كنت من ٥ سنوات مدمن مخدرات، بعدما تعرفت عليها فى فرح حد من أصحابي"، مشيرًا إلى أن رحلته بدأت بخد أشرب سيجارة عادية، وبحكم إن أبويا كان قاسي جدًا فى تربية أولاده فجربت أشرب سجاير. مستكملاً، إن الفرح التالى اختلفت المرحلة فهنا دخل فى "كوباية وسيجارة ومتعلق فيهم حاجة بنى اسمها حشيش، وخد يا مغفل جرب، والمغفل بالفعل اللى هو أنا أخد وجرب".. إحساسها دوخة وتنميل فى كل أطراف الجسم ضحك وضحك كتير بدون سبب ونظرتى للبنات اتغيرت ووقتها كان عمره 18 سنة، فتحول لشخص فاقد العقل، فكان يأخد فلوس الدروس الخصوصية ويشترى بها الحشيش، بالإضافة لفلوس الأكل والشرب تم تخصيصها لنفس المخدر. وأوضح بطل كمال الأجسام، أن جميع من حوله ابتعدوا عنه، وأصبحت الحياة صعبة للغاية نظرًا لأن فى بداية طريق الإدمان كان التعاطى بالمجان على نفقة أصحابه، ولكن بعدما تحول لمدمن أصبح مطالبًا بالدفع على مدار ٤ سنوات، وهنا قال "بعدما ماكنت فى أحسن مدارس اتحولت لدبلوم زراعة ملهوش لازمة ومفيش دروس وبالتالى مفيش فلوس الحل أصبح السرقة.. أيوه ويشهد ربي على كلامى كنت بسرق فلوس ووصلت إنى أبيع مقتنياتي الشخصية ومن ضمنها هدايا أصدقائى". وعن بداية خروجه من النفق المظلم، قال مصطفى "فى يوم من الأيام صحيت الصبح بصيت فى المرايا لاقيت إنسان مسخ غريب عن أهله وبيته أقف أكلم نفسي طيب لغاية إمتى هتفضل كده مش هتتغير"، فكانت أولى خطوات التغيير هى القيام بالوضوء وصلى وقام بالدعاء وسط بكاء رهيب يتخلله ندم على أهله وأصدقائه، الذين ابتعدوا عنه نتيجة إدمانه وانفصاله عن حبيبته والتى تخلت عنه. واستطرد بطل كمال الأجسام، فعلا اتغيرت واتحولت وده باين فى الصورة اليمين دي بقي من شهر وأنا مبطل مخدرات من ٥ سنين مكنتش مولود بطل زى ما كلكم عارفين وأنا نحت فى الصخر واشتغلت كل أنواع الشغل اللى ممكن تتخيلوها من شيل رمل وظلط بشتغل إلى طيار ديلفرى وبعدها رجعت ثقة أسرته مرة أخرى حتى أصبح له عدد كبير من المتابعين على صفحات التواصل الاجتماعى. واختتم مصطفى حكايته، قائلاً "والله تعبت من كتر ما بحاول دلوقتي أنا هنا محقق حلم إنى مبطل مخدرات من ٥ سنين ولله الحمد وحققت هدف حطيته قدامى إنى هكون حاجة فى البلد دى وهسعي وأحاول لغاية ما أوصل.. دلوقتي أنا بساعد الناس إنها تبطل أى حاجة سجاير أو مخدرات بدون مصحة وأى كلام فاضي".
