قال المواطن محمد سيد عبد الفتاح، اليوم الإثنين، إن أمين شرطة تحرش واعتدى على زوجته غادة حسين عبد الرحيم، في محيط محطة مترو المرج، أمام العامة. روى المواطن تفاصيل الواقعة، قائلًا: «كنا في عزبة النخل بنجيب فلوس جمعية من عند أختي، في منطقة محطة مترو المرج، مشيت وسبتهم وأما رجعت لقيت لمة كبيرة، وأبني عنده 8 سنين كان مع والدته، ولقيت أمين شرطة واقف بيقول أن اسمه مدحت هراس، وبيساوم مراتي إنه ياخدها معاه، قالتله أنا مستنية زوجي، قالها (لا تعالى وأنا هدفعلك أكتر، أنا عاوزك)». أضاف خلال مداخلة هاتفية مع الإعلامي جابر القرموطي، ببرنامج «مانشيت»، عبر فضائية «أون تي في»، «أما مراتي رفضت قدام الناس أخد منها شنطتها تحت تهديد السلاح الميري بتاعه، ساءلت الناس مش بيدخلوا ليه، قالولي إن أمين الشرطة ده معروف ومحدش بيقدر يجي جمبه ولا يكلمه». تابع: «اتجهت أنا وزوجتي لقسم شرطة المرج لنقدم بلاغ ضده، قالولنا (مفيش حد بالاسم ده وخد بعضك وامشي)، بالصدفة شوفناه داخل القسم، قولت للمأمور (هو ده)، قالي (اطلع بره وإلا هحبسك)». استكمل: «اتجهت بعد ذلك إلى وزارة الداخلية، وهناك استجوبونا وكمان استجوبوا ابني الصغير، وتاني يوم الصبح روحت لنيابة التجمع الخامس ودخلت لرئيس النيابة وحكيتله اللي حصل، وعملنا محضر، وبعدين عملوا لمراتي تقرير طبي بالإصابات التي تعرضت لها في منطقة صدرها». استطرد: «من ساعتين روحت لأختي في عزبة النخل، لقيت مباحث المرج كلها عندنا في البيت وخدوني القسم، وفي مكتب معاون المباحث أحمد طارق، طلعولي كمية مخدرات كبيرة وقالولي (اختار القضية اللي تعجبك ألبسهالك وإلا تتنازل عن القضية)، قمت أخدتهم على قد عقلهم وقولتلهم هجيب زوجتي تتنازل». أردف: «منذ قليل ذهبت لوزارة الداخلية وقولتلهم إني عايز أقابل الوزير، قالولي (هو الوزير فاضي لحاجة زي كده)، وأنا عمري في حياتي ما دخلت قسم شرطة، ولا عندي سوابق ولا أي حاجة». من جانبها؛ قالت الزوجة المعتدى عليها: «الكلام اللي قاله زوجي صحيح، ولو طلع مش صحيح أتحاكم، أنا مش هتبلى على حد، أمين شرطة اعتدى عليّه أمام الناس وكان عايز ياخدني بيته بالعافية، قالي (تعالي معايا البيت وأنا هدفعلك أكتر)».